Senin, 21 Desember 2009

HIKAYAT ACEH TIMUE

Oleh : Syeh Rih Krueng Raya
Assalamualaikom kawom islam
Inong ngon agam tuha ngon muda
Sambot saleum lon sion hai rakan
Saboh karangan keu tanda mata
Baca beu habeh wareh lon tuan
Saleum peuneusan Syeh Rih krueng raya
Pertama saleum lon kheun lon peutrang
Kuala simpang, ranto pertama
Troh u seruwei teuntee lon layang
U tanoh terban ngon meudang ara
Upak sungoe yu laju lon peusan
Cukop that garang jinoe syedara
Jalan ka luwah ceudah khon wayang
Phon di mon leupang troh u bendahara
Yoh masa dilee abee teureubang
Oh ta eu jalan lubang buaya
Dari sungoe yu troh u dapu arang
Cukop that garang jalan ka gura
Di matang seupeng paleng that aman
Kulam di sinan ubei bei raya
Di kulam udeung hana pue kheun ban
Matang seupeng nyan jino ka jaya
Troh u telaga muku lon u dum ka trang
Meuriwang-riwang moto cok sewa
Rot lubok gayo di jak wo reutnan
Diangkot barang atau cok sewa
Troh manyak payed sabet ka garang
Hingga hai rakan meunasah paya
Di lee uroe jeh wareh lon tuan
Syit rimba tuhan uteun bak bangka
Tanjong keuramat pih hebat hana ban
Teumpat peungarang koh kayee teunga
Dilee uroe jeh wareh lon tuan
Susah kon wayang that menderita
Di manyak payed dilee pheit hana ban
Jak u tualang meu moto hana
Tajak ngon gaki gli lam lam utak
Napaih teuh seusak di dalam dada
Nyang gasin gasin tangieng keuh nadak
Jareung na geujak pih meu oh langsa
Teuma oh jino adoe ka galak
Meuho nyang geujak moto dum kana
Jalan ka saree hana lee seumak
Haha lee pipak di jalan raya
Meuho nyang hajat mangat bak tajak
Meuho nyang galak hana keucewa
Dak hana moto han kacho utak
RBT ngon jak jino leu raya
Keude tualang garang meusigak
Mesjid pih lagak toe jalan raya
Rumoh sikula pih cukop lagak
Mandum pih galak soe nyang eu rupa
Di buket tinggi pih meuleupah lagak
Jalan di puncak troek buket rata
Alue merbo bako meusigak
Tani that galak pade geu pula
Di alue pineung pih hana pu kheun ban
Pasantren disinan na ube raya
Bustanul ulum alue pineung nyan
Inoeng ngon agam rame lagoena
Pasantren luah ceudah hana ban
Peut sago timang meu banja-banja
Dumno ka hebat dumpat ka seunang
Jino ka garang di kuta langsa
Nyoe di sungoe lung le ureung di sinan
Meu sampan-sampan kayee bak teunga
Di langsa lama pih sama saban
Sampo hai rakan keuno lam kuta
Bangunan kana rata jeup posan
Birem pih saban bayeun pih sama
Sampo hai adoe troh ranto panyang
Sampo hai rakan troh sungoe raya
Dilee tahat seungue ta eu disinan
Jino hai rakan rame lagoena
Di kulam udeung pih hanapeu kheun ban
Dak kayee arang pu lom takira
Adak di kebon pih di treun keunan
Di jak bloe barang u sungoe raya
Oh uroe ahad meusapat keunan
Inong ngon agam tuha nglon muda
Peu lom alue lhok beutroh jak keunan
Pih cukop garang jino syedara
Tanging mesjid pih cidah koen wayang
Di bineh jalan na ube raya
Pasantren luah ceudah ta pandang
padum na seunang wahe syedara
ureung ka rame keude ka garang
di alue lhok nyan keu bit bahgia
rumoh oh ta eu si panyang jalan
beuton geu pasang jendela kaca
siblah rot laot ureung tot arang
adak di kulam ube-be raya
di alue nireh pih gleh hana ban
meu sapat pih than jino di rimba
disinan that got geu peugot kulam
toe bineh jalan troh u kuala
peu lom peureulak lagak kon wayang
kiri ngon kanan toko ube-be raya
dum toko batee teunte that garang
tekongan jalan pih that bit gura
ta kalon  keude toe singkee jalan
tamoeng terminal moto cok sewa
nyang jak ek moto woe u ranto panyang
na nyang ek di sinan geuwoe u langsa
tanging mesjid pih lagak kon wayang
blah deh jalan lapangan bola
jino peureulak lagak hana ban
peu lom hai rakan troh gampong beusa
jalan katari tutu ka panyang
troh ranto panyang saban syit rupa
alue bu peudawa ban dua saban
idi pih meunan mandum ka jaya
rumoh sikula rata jeut posan
mesjid pih meunan na ube raya
han peu kira le lahee ta pandang
le that pembangunan ka di aceh timu
adak idi cut pih jeut hai rakan
hana tinggalan ngon laen kota
tanging mesjid pih bineh jalan
kupiah pahlawan bak peugeu rata
pue lom di bagok cocok hana ban
rata bangunan troh troh lam gampong
jeh ulee ateung jameun that sayang
oh tajak kenan moto toke pha
jalan meu abee ulee meu guncang
nibak masanyan cukop sengsara
teuma oh jinoe hai adoe badan
ta kalon jalan jino ka aspaa
ureung ka rame keude ka garang
watee pasaran jak meukat ija
di kuta binje keude toe jalan
nyan pih hai rakan pih ka sampurna
adak mesjid keubit that garang
peu lom hai rakan lapangan bola
geu pageue beuton ta kalon beu trang
bek sang lon karang nyang hana-hana
dumno katari meukri hana ban
dumno bangunan bek peugah hana
bek kheun syedara hana bangunan
tanging beu trang-trang wahe syedara
jeh arakundo pih bako han ban
tutu that panyang luar biasa
rot timu meuyup rot teungoh manyang
rot barat meunan meuyup syedara
oh tanging jie oh meugoh that garang
tanging titi nyan cukop gembira
di simpang ulim oh tanging sayang
toko di sinan gohlom meu tuka
walaupu goh na hai rakan
tapi bangunan jino pih kana
rumoh sikula rata di sinan
mesjid pih meunan na ubee raya
di keu mesjid keubit that garang
na tanoh lapang bak meuen bola
deungon telkom ta kalon manyang
bak cok siaran dari udara
padum na ceudah tuah buleun trang
simpang ulim nyan sangat bahgia
pue lom lhok nibong bak linggong jalan
buah-buahan di meukat pih na
di pisang salee leu di keude nyan
boh timon taiwan boh giri tuha
boh giri bali pih na disinan
di lhok nibong nyan cukop sempurna
tanging mesjid pih dhiet kon wayang
kasaban-saban ngon mesjid banda
kasaban keubit mesjid Baiturrahman
bi lhok nibong nyan sangat seujahtra.

Tidak ada komentar:

Poskan Komentar

Ulon tuan preh kritik ngoen nasihat jih. Maklum ulon tuan teungoh meuruno.