Hikayat Gomtala Syah
Hikayat Aceh
- Alih Aksara dari Arab Melayu / Jawi / Harah Jawoe ke huruf latin
Oleh: T.A. Sakti
Bagian 1
Bismillahirrahmanirrahim
Phon mulaan nama Tuhan nyang that suci
Lagi Rahman deungon Rahim
Nyang that halim nyoe lon peugah
Beuna ta thee dum he wareh
Tuhan geumaseh donya limpah
Kafe Iseulam Neubrie raseuki
Walee meuseuki jaheliyah
Dum binatang jen ngon ensan
Tuhan Karim Po Hadharat
Lagi Kudrat Sidroe Allah
‘Arasy Kursi Loh ngon Kalam
Laen bak nyan deungoe lon peugah
Kayee batee dum lam nanggroe
Geutanyoe Tuhan brie tuah
Awai neupeujeut Nur Muhammad
Lheuh nyan ummat dum khalifah
Seureuta neubrie ngon raseuki
Dum barangri hina meugah
Nabi Muhammad leubeeh mukjizat
Inggi deurajat Rasul Allah
Teumpat lahe Nabi Muhammad
Datang rahmat Nanggroe Makkah
Siti Aminah nama ibunda
Nama ayahnda tuan Abdullah
Nenek Nabi Abdul Muthalib
Bangsa Arab Nabi mulia
That geumaseh Nabi Muhammad
Dum na ummat karonya limpah
Laen bandum Nabi-Nabi
Uroe page mita ilah
Bandum geutanyoe ta peulheuh droe
Bak ulee titie rakyat meulimpah
Yoh masa nyan ummat Nabi
Mita Nabi droe dum geupeugah
Uroe page meuribee bagoe
Rakyat dum moe deuk deungon grah
Sijeungkai jarak mata uroe
Di ateuh dhoe hamba Allah
Yoh masa nyan Nabi Muhammad
Neumita ummat pat na meugah
Apui tutong han soe padam
Laju troh keunan Rasulullah
Oh meuteumee ummat neupuwoe
Page dudoe soe meutuah
Beu ta taubat dum teuh sare
Uroe page na mangat glah
Soe nyang taubat masa jinoe
Syeuruga dudoe teumpat dahsyah
Ingat-ingat wahe taulan
Troh panggelan Rahmatullah
Bah le dum nan nyan haba nyan
Soe nyang iman that meutuah
Lon meupeugah haba raja
Ngon Kuasa Sidroe Allah
Lon lakee tulong ubak Tuhan
Beumangat badan lon seuleuah
Deungon Kudrat Zat Illahi
Muhammad Nabi Rasul Allah
Beureukat syaf’at Nabi Adam
Beureukat makam Naggroe Makkah
Beureukat keuramat Blang Arafah
Bak lon rika Neubrie mudah
Beu ek seuleusoe ulon
Deungon beureukat Kiblatullah
Beureukat batee Hijir Aswad
Nabi Ibrahim dilee meugah
Beureukat tiree hitam mirah
Dudoe geulhom Ka’batullah
Beureukat keuramat dum Aulia
Lon
Ulon karang bak keureutah
Insya allah beujeut lon karang
Ngon ileuham
Ya Tuhanku tulong hamba
Beuseumpureuna lon seuleuah
Bagian 2
Neutulong kamoe he Hadharat
Seubab hikayat Teungku Beuah
Bak lon
Lon lakee bantu nibak Allah
Dengon tulong Allahu Ahad
Nyoe hikayat ulon kisah
Jinoe lon seubut haba raja
Lon peurawi mangat indah
Nyoe lon peugah haba lawi
Wahe akhie ngon lon kisah
Sidroe raja lon riwayat
Deungoe sahbat ulon peugah
Neu keurajeun amat sangat
Timue Barat meusyeuhu gah
Ulon peugah Daulat Ampon
Atoe turon lon seuleuah
Meunyoe raja cit ngon putroe
Dilon sidroe galak leupah
Nyan keuh raja nyang asliyah
Deungoe jinoe lon boh nan sah
Nama nanggroe Palimbang Syam
Usman Juhan nama raja
Nama putroe Cut Budiman
Meualeut nan deungon raja
Nyan keuh raja nyang samlakoe
Geu pujoe ban saboh donya
Sideh Nanggroe Syam neu keurajeun
Geunap buleun neu puasa
Hate teuh saleh tangan murah
Neubrie seudeukah jeu ulama
Kaya pih that hana sabe
Geudong meuritie tujoh laksa
Lingka kuta dum teudong-dong
Asoe di dalam intan meutia
Peudoe yakut dengan zamrut
Meungret ta bot han ek kira
Keubeu leumoe han peu peugah
That barullah meuploh laksa
Lampoh umong han peu kheun le
Beurandang pade meubanja-banja
Kapai di laot na peut ribee
Bandum teuntee hareuta raja
Seureutoh lapan ploh ra di baroh
Hukom neuboh khalifah dumna
Jeub-jeub nanggroe lam geupujoe
Tan siuroe gob ceureuca
Bah pih meunan Neubrie le Tuhan
Usman Juhan hate liya
Dawok neumoe uroe malam
Neu takot karam asoe donya
Neutakot salah nibak Tuhan
Bak peutimang rakyat dumna
Uroe malam beutangisan
Neutakot keu Tuhan Poteuraja
Ie seumayang nibak tuboh
Hantom teudoh dikutika
Neu puasa geunap uroe
Siseun gantoe siklep mata
Sunat peureulee han neutinggai
Sabe neukawai jeub kutika
Peugot meuseujid dum jeup nanggroe
Meunasah sagoe neuyue peuna
Tiep Jum’at jak u meuseujid
Neu peuteubiet sudeukah raja
Neuyue seumubeut jeub meunasah
Neubrie seudeukah dum ulama
Yoh masa nyan nanggroe lam aman
That bit seunang rakyat dumna
Judie taroh tan lam nanggroe
Reubot tajoe han sapat na
Ureung piep madat neuyue gasie
Nyang pancurie neuyue sula
Neu hukom rakyat rakan sahbat
Bak dua pat han tilek muka
Boh kayee le dalam nanggroe
Rata jeup sagoe meukeuba-keuba
Bagian 3
Pade pih jeut ureung meugoe
Siringget tabloe sigunca dua
Dumpeu mudah Tuhanku brie
Seubab Duli ade raya
Aneuk nanggroe tan neubrie buet
Tan meubacut neu enanya
Aneuk yatim neu peusayang
Neubrie rijang ngon beulanja
Ureung gasien dum neutulong
Jeup-jeup gampong soe nyang teuka
Raja meutuah that bit shaleh
Ucap taseubeeh hana reuda
Meusyuhurah jeup-jeup nanggroe
Lam geupujoe jeup-jeup donya
Raja Usman meugah u jeuoh
That tawajjoh keu Rabbana
Lapan blah thon neu keurajeuen
Teukeudi Tuhan Po nyang Kuasa
Bak simalam raja nanggroe
Deungon putroe neu eh dua
Malam Seunanyan buleun pih jroh
Neu siteuboh raja raya
Raja meutuah rhot maknikam
Nyan u dalam rahim nisa
Hingga suboh beungoh uroe
Beudoh jak manoe sigoe dua
Oh lheuh manoe neu seumbahyang
Makeun minom putroe ngon raja
Lheueh nibak nyan pinah hidang
Neujeb rijang ngon ie kahwa
Meunan sabe geunap uroe
Tuan putroe deungon raja
Poh dua blah oh cot uroe
Makeun putroe lom ban dua
Oh lheueh makan pinah hidang
Putroe tatang ngon ceurana
Makeun sireh saboh lipat
Bibi hu that sang peureuda
Teuma neu tren nyan u mideun
Bale di leuen teumpat seunia
Peudana Meuntroe teuka keunan
Hadap Sulthan beurang jan masa
Meunan sabe geunap uroe
Hana padoe jeup kutika
Putroe Budiman pih ka hamil
Putroe lape jeup kutika
Ureung nanggroe mee bu kulah
Keu Budiman Syah Putroe Muda
Jeup-jeup uroe hana padoe
Ureung nanggroe jak bak Raja
Mee bu kulah ngon bu gateng
Geupeusunteng Pitroe Muda
Habeh uroe sampoe buleun
Budak yoh nyan pandang donya
Dua blah buleun dua blah uroe
Budak sampoe jipandang donya
Rupa ceudah hana lawan
Aneuh pih agam samlakoe raja
Teungoh ji ek mata uroe
Sinyak jimoe meukuw’a-kuw’a
Uroe Jumeu’at Buleun Molod
Budak Cut Tuhan karonya
Elok pareh ban sinaroe
Dalam nanggroe hana ngon sa
Paleut jaroe jroh meukulam
Lidah hitam meukeumala
Mata hitam miseu nilam
Nyang puteh sang buleun purnama
Bulee kuneng buleun siuroe
Meucahya dhoe miseu qamar
Muka bunta bujue alang
Boh hidong ban cumboi meutia
Ulee tamse boh beurabang
Takue panyang oh meumada
Gukee puteh jampue mirah
Siulah sang bintang raja
Bagian 4
Ulee bahoe jroh that keumang
Raya u manyang dum geujangka
Boh beuteh na miseu jantong
Jroh that turon dum geusuda
Sapai dua jroh that turon
Di bahoe phon dum geusahja
Aneuk jaroe tiruet-tiruet
Ujong cut-cut uram raya
Ta eue badan jroh meutrieng blang
Raya u manyang keumang u dada
Raja Usman that sukaan
Putroe Budiman sijuek mata
Neu eue aneuk tamse bintang
Uleebalang indah rupa
Ureung jak eue jeup-jeup nanggroe
Bungong jaroe sajan jiba
Mee beureuteh deungon pisang
Ladom timon phang ngon timon saka
Peurumoh Geuchiek Peurumoh Meuntroe
Peutua Nanggroe judo Panglima
Judo bula mee sigeupang
Uleebalang mee sibahra
Nyang meung nama mee sitahe
Peurumoh Kadhi mee sifaha
Tujoh uroe Putroe madeung
Siploh krong meutamah areuta
Jeuoh ngon toe ureung datang
Peuseumbahan jimee keu Raja
Sireutoh lapan ploh raja di baroh
Bandum ka troh jak bak Raja
Tujoh uroe saket Cut Ti
Neu khanduri le Baginda
Neusie keubeue leumoe beulati
Ulama faki neuyue pinta
Geujak tueng ngon ahli nujum
Habeh bandum keunan teuka
Dum neuyue ek u meuligoe
Di seuramoe geuleung tika
Habeh geu ek ‘alim faki
Duek meuritie teupat banja
Geubeuot apui geuyue khatam
Geubeut sajan deungon do’a
Tahlil pih lheuh khatam hase
Geubaca le lom ngon do’a
Geurah jaroe lheuh Fatihah
Subhanallah lom geubaca
Teuma geubeuot ngon hidangan
Cawan pingan dalong pih na
Ladom geubrie ateuh dalong
Nyang manyang ureung meunama
Ladom geubrie lam pingan meuh
Jeuoh peungeuh jiplueng cahya
Nyang ladom lam pingan pirak
Bube nyang hak maseng jeumba
Nyang ladom lam pingan haloh
Nyang meureugoh biek Panglima
Nyang ladom lam pingan batee
Ban patot mee maseng kada
Nyang ladom geuleung bak tanoh
Sinan geuboh nyang hina-hina
Ladom geuboh lam capah kayee
Nyan keu geuthee hamba sahya
Geubeuot pih saboh sidroe
Mangat sampoe ho jimeuba
Geubot ngon sie saboh teumalang
Mangat rijang puleh hawa
Nyan keuh babad bangsa kureung
Hamba ureung peumeudeka
Sare habeh dum seuleusoe
Geurah jaroe bandum rata
Seungab siat dang pajoh bu
Dum na Teungku hana haba
Lheuh pajoh bu teuma dudoe
Bandum geuwoe ubak tangga
Syiah Ulama Bujang Meuntroe
Bandum geuwoe tinggai Raja
Bagian 5
Tinggai Raja deungon Putroe
Geunap uroe meuseu-suka
Padum lawet teuma dudoe
Hamil Putroe budak ka na
Siploh buleun dua blah uroe
Aneuk Putroe pandang donya
Buleun Muharram uroe Seunayan
Cut Budiman aneuk meukuta
Rupa ceudah hana bagoe
Ban mata uroe baro keulua
Kulet puteh ban buleun trang
Usman Juhan galak raya
Neu eue aneuk samlakoe ban
Usman Juhan neucom neuwa
Teuma madeung Tuan Putroe
Ureung nanggroe dum tron rata
Habeh ji tron ureung nanggroe
Bungong jaroe bandum jiba
Lagee nyang ka dilee puroe
Tuan Putroe ji peumulia
Lagee yoh na nyan aneuk phon
Nyoe pih meunan jikeurija
Hana guna panyang reunteh
Joroe keuboh manfaat hana
Bah teuduek nyan dilee siat
Meuwoe riwayat keu Putroe Muda
Padum lawet teuma meulheung
Ka lheuh madeung Putroe Jeumpa
Oh lheuh madeung Putroe Budiman
Deungoe taulan lon calitra
Budak neupeu-eh dalam ayon
Neu ek neutron dodi-ida
Jinoe lon peugah bhah lam ayon
Bak canek phon lon peuija
Allah hai do doda idi
Sinyak cut di doda-ida
Beurijang rayek Po Samlakoe
Peutimang Nanggroe geulantoe Abi
Troh teukeudi Tuhan sidroe
Gata Samlakoe peutimang Neugri
Allah hai do doda idang
Geulayang blang ka putoh taloe
Beurijang rayek Uleebalang
Lon rasie nan bak ayah droe
Ban dua droe gohlom boh nan
Jinoe kaman lon boh keudroe
Nyang tuha na kreh lam jaroe
Nyang adoe panah pusaka
Nyang tuha nama Syah Midan
Nyang adoe nan syah Gumiran
Hingga rayek seun sigeutue
Aneuk Teungku jitupeu bahsa
Hana panyang ulon peugah
Mate ayah tinggai bunda
Oh lheuh mate raja nanggroe
Deungoe jinoe lon calitra
Geupeeh tamboe geuseukok gong
Ureung gampong dum troh teuka
Geutot beude ngon meuriam
Ji tron rijang jak bak raja
Kadhi-kadhi Meuntroe-meuntroe
Raja nanggroe peulikot donya
Lheuh nyan teuma geuseumiyub
Ureung jak beut lakee do’a
Oh lheuh seumiyub raja meugah
Bulueng seudeukah bandum rata
Geubileung uroe raja hana le
Geuboh tahlil kifarat puasa
Kifarat seumbahyang ngon puasa
Le areuta Raja Nanggroe
Kifarat puasa ngon seumbahyang
Usman Juhan yue boh keudroe
Bah teuduek nyan haba kifarat
Jinoe lon peugah soai khanduri
Geusie keubeue dua siuroe
Ureung nanggroe galak hate
Bagian 6
Pakrie han galak Teungku meutuah
Hana payah mita raseuki
Oh ka hana le Poteuraja
Geudong dua ka soh han le
Dua geudong ringget habeh
Hana puleh weuh that hate
Pakrie han weuh Teungku meutuah
Gobnyan Khalifah nyang that ade
Raja ade ngon seunang that
Aneuk rakyat hantom meupake
Lheuh nyan teuma troh sireutoh
Geudong tujoh ka soh han le
Oh ka tan le Poteuraja
Tinggai aneukda ngon Putroe Ti
Dawopk neumoe sabe-sabe
Bak simalam neumeulumpoe
Ban dua droe neujak lam gle
Bak nyum na sang neujak tapa
Syiah lam rimba meurumpok le
Ban meurumpok Teungku Syiah
Neu peugah bit susah hate
Ta dong sinoe aneuk meutuah
Peu na mudah makeun kubrie
Teuma neukheun insya Allah
Banta meutuah teukeujot le
Ban teukeujot bak meulumpoe
Lajue neumoe ie mata ile
Ban teukeujot ka beungoh uroe
Bandua droe jaga sigoe le
Oh ban jaga duek teupipo
Ban dua droe geumeujak lam gle
Seubab geujak wahe adoe
Peuseutot lumpoe tunue hate
Geulakee izin nibak bunda
Lon meung bungka izin neubrie
Izin lon brie he aneukda
Bandua tajak dalam gle
Ban neubeudoh neucok langkah
Ngon Bismillah neubaca le
Neujak le yoh nyan lajue bandua
Dalam rimba siat ka troh le
Ban sare troh bandua gobnyan
Syiah Beurahman meurumpok le
Ban meurumpok saleum geubrie
Geujak meuriti teuka keunan le
Assalamu’alaikum he samlakoe
Gata dua droe saleum lon brie
Wa’alaikum salam Teungku Panita
Kamoe bandua Tuhan teukeudi
Teungku neukheun deungon sunggoh
Ta jak piyoh keudeh bak Bale
Neujak Teungku neujok bungkoh
Ranub ta pajoh aneuk boh hate
Neupajoh ranub baro bicah
Idang ka troh keunan ukeu le
Oh lheuh ranub neusrah babah
Teungku peugah beek lalee le
Makeun aneuk bu sibabah
Mangat puleh grah beek thoe hate
Teuma neuseuot insya Allah
Teungku langkah keunoe sigra le
Han peu aneuk makeun lajue
Aneuk Teungku lon khanduri
Oh ban lheuh makeun bandua gobnyan
Geupeuhah idang lheuh rah jaroe
Marit Teungku Malek Beurahman
Ngon banta nyan lom he adoe
Wahe aneuk Meuntroe Intan
Lon meukalam ngon samlakoe
Pane nanggroe ho beujalan
Cut bintang beunta hareutoe
Umue baro muda seudang
Pakon bintang ta boh nanggroe
Soe nan ayah deungon bunda
Soe nan gata bandua droe
Bagian 7
Peu na hajat keunoe teuka
Lam rimba raya jinoe taboh droe
Teuma seuot Syah Gumirah
Deungoe Lon Tuan he Teungku droe
Nama nanggroe Palimbang Syam
Usman Juhan ayah kamoe
Nama ibu Putroe Budiman
Syah Midan aduen lon sidroe
Nama ulon Syah Gumiran
Bandua nyan aduen adoe
Oh ka hana le du lon raja
Lon seungsara jeup-jeup nanggtoe
Nyan keuh jeut jinoe keunoe teuka
Bak rasa peuseutot lumpoe
Pa Bentara peu gata lumpoe
Gumiran Syah peugah lanja
Bak Aulia neu hareutoe
Habeh dumpeu neu calitra
Dumna haba yoh saboh roe
Seuot Teungku Po Bentara
Tuhan kaya nyang Samporeuna
Beek le aneuk tajak mita
Bandua ta duek jinoe ngon kamoe
Jinoe lon brie peu nyang hawa
Ube sikada nibak kamoe
Banta seuot insya Allah
Ban nyang titah Teungku jinoe
Habeh narit Banta dua
Teungku Tapa beudoh jak woe
Teuma neujak Syah Gumirah
Bandua nyan aduen adoe
Neutron Teungku di Balee raya
Lam guha gata lon puwoe
Neubrie do’a sianika
Neu peuhija Keumala Nanggroe
Syah Midan ngeut silagoina
Syah Gumiran nyang lisek tuloe
Dumna ileumee habeh neubrie
Jeut geu-uji sakti bagoe
Teuma jeut le bungong pade
Ji amai le hekeumat nyoe
Habeh bandum ka jeut neupham
Syah Gumiran lisek tuloe
Tujoh uroe tujoh malam
Dum sibarang ka seuleusoe
Neutoep pinto le Beurahman
Banta sinan teutap teukhoe
Beuthat han jeut di Syah Midan
Neuduek sajan peungon adoe
Teuma neuwoe di Beurahman
Troh taulan bak teumpat baroe
Teutap neuduek dalam taman
Karangan Banta dua droe
Teutap sunan dalam kaluet
Jitueng buet malam ngon uroe
Hana ingat le meubacut
Lam jiseubut ngon jipujoe
Nyang na leumah Tuhan ma’bud
Tan meukeusud laen jeup syoe
Trieng beutong peugot keu go lham
Trieng agam keu go peulintek
Amma ba’du wahe abang
Keunarang laen lon balek
Bit pih laen wahe abang
Saboh dan aduen ngon adek
Ulon peugah seun saboh dan
Neupham taulan narit nyang baek
Keumang-keumang bungong hasan
Bungong peukan bee jih tarek
Meunyoe jampu roh meusikhan
Payah rakan bak ta tilek
Haba lon nyoe meumeuoh cit tan
Na bagoe ban keundoe tarek
Miseu ureung hawa mancang
Sikrak nyum sang ta pajoh ek
Bagian 8
Meung le singke jampu reuhang
Meunan abang bak lon tilek
Sabang nanggroe wahe abang
Luah han ban wahe adek
Rakyat ramee hana macam
Ngon pahlawan tarek-tarek
Keurajeun sinan Said Ba’dan
Meugah han ban lom ngon tarek
Bak ujong gunong Buket Jiran
Tujoh bulan jak wahe adek
Deungon Nanggroe Syam Palimbang
Dua thon pasang guda tarek
Meulinteung gunong Buket Jiran
Deungoe lon kheun ban wahe adek
Si rot baroh Syam Palimbang
U tunong nyan lom he Nyak Cek
Samat teungoh Buket Jiran
U gaki nyan Padang Tasek
Nyan keuh Nanggroe Padang Safaran
Said Ba’dan raja nyang tarek
Raja meukawen pih na sidroe
Ureung binoe that ceureudek
Rupa elok hana macam
Indra Lailan nan nyang baek
Raja Ba’dan peukong nanggroe
Lam meuligoe Putroe hai adek
Aneuk raja pih na sidroe
Ureung binoe jroeh lagoi ek
Lagi pih na keusukaran
Lon peugah ban bacut hai adek
Manyak jimoe uroe malam
Sikeujab han ji iem adek
Neu mita ubat Putroe Intan
Jih meuran raya lagoi ek
Poteuraja gundah han ban
Indra Lailan saban euncek
Neu meukaoy uleh raja
Ratna Indra Cut nyang baek
Beu rijang puleh he bijeeh mata
Lon meunazar putroe cantek
Nama Teungku Syiah Tapa
Jameun masa ka he adek
Bak ujong Naggroe Padang Safaran
Aulia sinan nyang that tarek
Sinan geuduek dalam guha
Bak neutapa wahe Nyak Cek
Keunan kaoy Putroe muda
Ratna Indra putroe cantek
Sireutoh keubeu limong ploh unta
Poteuraja kheun he euncek
Bak rot tajak bak Aulia
Sidroe raja sinan nyang tarek
Sibuleun jak pasang guda
Nanggroe raja wahe adek
Rap ngon gaki Buket Jiran
Sinan taulan raja nyang tarek
Nama raja deungoe lon kheun ban
Harun Makam nan he adek
Laen nanggroe wahe taulan
Nyan jipeunan Padang Tadek
Sireutoh tujoh takloek keunan
Harun Makam nyang that tarek
Nyan Aulia bak ceu nanggroe
Ta pham adoe bak Padang Tasek
Jeuoh nanggroe nyan Padang Tasek
Jih ka dilee peukeumah droe
Koy Putroe wahe adek
Harun Makam jipreeh sinan
Geuba Putroe nyan nyang that tarek
Meunyoe leupah bak nanggroe nyan
Ji cok Putroe nyan wahe adek
Bak ceu nanggroe jipeugot kuta
Ji preeh geuba Putroe cantek
Ka neutupeu le Sulthan
Said Ba’dan sangat lisek
Bagian 9
Meunyoe han ek bak peutheun prang
Putrie bintang jicok hai adek
Kareuna raja Harun Makam
Meugah han ban lagi tarek
Nyan keuh seubab ek jeut paloe
Tuan Putroe soe ek
Aneuk raja aneuk Meuntroe
Dalam nanggroe wahe adek
Soe ek peulheuh kaoy Putroe
Nyan keuh lakoe Putroe cantek
Tan kuasa pih meusidroe
Teuduek ohnoe dilee euncek
Puteh-puteh bungong geutoe
Seupot uroe cantek-cantek
Deungoe lon kisah laen bagoe
Deungoe adoe narit nyang baek
Ladom hawa pajoeh bada
Ladom suka pajoeh timpham
Ladom galak teungkulok sutra
Ladom hawa ija bukam
Nyang ladom ngui gleung suasa
Taeu ija macam-macam
Sugoet mirah taeu di ulee
Jisoek bajee dum potongan
Watee jijak teuhah ulee
Hana malee inong jalang
Lon keumarang goh biasa
Lon peuhah haba macam-macam
Bah keuh dumnan dua banja
Putroe muda lon peuriwang
Deungoe lon peugah Putroe muda
Aneuk Raja Said Ba’dan
Nama Putroe Ratna Indra
Aneuk Cutda Indra Lailan
Teutap sinan lam istana
Meuseun-suka ngon Dendayang
Sikureung droe muda-muda
Ratna Indra Putroe Seudang
Geunap siploh bak keunira
Sang meutia saboh karang
Rupa elok bak bintang kala
Cahya muka sang buleun trang
Soe nyang kalon Ratna Indra
Teuka hawa le di sinan
Umue baro teungoh muda
Lapan thon ka wahe abang
Badan bulat keuing linteng
Hana bandeng ngon teuladan
Soe nyang kalon ji keureuleng
Cut linteng jroh han macam
Muka bunthok lipeh bibie
Juhari Putroe aneuk bangsawan
Soe nyang kalon Putroe Siti
Meugule reubah le pansan
Oek teuh hitam jroh meutapee
Dan lagi meung patah manyam
Aneuk raja aneuk Kadhi
Beurahi keu Putroe muda
Gigoe lintek hana sakrie
Dan lagi puteh dum intan
Ngon peukaian meuh peulangi
Dan lagi intan meukarang
Gleung bak jaroe ngon bak gaki
Ikai meuduri anteng meukarang
Ngon Dendayang sikureung droe
Ngon Putroe siploh he abang
Teutap sinan lam meuligoe
Sajan Putroe Muda Seudang
Laen jinoe lon hareutoe
Deungoe adoe wahe abang
Said Ba’dan lon peuduek ohnoe
Deungon Putroe dan Dendayang
Tarek layeu boet keumudoe
Ta pasoe layeu kuangkang
Ulon peugah nyang saboh roe
Lon peugoe keu muda seudang
Bagian 10
Umue lhee thon dalam guha
Troh teuka Syiah Beurahman
Neu buka le deungon pintoe
Neu laloe keudeh u dalam
Banta dua hana neuthee
Syuko keu guree keu nekmat Tuhan
Syah Midan hana troh tapa
Gumiran ka samporeuna
Syekh Beurahman peurab lanja
Neucok Banta ngon Syah Midan
Teuma neucok Syah Gumiran
Keudeh u luwa peuteubiet rijang
Syah Gumiran neusrah gaki
Neutitie u Balee Gambang
Teuma neuduek ateuh keurusi
Dan lagi deungon Syah Midan
Beurahman kheun nariet pantah
Neupeugah bak Syah Gumiran
Wahe aneuk ka seb tapa
Tuhan Esa nyang brie simpan
Jinoe aneuk Banta Muda
Bandua deungon Syah Midan
Ta theun lon plah paleut jaroe
Lon pasoe sakti meukarang
Gumiran theun pantah-pantah
Jaroe neuplah le Beurahman
Lheuh nibak nyan teuma dudoe
Ka neupasoe le Beurahman
Jan meusukee uroe dudoe
Neu teupuek jaroe nanggroe karam
Ka neuplah pha teuma dudoe
Neupasoe laen nibak nyan
Aneuk Raja na tujoh droe
Taklok keunoe bak Beurahman
Bak sidroe-droe wahe adoe
Lhee reutoh droe Uleebalang
Sidroe Panglima bak keunira
Siploh laksa rakyat rakan
Han soe tu’oh peu calitra
Rakyat raja dum sibarang
Ta deungoe ulon hareutoe
Nyang tujoh droe lon peugah nan
Peutama phon Zinggi Diwi
Dan lagi Ahmad Geuritan
Meuploh laksa nyang simpati
Meuploh kati Panglima Prang
Laen nibak nyan Harun Ali
Keu eumpat lagi Hari Buwan
Lagi gagah ngon beurani
Hardan Ali Hari Buwan
Nyang keulimong Hasan Pari
Keunam geurasi Ratna Lukman
Nyang keutujoh Raja Keurani
Juwah miseu uleu biram
Keunan datang dum jilari
Jan neupangge le Beurahman
Hana sidroe jimeu ungki
Zinggi Diwi Hari Buwan
Troh keunan jipeurangi
Beuot jari bak Beurahman
Teuma marit Zinggi Diwi
Dan lagi Ahmad Geuritan
Ampon Tuanku meuribee kali
Di yueb gaki Po Janjongan
Peu na hajat wahe Duli
Nanggroe siri neu keumeung prang
Beurahman seuot tanyong Zinggi
Bukon nanggri lon keumeung prang
Nyang lon pangge gata keunoe
Deungoe kamoe dum sibarang
Kareuna gata lon brie jinoe
Oh jipangge le Gumiran
Uroe dudoe beek meuungki
Aneuk kami Syah Gumiran
Teuma seuot Zinggi Diwi
Dan lagi Ahmad Geuritan
Bagian 11
Hana patot lon meuungki
Hoe nyang neubrie ulon tuan
Ban tujoh kamoe cit syeedara
Sapeu haba dum sibarang
Lheuh nibak nyan neucok cumboi
Jamaloi peuseumbah rijang
Ban tujoh droe kalam cumboi
Neu pasoe lam pha Gumiran
Teuma neucok saboh malakat
Rupa jroh that hana macam
Sinan teubiet peu ta kasad
Lam malakat meutia nyan
Oh neupeuduek ateuh bumoe
Teudong jinoe Kuta Reuntang
Mideun dalam ngon meuligoe
Dum sinaroe ngon meuriam
Lam istana Tuan Putroe
Dum sinaroe ngon Dendayang
Ngon pasukan kawai meuligoe
Tujoh droe wahe e taulan
Beurahman brie soek bak jaroe
Galak han soe muda seudang
Hingga abeh ka seuleusoe
Dum sinaroe neu seumulang
Di Syah Midan teuduek keudroe
Cit keu adoe geu seumulang
Kareuna gobnyan tan troh tapa
Cit ka kada nibak Tuhan
Meusapeu tan neu peujaroe
Teuduek keudroe hana kalam
Nyang aulia bak ceu nanggroe
Janji Putroe peulheuh naza
Leupah keunan Pocut Putroe
Saboh Nanggroe Harun Makam
Han that jeuoh intan peudoe
Oh nam uroe guda pasang
Meung jipreh troh jiba Putroe
Bak ceu Nanggroe Kuta Reuntang
Soe ek peutroh hajat Putroe
Nyan keuh lakoe Ratna Indra
Aneuk Kadhi aneuk Meuntroe
Dalam Nanggroe Padang Safaran
Tan kuasa pih meusidroe
Kadhi Meuntroe Raja-raja
Kareuna Raja Harun Makam
Pahlawan limong ploh dua
Soe nyang hajat Putroe Intan
Ta lawan prang Raja raya
Teuma seuot Syah Gumiran
Pakon meunan ji angkara
Teungku hanmee seukalian
Putroe Intan Ratna Indra
Beurahman seuot teuma nyoe ban
Neu peugah nyan bak Gumiran
Nyang jeut meunan Putroe Intan
Raja Ba’dan hana ridha
Ka dilee kon cit ka meunan
Harun Makam raja raya
Nyang jinoe geupreeh troh datang
Geucok rijang Ratna Indra
Bak peunyuem lon han ek lawan
Raja Ba’dan han kuasa
Rakyat kureung Raja Ba’dan
Harun Makam le that tantra
Jinoe aneuk tajak keunan
Tueng Putroe nyan uleh gata
Deungon Raja Harun Makam
Ta lawan prang gata dua
Menyoe kon meunan Meuntroe Intan
Bukon sayang Ratna Indra
Bandua deungon Syah Midan
Jak peungon prang raja raya
Gumiran jiseuot meunoe
Di kamoe hana kuasa
Kamoe dua meujak keunoe
Kon keu Putroe meujak mita
Bagian 12
Meucre gampong lon boh nanggroe
Hajat kamoe meujak tapa
Parang tabrie ngon makanan
Peu tanaman dum neupula
Boh keumiri ngon bak jagong
Boh gadong ngon boh keutila
Syah Midan duek nibak rangkang
Sajan Pawang he syeedara
Beungoh uroe jak teumeubang
Woe bak rangkang ph ka sinja
Geunap uroe sabe meunan
Teuduek oh nan saboh haba
Ladom galak boh timon phang
Ladom abang timon saka
Ladom galak teubee gadeng
Ladom meusyen teubee
Ladom galak keu boh mancang
Ladom taulan boh keupula
Ladom galak keu boh rambot
Ladom patot keu boh suta
Meunan-meunan wahe abang
Rayek seudang agam dara
Ulon peuduek Syah Gumiran
Teutap sajan Pawang Rusa
Jinoe meugisa keu Raja Ba’dan
Bak simalam leumah rasia
Raja neu-eh lam meuligoe
Sajan Putroe Lailan Indra
Bak simalam neu meulumpoe
Na nyum sidroe Syiah teuka
Na nyum neu ek u meuligoe
Keunyuet asoe raja raya
Rupa hibat hana bagoe
Mumat jaroe deungon raja
Teuma dudoe neukheun meunoe
Dalam lumpoe leumah nyata
Wahe Raja Said Ba’dan
Deungoe lon tuan he syeedara
Na dua droe aneuk Sulthan
Nibak rangkang Pawang Rusa
Sidroe geuhoi nan Syah Midan
Nyang adoe gobnyan Syah Gumiran
Neu peukawen deungon Putroe
Meuhan nanggroe keunong bala
Meuhan neutueng keu judoe Putroe
Tutong nanggroe musem khueng teuka
Aneuk raja ban dua droe
Neutueng sidroe dalam dua
Raja seuot dalam lumpoe
Aneuk kamoe goh lheuh naza
Seulama goh hajat sudah
Han jeut nikah Putroe Muda
Teungku seuot teuma meunoe
Dalam lumpoe raja raya
Oh lheuh nikah Tuan Putroe
Peulheuh dudoe kaoy naza
Han jeut meunan wahe Teungku droe
Keu judo Putroe raja raya
Kareuna Raja Harun Makam
Meugah han ban he panitia
Ampon Daulat beek susahan
Ji lawan prang le Gumiran
Ulon teuh nyoe pih angat that
Sayang lon that ke Putroe Muda
Nama ulon wahe Sulthan
Malek Beurahman nyan geuboh gla
Ban neu deungoe haba meunan
Suka han ban hate raja
Oh teukeujot beungoh uroe
Raja Nanggroe neutron lanja
Ban sare troh u leun meuligoe
Neu ek jinoe u Balee Raya
Teuma neuhoi ilee ngon bujang
Tron di manyang sabda raja
Jibot jaroe dua tangan
Hadap Sulthan raja raya
Bagian 13
Peu ek seumbah Datok Bujang
Tron lom yoh nyan sabda raja
Ta tot beude ngon meuriam
Sigala alam ta seuranta
Ban Bujang deungoe sabda meunan
Tot meuriam ngon ramtaga
Habeh jitron Uleebalang
Ka peunoh blang rakyat dumna
Tujoh ploh raja taklok keunan
Ubak Ba’dan raja nyang raya
Habeh jitron bandum keunan
Junjong Sulthan Raja Meukuta
Jibeuot jaroe dua tangan
Bak Sulthan turon sabda
Neu meusabda Raja Ba’dan
Uleebalang deungoe dumna
Ta deungoe he Uleebalang
Dum sibarang raja raya
Nanggroe bahya rab ka datang
Bak lon beuklam leumah rahsia
Na nyum teuka Malek Beurahman
Ubak lama neu peuhaba
Na dua droe aneuk Sulthan
Nibak rangkang Pawang Rusa
Ta peukawen deungon Putroe
Meuhan nanggroe keunong bala
Meunyoe ta tueng nyan pih paloe
Kaoy Putroe goh seumpureuna
Teuma seuot Uleebalang
Ban nyang reumbang bak sarpada
Meunyoe han nyan pih paloe
Tutong nanggroe musem khueng teuka
Jinoe Tuanku beek jeut sukaran
Neutueng rijang aneuk raja
Meunyoe jicok le Harun Makam
Ta lawan prang raja raya
Keumah janji sapeu padan
Muda Seudang geutueng sigra
Keumah pakat Uleebalang
Teubiet u blang rakyat dumna
Rakyat rame hana macam
Panglima Prang meuploh laksa
Peut droe Meuntroe jak tueng bintang
Laen rakan preeh di sana
Na sikhan uroe geubeurjalan
Troh bak rangkang Pawang Rusa
Oh troh keunan ubak Pawang
Marit rijang le Peurdana
Na dua droe ureung dagang
Nibak rangkang ladang gata
Teuma seuot Teungku Pawang
Ka lam hutan tamong rimba
Bujang beungeh keu Lem Pawang
Pakon meunan buet di gata
Hana ta thee aneuk Sulthan
Muda Seudang nyan bandua
Meuntroe yue jak jih lam hutan
Buet han reumbang ta keurija
Ta puwoe keunoe pantah rijang
Ban Seudang nyan bandua
Lem Pawang jak that teumakot
Bak teuot jipeugot geumpa
Geujak u keue roh u likot
Hate teumakot Pawang Rusa
Pakon teuma jeut teumakot
Seubab neudhot le Peurdana
Neujak u keue ngieng u likot
Ka meusangkot ateuh rimba
Teutob gaki luka teuot
Siluweu rot han neukira
Oh sare troh bak Gumiran
Marit rijang Pawang Rusa
He Adek Cut Meuntroe Intan
Ta tueng Pawang dalam rimba
Seuot Banta teuma nyoe ban
Pakon meunan Pawang Rusa
Bagian 14
Han lon tunee ureung datang
Nibak rangkang na silaksa
Geudhot ulon meugurantang
Yoe lon tuan miseu geumpa
Teuma geutanyong le ureung nyan
Gata bintang geupareksa
Geuyue jak tueng bak ulon tuan
Tawoe rijang gata bandua
Keudeh tawoe ubak rangkang
Meuhan datang keunoe teuka
Banta seuot narit Pawang
Panee ureung wahe bapa
Han lon tunee wahe bintang
Nyum lon tuan rakan raja
Hana got deuh ulon pandang
Geuyue rijang jak tueng gata
Ban Banta deungoe narit meunan
Cok ngon parang geuwoe lanja
Oh sare troh ubak rangkang
Beudoh Bujang ji peumulia
Jibot jaroe dua tangan
Bak Gumiran ji meuhaba
Ampon Tuanku Syahi Alam
Lon surohan nibak Raja
Peurintah Raja Said Ba’dan
Ayah Tuan Ratna Indra
Neuyue jak tueng Syahi Alam
Bak ulon tuan pantah sigra
Beutroh jinoe le u dalam
Na sajan lon meuseureuta
Banta deungoe narit meunan
Seuot rijang Syah Gumiran
Han peu salah wahe abang
Ban nyang reumbang nibak gata
Teutapi na bacut lintang
Ulon tuan mante rimba
Nibak peunyuem ulon tuan
Neu surohan ubak raja
Neuyue tueng le Raja Ba’dan
Na piasan neukalon nyata
Siluweu brok sangkulok tan
Na miseu ban himbee rimba
Pakrie galak di Sulthan
Kulet badang sang lutong kra
Peukayan brok nibak badan
Piasan neu kalon liya
Teuma seuot Datok Bujang
Beek he meunan tanglong donya
Beuthat gob kheun keu piasan
Raja Ba’dan sangat suka
Dua lhee goe seunda wayang
Lem Pawang ulon calitra
Bujang marit ngon Gumiran
Lem Pawang meubleek-bleek mata
Ngon teumakot hai adoe jroh
Takot geupoh uleh raja
Susah meutamah bak neupike
Dalam hate Pawang Rusa
Teuma meunoe lom meulintah
Allah Allah rugoe raya
Ulon sidroe keunong tipee
Hana lon thee aneuk raja
Jikheun droe samblang geutah
Nyoe ka meugah raja nyang raya
Ulon tanyong kareuna Allah
Han geupeugah nyang sibeuna
Adak lon thee ureung meugah
Lon peuindah that mulia
Hana ulon yue jak ceumeucah
Beek that payah aneuk raja
Kadang ulon pih ek meugah
Seubab payah lon useuha
Jinoe pakrie buet ka leupah
Allah Allah rugoe raya
Ulon sidroe hana tuah
Ngon teulah apoeh keupala
Bagian 15
Pawang Rusa teutap teulah
Gumiran Syah lon calitra
Bujang peu-ek ateuh gajah
Syah Midan ngon Syah Gumiran
Deungon rakyat dum bahrullah
Jiwoe pantah ubak raja
Jipeeh tamboe palu geundrang
Arak Tuan Raja Muda
Ban sare troh u teungoh blang
Ampeung rijang Syah Gumiran
Jitot beude ngon meuriam
Muda Seudang ngon syeedara
Ateuh gajah meubalohan
U dalam peutamong lanja
Oh ka sampoe troh u dalam
Raja Ba’dan neutron lanja
Watee meurumpok ngon Muda Seudang
Neudrob rijang neucom neuwa
Gumiran Syah pih neu sujud
Bak teuot neuseumah raja
Teuma Raja mat bak jaroe
Neu puwoe Banta bandua
Mat bak jaroe Muda Seudang
Peu-ek rijang u Balee Raya
Geupeuduek bak keurusi intan
Hamparan meuh ngon peurmata
Raja-raja dum seukalian
Raja Ba’dan sajan seureuta
Ateuh keurusi dum sibarang
Hadap bintang Syah Gumiran
He Aneuk Cut Bungong Tanjong
Cut Tanglong Muda bahlia
Neujok bungkoh le Raja Ba’dan
Gumiran neusambot sigra
Pajoh ranub aneuk bak lon
Ranub leupong tawo buga
Beek ta kira he panyot tanglong
Kareuna ulon ureung hina
Teuma seuot bungong bakong
Sue meualon sang biola
Krue seumangat Daulat payong
Bak ulon ateuh jeumala
Na bak Daulat tan bak ulon
Umue peut thon ka lam rimba
Han peu aneuk pajoh bakong
Putik sukon bungong jeumpa
Di Syah Midan teuduek keudroe
Nyang that bakoe Syah Gumiran
Hana rancak bak meututo
Teuduek tahe hana haba
Keumang-keumang bungong kundo
Kuneng ijo bungong jeumpa
Cempala tujoh sikawan
Cicem subang poe meugisa
Oh lheuh ranub Muda Seudang
Bungkoh neupulang ubak raja
Teutap sinan Muda Seudang
Sajan Ba’dan Raja raya
Neungui suasa pudoe ngon intan
Meujampue sajan ngon meutia
Nyang bunoe kon seungab kalam
Han ek jan lon calitra
Bah le jinoe lon peuriwang
Geutot meuriam geunta donya
Jipeeh tamboe palu geundrang
Uleebalang hate suka
Rakyat jitron rab peunoh blang
Lewat surohan bak Raja-raja
U meulason teubee meu on
Jak bak ulon Daulat Raja
Raja suroh Uleebalang
Peu leubeehan peumulia
Han ek peugah dum piasan
Hingga malam uroe sinja
Geu peuhase lam meuligoe
Le Putroe Cut Lailan Indra
Bagian 16
Geuleung tika meuploh kudoe
Kasab sujoe meupeureuda
Di ateuh nyan kasoe tilam
Bak tidoran aneuk raja
Bantai suson tampok intan
Keurawang ngon kasab sutra
Lom geupeuduek ngon hamparan
Di ateuh nyan meuh geuteumpa
Aneuk langet di ateuh nyan
Tiree saja bandum lingka
Ayu-ayu dum geupasang
Manek intan ngon meutia
Sare hase sileungkapan
Buet Cut Intan Lailan Indra
Bak teumpat eh Muda Seudang
Raja Ba’dan peumulia
Teuduek siat kaso tilam
Raja Ba’dan neusalen Banta
Peukayan jroh peudoe intan
Han peu taulan lon calitra
Ulon piyoh dilee siat
Jaroe keurawat he Teungku beh
Teuduek siat Syahi Alam
Raja Ba’dan ngon Banta dua
Jinoe lon kisah Cut Bangsawan
Aneuk Lailan Ratna Indra
Ban jideungoe troh Cut Abang
Putroe Intan hate suka
Cit ka jithee buet Sulthan
Raja Ba’dan leumah rahsia
Habeh maklum dum sibarang
Peurbuatan Du jih Raja
Cit ka dilee ka geubrie pham
Raja Ba’dan keu Putroe Muda
Ka jingui le ngon peukayan
Peudoe intan ngon meutia
Seb keuh dumnan peudoe intan
Dudoe rakan lon calitra
Puliek pineung panca lugam
Masak plah nam muda plah dua
Jicok ranub boh lam bate
Ka hase Cut Ratna Indra
Jiboh ngon ie lam seurahi
Ngon srah gaki Syah Gumiran
Banta geupeu-ek u meuligoe
Aduen ngon adoe dua syeedara
Neujok ngon ie lam seurahi
Ngon srah gaki Syah Gumiran
Oh sare lheuh neusrah gaki
Laju neutitie u ateuh keuta
Keurusi meuh peudoe intan
Di ateuh nyan neuduek Banta
Oh neuduek di ateuh tilam
Ban buleun trang yoh purnama
Na sikeujab teuma dudoe
Ji tron Putroe jak seumapa
Ngon karah meuh nibak jaroe
Cut Putroe peutron keu Raja
Ka jiseumah nibak teuot
Puan jijok keu Cut Banta
Lheuh nyan teuma putik rambot
Langkah jisurot jibrie mulia
Hana kalam rot deh rot noe
Ji ek Putroe u istana
Oh sare troh u meuligoe
Jiduek keudroe ateuh keuta
Teuduek siat Tuan Putroe
Di seuramoe lon calitra
Geubeuot le ngon makanan
Di likot nyan idang raya
Ka geubeuot deungon jaroe
Di seuramoe ureung tuha
Peusinget gupet basah jaroe
Makeun samlakoe bu ngon sira
Kru seumangat Teungku Meuntroe
Bak kamoe ateuh jeumala
Bagian 17
Cit beusigoe sajan kamoe
Peurab keunoe makeun sama
Han peu salah bungong geutoe
Di kamoe baro ban leungka
Gumiran Syah neurah jaroe
Nekmat katroe taci rasa
Neu pajoh bu sibuju jaroe
Makeun ngon droe ngon syeedara
Oh lheuh makeun Uleebalang
Pinah idang le Peurdana
Lheuh nyan teuma peudoe intan
Duek bak tilam kaso sutra
Peukayan meuh nibak badan
Miseu intan na bandua
Bandua indah hana ban
Nyang leubeehan Syah Gumiran
Nibak rupa oh ta pandang
Han tiwasan nibak mata
Teutapi na bacut alang
Di Syah Midan kureung bahsa
Habeh teungeut lam meuligoe
Dum sinaroe Raja-raja
Ngon dendayang sikureung droe
Sajan Putroe Ratna Indra
Banta neu-eh di seuramoe
Cut Putroe di dalam kama
Habeh teungeut dum sinaroe
Jaga sidroe Putroe Muda
Lawet lawan teuma dudoe
Di sinoe na bacut haba
Ratna Indra lam meuligoe
Di seuramoe Syah Gumiran
Hana teungeut Tuan Putroe
Hate wawoe dalam dada
Seubab Banta na dua droe
Tuan Putroe hate gila
Bak jikira tanglong nanggroe
Ka na lakoe Ratna Indra
Teutapi hana lom meusoe
Meuhat sidroe dalam dua
Meunyoe ek leupah hajat sampoe
Teutap Putroe troh an tuha
Meuhan leupah wahe adoe
Ka na lakoe bak jikira
Han seungab hate bungong geutoe
Ji takot paloe akhe masa
Kadang han ek geu peusampoe
Hajat kamoe bak Aulia
Kareuna Raja Harun Makam
Meugah han ban ateuh donya
Meunyoe han ek geulawan prang
Ulon tuan that seungsara
Kadang-kadang teuma geuwoe
Tinggai kamoe tok seulamanya
Kareuna janji hana sampoe
Lon yue ek keunoe lam istana
Bah lon marit kaman jinoe
Deungon kamoe Syah Gumiran
Tajak beutroh taeu keudroe
Beek jeut rugoe teulah raya
Meunan pike Tuan Putroe
Teuma dudoe meunoe kira
Teutapi na bacut paloe
Malee kamoe buka haba
Kareuna gobnyan ban trok baroe
Teuma meunoe lom jikira
Meunyoe malee bak ta peugoe
Meuhat dudoe deuk ta rasa
Meunan pike bungong kumbee
Peu lon malee gobnyan dua
Meukon ulon yue ek keunoe
Han ek sampoe dum peukara
Geuploh bungkoh di seuramoe
Cut Putroe keuting ceurana
Di Cut Banta ube buet droe
Kon ngon Putroe geumeuseunda
Bagian 18
Pajoh ranub Syah Gumiran
Cut Intan hana le haba
Geukue bungkoh di seuramoe
Cut Putroe buka ceureupa
Geunap lhee seun lageum Cut Ti
Neu tupeue le Syah Gumiran
Rot deh rot noe ban dua si
Peungaroe lisek lagoina
Syah Midan eh han beurheunti
Han neutukri reusam Banta
Tarek bantai eh Gumiran
Cut Intan hana le haba
Yoh awai phon hana wayang
Dudoe Tuan neumeuseunda
Cit neusaja Muda Seudang
Putroe ragam Ratna Indra
Eh Gumiran nyang badui
Putroe Ti nyang lisek raya
Po Banta ka jamok pajoh
Cut Haloh ka pijet seuba
Bandua droe sabe utoh
Miseu puyoh ngon cempala
Syah Gumiran peuhah limbot
Putroe Cut ji gulong tika
Cit neusaja Banta Saidi
Neukalon krie Putroe Muda
Cut Putroe hana jeut tacie
Narit takwi ji tupeu makna
Banta Muda ka neutik gaki
Putroe Ti ka jiseumpom pha
Teuma neu eh Syah Gumiran
Cut Intan neubeudoh lanja
Bandum lageum wahe abang
Dumpeu trang neutupeu bahsa
Meupeu lageum meukrie macam
Meupeu lagham dalam bahsa
Nyan dum digob geumeuwayang
Di Syah Midan neu tupeu hana
Ratna Indra nyang badui
Nyang pancuri Syah Gumiran
Dalam hate Putroe Bintang
Na nyum sangka reuloh donya
Nyang jeut meunan wahe abang
Malee Bintang buka haba
Han geutem ek euntreuk kadang
Malee Tuan deungon Banta
Beuthat pih meunan lon meukalam
Kri nyang reumbang euntreuk teuma
Putroe jibeut ngon hikeumat
Pansan rakyat troh bak Raja
Nyang ta teungeut ureung lhee droe
Cut Putroe jibuka haba
Tangah u langet jileung jaroe
Teuma dudoe meu seumpeuna
Ya Illahi waya Rabbi
Po lon neubrie ban lon pinta
Bijeeh lon tanom beumeujadi
Pucok neubrie beumeucula
Lheuh nyan teuma rahob jaroe
Jikheun meunoe sikrak haba
Bak rubek gle papeun peutoe
Kayee jatoe papeun behtra
Neu ek Cut Abang u meuligoe
Intan pudoe tanyong haba
Meunan jikheun buleun peunoh
Ka mehmoh lam hate Banta
Syah Midan neu ceunggok ulee
Baro neuthee Putroe meuhaba
Nyang bunoe kon hana neutupeu
Hana neuthee dum nan seunda
Beuthat pih meunan hana neuseuot
Neutarek limbot neupet ngon mata
Han jeut balah di Syah Midan
Syah Gumiran neuseuot sigra
Han lon jeut ek wahe sambinoe
Kareuna kamoe jamee ban teuka
Bagian 19
Ban Putroe deungoe haba meunan
Lom jimarit miseu nyang ka
Bak meuluweuk timong di gunong
Behtra tamong sijudo dua
Neu ek Cut Bang u rumoh inong
Lon meutanyong sipatah haba
Ban Banta deungoe Putroe taleh
Cit ka teupreh dum geusahja
Meurante timoh di gunong
Anyot bungong u kuala
Han lon jeut ek u rumoh inong
Salah meukeunong bak teumpat gata
Keumang-keumang bungong rihat
Nyang mirah that bungong jeumpa
Tuanku ek keunoe siat
Na peu hajat tanyong hamba
Pulo pinang manok meususoh
Di Meulaboh na Geudong Cina
Meuna hajat neu marit ngon lon
Keunoe ta tron sikleb mata
Teuma seuot Panyot Tanglong
Ngon panton sikrak ji kata
Bateung rubek gunong kayee lhon
Urot rambong pucok Krueng Woyla
Pucok Krueng Jantho batang keumunyan
Kayee di sinan dum bak sala
Lon yue tron keunoe tayue ek keunan
Beuizin Intan dilon kugisa
Bukon sayang ureung teumarah
Baling patah papeun binasa
Yoh di gampong neutem meulangkah
Oh sampoe sudah neu keumeung gisa
Ureung tak geutah geutueng keu bohbhan
Ureung suet lulan geurawe sutra
Nibak cut meugleung bak peunyum lon
Sang sang ulon hana mulia
Krue seumangat Cut Abang payong
Mulia bak lon Tuanku Raja
Meunyoe meunan he adek payong
Pakon han ta tron meusikleb mata
Lagi kamoe ureung meudagang
Patot Intan gata jak sapa
Ban Putroe deungoe haba meunan
Teupike yoh nyan Ratna Indra
Bahle lon tron jinoe kaman
Neu ek pih han Banta Muda
Meunan pike putik rambot
Peu lon takot gobnyan dua
Rasa cit patot lon puteuntee
Dengon jamee nyang that mulia
Sapa jamee roh buet sunat
Nabi Muhammad nyang meusabda
Soe nyang pubuet ban amanat
Uroe akhirat raya that pahla
Meunan pike puteh lumat
Lalu jimat ngon ceurana
Cok dandawan mat bak jaroe
Suliek jinoe pineung muda
Suliek pineung panca lugam
Masak plah nam muda plah dua
Ji cok ranub jikoh tangke
Ka jiboh le lam ceurana
Cok keurandam peuneugot Syam
Keurawang intan ngon meutia
Cok keutumbu dua judo
Baro-baro ban lheuh geuteumpa
Saboh keutumbu boh jeumuju
Saboh keutumbu boeh boh pala
Saboh keutumbu bungong lawang
Ji rancang ngon gapu naga
Jiboh ranub surang sareng
Sang geurubeng papeun behtra
Teuma jicok bungong lawang
Jilayang bak pineung muda
Keuieng leunteng baho keumang
Ji meugeutang ngon ija sutra
Bagian 20
Oh ta kalon indah han ban
Sang lakuan Gaseng Jawa
Ranub kuneng jroh peureuseh
Ji pileh le Putroe Muda
Tangieng u yueb tangke han deuh
Tangieng u ateuh tangke hana
Maken tangieng samat teungoh
Han ta tu’oh mita punca
Teuma jicok bungong lawang
Ji labang ban siseun lingka
Pineung muda dum jipateng
Ji puseng bakong meulila
Di Aceh kon tanggoe u Kleng
Hana bandeng ngon ta peusa
Jicok bacut minyeuk gahru
Jilabo bak on ranub teuma
Rot luwa keureutah teucang
Jikarang bungong peureuda
Ngon karah meuh sang jilinggang
Buet Cut Intan Ratna Indra
Ji keumeung brie keu Cut Abang
Cut Intan hate jih suka
Sare hase seuleungkapan
Cut Intan peutoe jibuka
Jicok kunci mat bak jaroe
Ceu’iet peutoe ka jibuka
Buka peutoe ceu’at ceu’iet
Mita bit bit bajee ija
Teuma jicok ngon peukaian
That analan Ratna Indra
Cok siluweu meuseulimpok
Ka jisok bajee meudobma
Ngon ija plang naw’ak Cut Ti
Pirak sandi meuh suasa
Ija pinggang meuh peulangi
Dan lagi meukasab rupa
Sok gleung jaroe ngon gleung gaki
Beurahi Cut Ratna Indra
Soe nyang kalon dum beurahi
Dan lagi hate jih gila
Jisok subang mata intan
Meujeureulang peungeuh u muka
Soe nyang kalon reubah pansan
Hana jan trang taeu rupa
Ngon euntuek meuh tujoh taloe
Bak takue Cut Ratna Indra
Bhan keuieng patam bak dhoe
Bak jaroe ikai meugeunta
Soe nyang kalon cit ka paloe
Seupot uroe han jikira
Keuruncong meuh jaroe gaki
Juhari intan meutia
Soe nyang kalon dum beurahi
Beuthat Sufi pih ek hawa
Sare hase dum sinaroe
Cok bak jaroe puan meuceuntra
Teuma jitron u seuramoe
Cut Putroe jijak seumapa
Jitop ulee ngon ija burak
Keu ija sawak peulangi Jawa
Ngon karah meuh nibak jaroe
Cut Putroe jitron le lanja
Na teuh keunoe he Teungku e
Saweu judo adek nyang hina
Syah Gumiran seuot meunoe
Neu deungoe Putroe meusuara
Hijo hijo naleung sambo
Hijo biro naleung komkomma
Dengoe adek Darabaro
Nyoe Po Linto balah haba
Puteh kuneng hijo biro
Prak ike sijudo dua
Na bu kamoe he adek e
Saweu judo Ratna Indra
Di langet na bintang sawo
Nyang leubeh hu bintang kala
Bagian 21
Teutapi adek hana got ato
Kamoe Banta tron di rimba
Bungong peukan cabeung bak meulu
Ranub sigapu dalam ceurana
Krue seumangat Daulat Tuanku
Bak gob bantu bak lon raja
Lheuh jisapa bungong kundo
Peurab laju Putroe Muda
Putroe seumah nibak teuot
Banta sambot ngon tangannya
Di Syah Midan nyum teumakot
Dalam limbot neubeudoh hana
Syah Midan eh teungeut keudroe
Adek ngon Putroe neumeujaga
Lheuh ji seumah putik rambot
Jaroe jibot ateuh Banta
Lheuh nyan teuma Putroe surot
Meunan patot that mulia
Na lhee langkah Putroe surot
Cut Bintang rhot duek bak tika
Oh lheuh ta sapa adek ta surot
Pakrie lon sambot suara gata
Aneuk cicem cut ji tron u bumoe
Meureubok manoe dalam cintra
Krue seumangat tanglong nanggroe
Nibak kamoe ateuh jeumala
Lom jiseuot Syah Gumiran
Deungoe Intan lon calitra
Nama nanggroe Palimbang Syam
Usman Juhan Du lon Raja
Nama bunda Cut Budiman
Syah Midan aduen nyang tuha
Nama ulon Syah Gumiran
Cut Intan ka lon calitra
Dilon hai Nyak ka lon peugah nan
Gata Intan soe beunama
Peu nan nanggroe geuboh nan
Ayah tuan deungon bunda
Ban jideungoe haba meunan
Seuot yoh nyan Ratna Indra
Ka neutanyong lon hareutoe
Nama nanggroe Padang Anta
Ayah ulon Raja Ba’dan
Indra lailan nama bunda
Nama ulon Po Janjongan
Ayah hoi nan Ratna Indra
Rot deh rot noe han le kalam
Seungab yoh nyan sikutika
Na sikeujab lheuh nibak nyan
Cut Intan lagi meuhaba
Nyang jeut lon tron keunoe hai duli
Hati beurahi dilon keu gata
Takoh bak u peugot meunasah
Beugot ta tarah rungka ngon bara
Lon eue Tuanku hana susah
Hana le gundah hate lam dada
Ban neudeungoe haba meunan
Neu jaweub yoh nyan pantah sigra
E adek cutbungong rihan
Dilon pih meunan ban kheun gata
Kapai meulayeu laot beuladeh
‘Alam pih meuceh alamat Raja
Ulon eue gata bintang peureuseh
Hate nyang peudeh hana le luka
Aneuk beurangoe datang u pasi
Mirahpati datang u rimba
Jinoe he adek ulon meujanji
Dilon beurahi hate keu gata
Ratna Indra teuma marit
Haba nyang bit ulon calitra
Aneuk guda plang guda peulangi
Guda jinari di teungoh data
Jinoe Cut Abang ulon meujanji
Pakrie hai duli ka nibak gata
Teuma seuot Muda Samlakoe
Pakrie Adoe ulon calitra
Bagian 22
Seubab kamoe na dua droe
Beujeut sidroe dalam dua
Ta deungoe he puteh licen
Beujeut meukawen deungon gata
Teuma seuot puteh licen
Rupa canden ban meutia
Kadang ubah uroe dudoe
Tinggai kamoe ta jak gata
Hana ubah wahe e adoe
Meugoh sampoe nyawong keulua
Seulama goh janji sampoe
Kamoe dua droe han meugisa
Keumah pakat janji sampoe
Ji ek Putroe dalam istana
Hingga faja suboh uroe
Lam meuligoe habeh jaga
Teuduek siat Banta ngon Putroe
Raja Nanggroe lon calitra
Amma ba’du teungku nanggroe
Limong ngon nyoe ka sampureuna
Raja neutron di meuligoe
Neu ek jinoe bak Balee Raya
Na sikeujab teuma dudoe
Troh sampoe Teungku Peurdana
Cit ka janji malam baroe
Beungoh uroe beutroh teuka
Meugoh nikah Tuan Putroe
Hana jeut woe rakyat dumna
Habeh bandum ka meusapat
Peuduek pakat raja raya
Teuma tron sabda bak Sulthan
Nibak Ba’dan raja raya
Ta deungoe jinaoe hai Uleebalang
Dum sibarang raja raya
Jinoe gata duek musyawarat
Ta meupakat buet keurija
Pakrie ta ubuet nyang atoran
Krie nyang reumbang nibak gata
Kareuna ulon teungoh susah
Putroe indah goh lheuh naza
Seulama goh hajat sampoe
Han jeut kheun droe meukeurija
Nibak pike ulon tuan
Akhe zaman jeut binasa
Ta peunikah mantong jinoe
Bah le dudoe ta meukeurija
Beuthat pih meunan he Uleebalang
Dum sibarang Raja-raja
Ampon Tuanku Daulat Ampon
Kamoe seuon mangat saka
Ban nyang nafsu syahi alam
Nyang mee geunggam alam donya
Ohn raja deungoe narit meunan
Syahi alam sukacita
Sapeu pakat dum geusare
Putroe Ti hana keurija
Peu keuh seubab tanglong nanggroe
Seubab Putroe goh lheuh naza
Teuduek oh nan saboh ulah
Gumiran Syah lon peugisa
Gumiran kheun bak Syah Midan
Deungoe lon tuan he Kakanda
Lon meutanyong sikrak kalam
Kheun beurijang lon deungoe nyata
Teuma seuot le Syah Midan
Han peu tuan he syeedara
Droe neuh jinoe lon peukawen
Beek han neutem he Kakanda
Syah Midan neuseuot meunoe
Na di kamoe toh di gata
Beek neukira keulon sidroe
Bah le dudoe tajak mita
Teuma seuot le Syah Midan
Hom hai intan ban kheun gata
Han lon dawa he samlakoe
Deungon kamoe lisek gata
Bagian 23
Teungoh-teungoh neu meukalam
Troh utosan nibak Raja
Neuyue jak tueng nibak bujang
Muda Seudang cit nyan dua
Troh le keunan u hadapan
Hadap Juhan nibak raja
Lheuh nibak nyan teuma dudoe
Marit jinoe raja raya
He aneuk Cut Muda Seudang
Lon meukalam deungon gata
Banta seuot Insya Allah
Han peu salah Po Meukuta
Pat gampong peu nan nanggroe
Cuba Samlakoe jinoe calitra
Soe nan ayah deungon ibu
Soe nan Teungku dua gata
Teuma seuot Bungong Tanjong
Ban nyang hukom Po Meukuta
Nama nanggroe Palimbang Syam
Usman Juhan Du lon Raja
Nama ulon Syah Gumiran
Syah Midan aduen nyang tuha
Kareuna kamoe hukom Daulat
Ban nyang hajat neukaranya
Ban Raja deungoe narit meunan
Suka han ban Poteuraja
Raja tanyong lom sipatah
Soe meunikah gata dua
Teuma seuot Syah Gumiran
Syah Midan nyang aduen hamba
Gumiran cok dalam bajee
Keu jeunamee jok keu Raja
Areuta neubrie bak Beurahman
Manikam ube boh u na
Banta jok le keu Raja Ba’dan
Syahi Alam kalon rupa
Ban neukalon ma’anikam
Tahe mandang Raja raya
Pane jitueng meunoe macam
Meukon ureung sangat kaya
Harga yum adat ta publoe
Siploh nanggroe goh lom padra
Dalam hate Raja Nanggroe
Meuhan nyonyoe Raja nyang raya
Meunan pike Raja siat
Neuhoi leugat ngon Panita
Nama Teungku Syiah Abdullah
Nyang peunikah Raja nyang raya
Raja peujok ubak Syiah
Neu peuleumah kalon rupa
Poteuraja neu wakilah
Neu peunikah aneuk Raja
Ratna Indra Teungku Syiah
Neu peunikah deungon Banta
Teungku seuot Insya Allah
Han peu salah Po Meukuta
Ka neucok ie neusrah babah
Teungku Syiah neubaca do’a
Lheuh nyan neukheun ngon Bismillah
Alhamdulillah phon neubaca
Ratna Indra putroe indah
Lon peunikah keu Meukuta
Teuma seuot Syah Midan sah
Insya Allah kaboi hamba
Akad nikah ka seuleusoe
Geupeu ek jinoe dalam istana
Cit ka hase dum sinaroe
Han peu adoe lon calitra
Linto geupeu ek u meuligoe
Geupeu jaroe ubak Maja
Oh sare troh lam meuligoe
Beudoh Putroe peumulia
Banta geupeuduek ateuh tilam
Ngon intan Cut Ratna Indra
Rot wie bantai jipeuduek Putroe
Dendayang sinaroe ngadap lingka
Bagian 24
Na sikeujab Banta sinan
Beudoh Intan jak leung tika
Geulhom tiree geuleung tilam
Sampoe troh oh nan tamat haba
Syah Midan teutap ngon Putroe
Nyang adoe sajan Baginda
Padum na treb teuma dudoe
Lam meuligoe meuseu suka
Na keuh umue lhee ploh uroe
Teuma dudoe lawet lawan
Lom meututo guree hamba
Poteuraja pangge Bujang
Troh le keunan ji peuteuka
Ubak Raja Said Ba’dan
Jibot jaroe di jeumala
Suroh Raja tot meuriam
Ban Bujang deungoe meunan sabda
Jimat lanja le ngon tunam
Dua jaroe ka jiangkat
Ampon Daulat Syahi Alam
Teuma jitot beude nubat
Ji tron rakyat Uleebalang
Dua jaroe ka ji angkat
Am pon Daulat Meukuta Alam
Peu ek seumbah dum Peutua
Turon sabda bak Sulthan
Ta deungoe he dum Bentara
Peutua Meuntroe ngon Bujang
Laen bak nyan dum lasyeuka
Tuha muda beusa seudang
Ulon han le kumat nanggroe
Ta gantoe Banta Syah Midan
Kareuna lon umue rab sampoe
Geuliyueng tuloe mata lon klam
Taboh laen keu geulantoe
Judo Putroe keu Sulthan
Laen nibak nyan lon hareutoe
Kaoy Putroe goh sampureuna
Oh lheuh taboh Raja Nanggroe
Teuma dudoe ta beujalan
Nyan keuh narit nibak kamoe
Pakrie jinoe Uleebalang
Teuma seuot Bujang Meuntroe
Ampon kamoe Po Janjongan
Patot Tuanku neuboh geulantoe
Judo Putroe cahya intan
Hate suka dum sinaroe
Beek le jiwoe dom di sinan
Teutapi Duli beek le laloe
Bak kamoe abeh that got meunan
Kareuna rakyat dum sinaroe
Ngon siuroe nyoe le rijang
Ban Raja deungoe haba Meuntroe
Po Samlakoe neupangge rijang
Troh le keunan geubot jaroe
Ampon kamoe Syahi Alam
Raja yue duek bak keurusi
Dan lagi ateuh hamparan
Banta neuduek ateuh keuta
Marit Raja Said Ba’dan
Wahe aneuk bijeeh mata
Ta deungoe haba sikrak kalam
Lon meupeugah saboh haba
Ban dua gata wahe intan
Teuma seuot Syah Gumiran
Nibak hamba hana larang
Peu na hajat neucalitra
Kamoe dua soe peutimang
Ban Raja deungoe meunan haba
Turon sabda nibak Ba’dan
Kareuna ulon uroe ‘Asha
Umue tuha akai hilang
Han ek leumah le bicara
Hate buta mata lon klam
Hajat ulon e Bentara
Lon boh gata keu Sulthan
Bagian 25
Teuma seuot Syah Gumiran
Ban nyang suka Po Janjongan
Peu nyang hajat Po Meukuta
Kamoe dua nyang teurimong
Teuma seuot Raja raya
Gata dua he buleun trang
Soe keuh nyang mat nyan neuraca
Kheun beusigra wahe intan
Teuma seuot Syah Gumiran
Aduen hamba keu Sulthan
Ban Raja deungoe meunan kata
Hate suka hana lawan
Uleebalang dum meupakat
Ka geu daulat le Syah Midan
Neubrie salen uleh Raja
Kulah kama kreh meudolang
Teuma geucok Muda Samlakoe
Geuba jinoe ubak Ragam
Kulah kama geu peuseuon
Geuhoi Ampon dum sibarang
Rakyat jiduek dum meususon
Nyang daulat phon Said Ba’dan
Lheuh nyan teuma Teungku Kadhi
Bujang Meuntri Uleebalang
Maseng-maseng ban nyang babat
Teuma raklyat di likot nyan
Lheuh geudaulat teuma geusurot
Meunan patot wahe abang
Geu peusunteng ngon buleukat
Meunan adat deungon reusam
Lheuh geudaulat seuon jaroe
Teuma dudoe geubalek nan
Syah Midan rupa juhari
Peugang Nanggri Padang Shafaran
Seukandan Diwa nama Duli
Nan geurasi Diwa Seukandan
Teuma geutot beude nubat
Alamat geuboh Sulthan
Geutot beude tujoh seun tujoh
Raja geuboh Diwa Seukandan
Lheuh nyan teuma ka seuleusoe
Teutap oh noe saboh syahdan
Raja ka neu ek u meuligoe
Ubak Putroe cahya intan
Habeh bandum ka seuleusoe
Raja Nanggroe neu seumulang
Laen jinoe lon hareutoe
Kaoy Putroe geu meupadan
Cit ka hase dum sinaroe
Han peu adoe lon atoran
Cit ka dilee geu bicara
Jinoe lanja geu beujalan
Uleebalang ngon Bentara
Peutua Meuntroe ngon Bujang
Laen rakyat dum meulaksa
Lasyeuka deungon Pahlawan
Han ek peugah he syeedara
Lom Peutua meuploh kawan
Dengon alat dum seunjata
Tumbak khanja ngon seunapan
Nyang Pahlawan gulam cokma
Nyang Panglima dum geudubang
Nyang di rakyat tumbak khanja
Laen teuma sikin panyang
Han ek habeh lon calitra
Le that tantra Diwa Seukandan
Nyang jeut le that geuba tantra
Geuthee bala akhe datang
Ka neu tupeu le Baginda
Ji sangga le Harun Makam
Teuduek siat nyang di lua
Lam istana lon peuriwang
Cit ka hase si anika
Ratna Indra Putroe Seudang
Ngon Dendayang sikureung droe
Ma Putroe Cut Indra Lailan
Bagian 26
Laen nibak nyan dum sinaroe
Dalam Nanggroe Padang Shafaran
Judo Raja judo Meuntroe
Meugleung jaroe ikai subang
Habeh bandum sajan Putroe
Hana sidroe nyang tinggalan
Keumah hase dum sinaroe
Ji tron jinoe bungong peukan
Ngon Dendayang sikureung droe
Ireng Putroe aneuk Ba’dan
Oh sare troh u leun meuligoe
Dum sinaroe dong meurintang
Teuduek siat Tuan Putroe
Ulon puwoe Diwa Seukandan
Raja neutron di meuligoe
Deungon adoe Syah Gumiran
Di likot nyan Raja Nanggroe
Neutron dudoe Said Ba’dan
Oh troh keunan u leun meuligoe
Neu ek jinoe ateuh kandran
Said Ba’dan ateuh guda
Seukandan Diwa gajah balohan
Gumiran Syah teudong keudroe
Bah le dudoe lon karangan
Nyoe lon peugah Tuan Putroe
Dum sinaroe ngon Dendayang
Ateuh gajah nyang seureuloe
Ban siploh droe saban-saban
Siploh kandran nyan siploh droe
Indah han soe meubalohan
Judo Geusyik judo Meuntroe
Sajan Putroe Indra Lailan
Meuhat-meuhat dum siploh droe
Ta deungoe adoe lon atoran
Siploh gajah ureung binoe
Sireutoh droe judo Sulthan
Laen nibak nyan ureung lakoe
Dum sinaroe Uleebalang
Rakyat teudong dum meuriti
Teubagi lhee boh pasukan
Di Raja Ba’dan saboh tantra
Seukandan Diwa saboh kawan
Judo Raja judo Meuntroe
Sajan Putroe meupasukan
Bak keunira puteh leusoh
Dua reutoh gajah balohan
Sare hase dum sinaroe
Teuma dudoe geubeujalan
Nyang jak dilee Tuan Putroe
Ureung binoe dum sibarang
Di likot nyan teuma dudoe
Ayah Putroe Said Ba’dan
Deungon rakyat meuploh katoe
Lapan ploh droe gajah balohan
Nyang di likot Raja Nanggroe
Judo Putroe Diwa Seukandan
Teuma geutot beude nubat
Alamat bungka Sulthan
Rakyat teubiet dum meubulak
Ka meusak-sak sang peunoh blang
Jipeeh tambo ngon geudeumbak
Ji arak Putroe Bangsawan
Rakyat bungka lhee teuratak
Sira geujak meupiasan
Gong ngon geundrang tambo nafiri
Keucapi deungon hareudam
Sangkaikala ka meubunyi
Nibak sagi Panglima Prang
Keumang payong dum ka meukri
Ureung nanggri nyang meupiasan
Rakyat jijak jroh meuriti
Meuceuradi pudoe intan
Ji yop suleng deungon bangsi
Teuma meu’i’i suara gambang
Ladom ta eue ji meutangkeh
Ji peubareh beude seunapan
Bagian 27
Ladom ta eue jimeung anjak
Ji surak bagoe geulumbang
Rakyat bandum hate galak
Nyang gunjak bak teumpat Beurahman
Jimat ‘alam ngon pupanji
Ji peunari dalam kawan
Rakyat bandum that beurani
Teumasok Duli ngon Panglima Prang
Geujak peulheuh kaoy Cut Ti
Aneuk Duli Said Ba’dan
Watee malam geubereunti
Singoh lagi geu beurjalan
Uroe malam hana khali
Ureung nanggri ji meupiasan
Oh jula malam rakyat dum eh
Oh mureh beudoh beurjalan
Meunan-meunan wahe wareh
Han ek habeh ulon karang
Raja bungka dengon Putroe
Geunap uroe dalam shafaran
Limong buleun neucre nanggroe
Troh sampoe u Tasek Alam
Raja ka troh bak ceu nanggroe
Laen jinoe lon karangan
Amma ba’du laen bagoe
Nam boh ngon nyoe nyang ka simpan
Teuma nyang nam deungoe lon peugah
Lon puwoe kisah ke Harun Makam
Said Ba’dan neumeulangkah
Ka meugah bak Syahi Alam
Deungon aneuk Ratna Indra
Sajan Poma Indra lailan
Di likot nyan Seukandan Diwa
Meulintee Raja Said Ba’dan
Ngon pahlawan meuploh laksa
Bentara Meuntroe ngon Bujang
Sireutoh droe Putroe Muda
Judo Raja Padang Shafaran
Bandum judo Raja-raja
Muda-muda meugleung subang
Na baro troh bak ceu nanggroe
Goh lom sampoe Tasek Alam
Ban ji tupeu geuba han soe
Galak tuloe Harun Makam
Cit dilee kon jimeu naza
Hana paksa goh lom reumbang
Nyangka keumeung prang geupuga
Ji tron paksa keunong bintang
Riyeuk di laot hantom reuda
Goh lom teuka ribot tajam
Nyoe nyangka roh sabe padra
Seukandan Diwa ngon Harun Makam
Reudok di gle hantom teudoh
Ujeun han troh keunoe u blang
Nyang dilee kon cit lam teudoh
Keumeung runtoh Tasek Alam
Sulthan Harun neukrah rakyat
Ka meusapat dum Uleebalang
Han ek peugah wahe adoe
Limong ploh droe nyang pahlawan
Jeup-jeup kuta geyue pasoe
Jipreeh Putroe keunan datang
Han peu adek lon hareutoe
Dilee Putroe kalon kheun ban
Nyoe lon peugah kuta geupasoe
Kuta sagoe kuta reuntang
Di keu kuta tanglong nanggroe
Deungoe lon kheun proe wahe abang
Han that jeuoh Poma Putroe
Sikhan uroe pasang guda
Geukueh uruek dum meubanja
Limong ploh dua jroeh meureuntang
Meunan suroh nibak Raja
Rot neubungka Said Ba’dan
Di dalam blang maha cina
Di sana suroh Sulthan
Bagian 28
Han peu peugah misue kuta
Hana raya deungon panyang
Teuma di ateuh han silala
Lam uroe kha ka meuteuntang
Tanoh geuboh pih tan meupat
Beek meubakat deuh geupandang
Di ateuh nyan tanoh geuboh
Di baroh papeun geulabang
Luah uruek puteh leusoh
Jeut sireutoh geuduek urang
Rakyat peunoh bandum sunggoh
Meunan suroh Harun Makam
Nyang dilee kon cit Meukuta
Hana raya cit uruek nyan
Oh geudeungoe rab troh Raja
Peugot lanja dum geudong nyan
Nyang jeut meunan geupeurintah
Beek meugah bak ureung datang
Hingga leungka dum sinaroe
Geupasoe rakyat dum keunan
Saboh geudong wahe adoe
Geupasoe sidroe pahlawan
Sikureung ploh sidroe peutua
Geupasoe lanja Panglima Prang
Bak lon pike sireutoh uroe
Nyang sidroe meuhat pahlawan
Nyang ban bandum keubai beusoe
Lhe peut ploh droe ek jimeucang
Jeup-jeup geudong ureung ka doe
Sireutoh droe ngon pahlawan
Bak bineh rot dum meubanja
Limong ploh dua jroh meureuntang
Deungoe jinoe lon calitra
Panglima deungon pahlawan
Limong ribee dua reutoh
He adek beh Panglima Prang
Teuma dudoe lam limong ploh
Teungoh lhee reutoh ngon pahlawan
Dalam geudong bandum geuboh
Siap jipreeh troh Raja datang
Teutap di sinan hana kiroh
Jinoe lon boh laen macam
Bukon sayang putik pawoh
Ureung mat buloh sutra geuilang
Ta deungoe he Tuanku beh
Aneuk Meulaboh nyang peu kabaran
Ban nyang geukheun nyoe ulon boh
Hana haloih hana panyang
Manyang-manyang teupi paloh
Aneuk peuyoh dalam kubang
Nyang bunoe kon lon peuteudoh
Teungoh lon boh Harun Makam
Amma ba’du Ampon Duli
Teungoh peureugi Diwa Seukandan
Limong buleun limong uroe
Troh bak nanggroe Harun Makam
Si uroe treuk jeuoh Shafaran
Ngon Aulia bak nanggroe nyan
Teukeudi Allah Tuhan nyang Esa
Deungoe Cut Da narit laman
Troh bak padang nyang that raya
Nanggroe Raja Tasek Alam
Raja Ba’dan beurangkat lanja
Dum na tantra Diwa Seukandan
Geungieng ureung han sidroe na
Leugat lanja geuberjalan
Nyang jak dilee kawan Putroe
Ureung binoe dum sibarang
Di likot nyan ayah Putroe
Dum sinaroe Panglima Prang
Nyang di likot judo Putroe
Raja Nanggroe Diwa Seukandan
Meuhat jarak wahe adoe
Sikhan uroe ta beurjalan
Kareuna seubab dalam padang
Sang-sang rab oh tapandang
Bagian 29
Oh nan jarak wahe abang
Siteuntang tangieng ngon mata
Ban sare troh dalam padang
Putroe Intan jipoh lawa
Siploh gajah meubalohan
Indra Lailan Ratna Indra
Jingieng ureung tan meubayang
Nyang jeut intan hana liya
Lagi Teungku dalam padang
Deuh ji pandang dumna tantra
Padang luah wahe adoe
Sikhan uroe ta pasang guda
Neujak pantah Tuan Putroe
Tutong uroe han sapat bla
Poteuraja hana neutham
Cut Intan ji pasang guda
Sabe leumah deuh neupandang
Dalam padang peungeuh raya
Sabe keuh deuh Raja pandang
Di dalam blang han tantra
Mantong jeuoh kuta nanggroe
Gohlom sampoe keunan teuka
Nibak pike Raja Ba’dan
Hana lawan di rot Raja
Limong buleun geu beurjalan
Hana leuntang sikleep mata
Gohlom sampoe bak pikeran
Harun Makam peudom tantra
Said Ba’dan hana neuthee
Keunong tipee uleh Raja
Nyan keuh seubab jeut meupaloe
Seubab Putroe neupoh lawa
Ka oh nan kada Tuhan Sidroe
Di Tuan Putroe keunong bala
Hingga troh u teungoh padang
Deungoe abang lon calitra
Jaga-jaga di dalam blang
Harun Makam nyang eumpunya
Dalam geudong dum sinaroe
Pahlawan nyoe limong ploh dua
Ka jibeudoh dum sibarang
Meureuntang jidong meubanja
Tuan Putroe leupah jalan
Di beulakang tinggai tantra
Ban Putroe eue ka meureuntang
Indra Lailan srot ie muka
Tuan Putroe keumeung riwang
Ka jitawan uleh lasyeuka
Seubab ka roh u hadapan
Di beulakang teudong tantra
Tantra Raja Said Ba’dan
Goh troh datang keunan teuka
Han that jeuoh wahe abang
Deuh ta pandang siteuntang mata
Ban Raja eue teudong lawan
Tahe mandang sikutika
Bunoe hana deuh lon pandang
Pane urang keunan teuka
Paleh tahe Raja mandang
Raja Ba’dan jinoe meusabda
Ta deungoe he Uleebalang
Dum sibarang tuha muda
Pane teuka dum angkatan
Di hadapan meuploh laksa
Teuma seuot Uleebalang
Han lon tuban Pomeukuta
Lom neumarit Raja Ba’dan
Neupeugah ban jeup peutua
Nibak pike ulon tuan
Harun Makam nyang po tantra
Beuthat pih meunan Uleebalang
Cuba pandang ta eue rupa
Menyoe tantra Harun Makam
Ka jitawan Putroe Muda
Ban jideungoe meunan kalam
Dumna rakan ji pareksa
Bagian 30
Ji eue beude ngon seunapan
Geudeubang peudeung ngon cokma
Panglima kheun bak Sulthan
Nyoe angkatan tantra Raja
Lon eue bandum meugeudeubang
Seunapan beude ceureupa
Lam teureupong deuh lon pandang
Pahlawan limong ploh dua
Tuan Putroe ka jitawan
Pakrie padan Pomeukuta
Ban Raja deungoe meunan kalam
Reubah pansan ateuh guda
Aneuk peurumoh seukalian
Ka jitawan le lasyeuka
Pakon bunoe han ulon tham
Allah Tuhan ka troh masa
Jinoe pakrie ulon paban
Raja Ba’dan hate luka
Poteuraja beungeeh han ban
Ka troh datang Seukandan Diwa
Ban sare troh u hadapan
Marit rijang Raja raya
Wahe Aneuk Muda Seudang
Ka jitawan Putroe Muda
Bunoe hana deuh angkatan
Leupah jalan Ratna Indra
Bandum habeh nyan sinaroe
Judo Putroe judo Raja
Jinoe Aneuk beudoh ta prang
Ta tueng pulang Putroe Muda
Ban jideungoe meunan kalam
Dum pahlawan beungeh raya
Bujang Meuntroe Uleebalang
Panglima Prang pasang guda
Ladom gajah meubalohan
Pahlawan nyang teuga-teuga
Peudeung cokma ngon geudeubang
Seunapan meuriam lila
Jipeeh tambo palu geundrang
Neu peu ek prang Seukandan Diwa
Rakyat ramee sang peunoh blang
Ji surak ban taga raya
Ngon pupanji puteh hitam
Ngon ‘alam nyang meupeurmata
Limong reutoh gajah balohan
Diwa Seukandan nyang po tantra
Teungoh geu ek dum meurumpan
Ta deungoe abang lon calitra
Ban jikalon le pahlawan
Harun Makam nyang po tantra
Teuma jikheun dum bak rakan
Dong bak timban beek syok sangka
Beek meusurot u beulakang
Ta lawan prang tantra teuka
Ban jideungoe kheun pahlawan
Panglima prang dong meubanja
Cokma peudeung dumka timban
Jipreeh datang lawan teuka
Hingga troh le keunan datang
Oh dum makan aneuk lila
Pahlawan beut saboh hekeumat
Angen barat jipot lanja
Jipot angen ribot gadoet
Jibapot angkatan teuka
Maken ji ek jroh meurumpan
Ji lawan prang tantra teuka
Ureung datang he panghulee
Piyoh dilee sikleeb mata
Seukandan Diwa ka neupiyoh
Angen teudoh han le teuka
Teudoh angen ngon su bunyoe
Leumah jinoe gunong nyang raya
Gunong manyang tampok awan
Buet pahlawan limong ploh dua
Adak cicem manyang teureubang
Troh bak teumpat nyan mate leupah na
Bagian 31
Rakyat tahe mata mandang
Raja Ba’dan hate luka
Habeh crebre dumna kandran
Angen hantam hana reuda
Ladom mate dum teureuban
Ladom pansan teungoh indra
Teuduek oh nan saboh padan
Indra Lailan lon calitra
Deungon aneuk Putroe Intan
Ngon dendayang muda-muda
Sireutoh ureung dua ploh kandran
Ka jitawan le lasyeuka
Ka jicok uleh pahlawan
Puwoe u dalam ubak Raja
Jipalu gong deungon geundrang
Arak Tuan Putroe Muda
Ji surak bandum angkatan
Harun Makam hate suka
Teuduek Putroe nyang sambinoe
Sireutoh droe muda-muda
Teuma marit Raja Ba’dan
Neu tanyong ban bak aneuknda
He Adek Cut Muda Seudang
Dum sibarang Raja-raja
Lon eue gunong raya han ban
Pakrie jalan rot ta daya
Ta cuba eue peue haluan
Ateuh buket nyan wahe Raja
Raja-raja Uleebalang
Soe na sayang keu Putroe Muda
Meunan narit Raja Ba’dan
Han troh tuban Poteuraja
Teuma seuot Diwa Seukandan
Dum pahlawan tan suara
Ka nibak pham ulon tuan
Han troh seunuban Poteuraja
Nibak pike ulon tuan
Nyang troh tuban Syah Gumiran
Meunyoe dumnan han jipaban
Le saktian dalam dada
Ban Raja deungoe haba meunan
Tanyong yoh nyan Syah Gumiran
Oh neupangge le Sulthan
Hana sinan Banta Muda
Teuma seuot Uleebalang
Dum sibarang Raja-raja
Hantom lon eue Muda Seudang
Lawet beurjalan Pomeukuta
Yoh nyan neuthee Syahi Alam
Gumiran hana neu bungka
Nyang dilee kon tan neutuban
Limong bulan cre di tangga
Kareuna lhee boh pasukan
Dumna rakan di likot nyan
Nibak hate Syahi Alam
Gumiran hana seureuta
Teutap sinan rakyat di blang
Han meuriwang lam uroe kha
Takoh bak jok tacu keu lham
Takueh kulam teumpat manoe
Amma ba’du tujoh simpan
Gumiran nyang that peurkasa
Goh lom beurangkat Muda Seudang
Hana sajan tantra Raja
Lon peugisa ubak uram
Yoh beurjalan Seukandan Diwa
Raja neu ek ateuh kandran
Gumiran teubiet u lua
Leupah Raja neubeurjalan
Gumiran neu meudiwana
Lheuh nyan neujak keudeh keunoe
Jeup-jeup nanggroe tiep-tiep banda
Nyang jeut meunan neutinggai droe
Neukalon proe pakrie rupa
Uleebalang Kadhi Meuntroe
Dum sinaroe sajan Raja
Bagian 32
Neukalon ci pi e budhoe
Soe na adoe nyang peurkasa
Lam istana pih tan neuwoe
Lawet adoe beurangkat Raja
Limong buleun limong uroe
Ta deungoe adoe lon calitra
Bak simalam Posamlakoe
Neu meulumpoe Syah Gumiran
Seukandan Diwa nyuem ka neuwoe
Deungon Putroe indah rupa
Deungon rakyat dum sinaroe
Habeh geuwoe Raja-raja
Tuan Putroe jeut ka paloe
Tuhan sidroe nyang peulara
Na nyuem neu ek u meuligoe
Samlakoe beudoh jak sapa
Neumat jaroe aduen neuh sidroe
Tuan Putroe beungeh raya
Neu eue rupa Raja nanggroe
Juwah bagoe uleu bisa
Na nyuem bak sang ie mata rhot
Ka teukeujot Syah Gumiran
Beudoh bak eh teuma siat
Neu ingat lumpoe beungoh faja
Oh neu ingat nyan keu lumpoe
Teuma dudoe neuboh makna
Neuthee yoh nyan ka meulumpoe
Ban sinaroe Putroe Muda
Gumiran beut saboh hekeumat
Troh le siat aneuk guda
Ban sare troh Indra Diran
Neu pasang le Syah Gumiran
Ji teureubang dalam awan
Troh le rijang u hadapan Raja
Ban neu eue le Raja Ba’dan
Ka datang e Syah Gumiran
Bak lon kira Posamlakoe
Sajan kamoe gata bungka
Lon pareksa teuma dudoe
Oh meupaloe teuka bala
Yoh nyan lon thee hana sinoe
Samlakoe ho leupah gata
Gumiran Syah seuot meunoe
Ta deungoe kamoe Pomeukuta
Masa neu tron di meuligoe
Ngon kamoe sajan seureuta
Teukeudurullah e ayah droe
Saket kamoe teuntang dada
Lheuh nyan lon ek u meuligoe
Geuliyueng tuloe seupot mata
Tan lon peugah saket asoe
Lon takot paloe han leupah bungka
Sinan lon eh lam meuligoe
Malam uroe teungeut hana
Saket pih that hana bagoe
Rab sampoe nyawong keulua
Tujoh malam tujoh uroe
Jaga kamoe nibak indra
Tuhan neubrie puleh asoe
Miseu puroe dilee nyang ka
Lon eue rakyat tan le sidroe
Ban sinaroe habeh bungka
Nyang na tinggai lam meuligoe
Dua ploh droe kawai istana
Lon keumeung jak teuma dudoe
Meu lon sidroe hana guna
Kareuna Raja Uleebalang
Pahlawan deungon panglima
Habeh bandum geubeurjalan
Ikot sajan Daulat Meukuta
Meunan pike ulon tuan
Han sukaran jan na bala
Teutap lon duek nyan di dalam
Seungap diam lam istana
Siploh uroe lheuh nibak nyan
Dengoe laman Pomeukuta
Bagian 33
Hate susah lon hana ban
Seunang lon tan Pomeukuta
Lheuh nyan lon tron di meuligoe
Leugat jinoe lon jak bungka
Hana rakan pih meusidroe
Jeuoh nanggroe lon peuteuka
Padum na treb lon cre nanggroe
Bak uroe nyoe troh ban pinta
Raja Ba’dan mariet meunoe
Ta deungoe kamoe Syah Gumiran
Kareuna ulon ka meupaloe
Tuan Putroe ka binasa
Siploh kandran sireutoh droe
Ureung binoe muda-muda
Bandum inong ureung meusoe
Kadhi Meuntroe Raja-raja
Habeh bandum ka meupaloe
Sajan Putroe Ratna Indra
Gumiran Syah tanyong meunoe
Toh pakri roe jeut binasa
Pakrie ek jeut dicok Putroe
Ta hareutoe nibak mula
Teuma seuot Raja Nanggroe
Ta deungoe kamoe Syah Gumiran
Ban sare troh lam padang nyan
Deungoe laman lon calitra
Reului pih tan uroe tutong
Cut Tanglong jipasang guda
Tuan Putroe hana lon tham
Dalam padang hana tantra
Oh sare troh u teungoh blang
Deuh lon pandang dum lasyeuka
Leupah Putroe u hadapan
Di beulakang teudong tantra
Han lon tunee rakyat datang
Nyang awai tan leumah nyata
Oh ban lon eue sang peu palang
Meureuntang teudong meubanja
Lon yue kalon dumna rakan
Pahlawan limong ploh dua
Tuan Putroe ka jitawan
Harun Makam nyang po tantra
Teuma seuot Syah Gumiran
Pakon Tuan han tangaza
Keupeu cit le dum angkatan
Han geulawan tantra raja
Raja Ba’dan seuot meunoe
Ta deungoe kamoe nyang sijahtra
Kon hai Banta tan meulawan
Deungoe lon tuan peu calitra
Oh ban ji eue jroh meurumpan
Panglima Prang pasang guda
Habeh beungeh dum pahlawan
Jipeu ek prang dum jingaza
Oh rab sampoe bak musohan
Teuka datang angen raya
Rakyat teudong dum meurumpan
Diwa Seukandan pih seureuta
Si unab gajah beurjalan
Meuriwang limong ploh deupa
Habeh crebre dumna rakan
Ribot tajam ban boh lila
Nibak kamoe dum sibarang
Tan saktian dalam dada
Teudoh angen Po Samlakoe
Leumah jinoe gunong raya
Maka han jeut dum beurjalan
Teutap intan han soe ngaza
Nyan keuh seubab jeut ka lintang
Bungong karang leupah jiba
Jinoe aneuk gaseh sayang
Haluan tabrie bak gata
Meulaen dum han jituban
Meulainkan Po Bijeehmata
Nyang jeut aneuk lon beurjalan
Muda Seudang seubab gata
Bagian 34
Ulon harap keu Samlakoe
Nyang jeut kamoe dum meubungka
Meunyoe hana Po Samlakoe
Kaoy Putroe han sampureuna
Beule gaseh aneuk ngon sayang
E Buleun Trang Cahya Mata
Meunan mariet Raja Ba’dan
Teuma Gumiran neu seuot haba
Insya Allah Po Janjongan
Na laman soe padubawa
Beek that gundah Po Janjongan
Keudeh bak Tuhan ta lakee do’a
Di Tuanku neuduek keudroe
Na kamoe nyang padubawa
Deungon tulong Tuhan sidroe
Lon boh buket nyoe beu meuleu-a
Beureukat Guree lon Malek Beurahman
Lon boh buket nyan beujeut keu paya
Di Tuanku neuduek seunang
Neu eue peurbuatan Syah Gumiran
Mangat jiturie Murid Beurahman
Treb ka laman ulon tapa
Mangat jiturie Syah Gumiran
Mangat jituban Seukandan Diwa
Mangat jithee na aneuk Palimbang
Usman Juhan du lon Raja
Cit dilee kon keumeung meuprang
Goh lom reumbang keunong kutika
Di laot hana geulumbang
Goh lom datang ujeun keunong sa
Nyoe nyang ka roh sabe lawan
Harun Makam Syah Gumiran
Reudok di gle hantom datang
Han tom reunggang ujeun teuka
Tuan Putroe han ji pulang
Tasek Alam huru-hara
Mangat jithee Said Ba’dan
Padang Shafaran teumpat neuraja
Ujeun di langet sabe teudoh
Hantom guroh geulanteu teuka
Di Tuanku beek that kiroh
Neuhoi taroh dum nyang hawa
Bandua sie manok meususoh
Neuhoi taroh neu meujuara
Manok ceungkeh dalam keureupoh
Treb ka hana roh lhee seun puasa
Bak uroe nyoe neupeutaroh
Beek that kiroh Po Meukuta
Meunan nariet Syah Gumiran
Raja Ba’dan hate suka
Rakyat tahe dum sibarang
Mata mandang ateuh Banta
Lheuh neumariet Banta Seudang
Beudoh rijang Syah Gumiran
Neucok panah boh lam reugam
Pusakaan bak ayahanda
Marneu kucob Syah Gumiran
Neu srom yoh nyan u antara
Gunong hancoe ka teureuban
Panah riwang lam tangannya
Hancoe gunong adek Teungku
Sigeutue han le meutanda
Tinggai padang miseu puroe
Leumah jinoe laot nyang raya
Laot apui luah han ban
Buet pahlawan limong ploh dua
Pajoh ranub Syah Gumiran
Neuprueh keunan lam laot raya
Sinoe neuprueh Po Samlakoe
Laot ka doe jeut keu data
Gunong hancoe laot ka doe
Jinoe nanggroe leumah nyata
Hana ubah miseu puroe
Teukab jaroe rakyat dum na
Nyoe keuh teumpat Harun Makam
Tasek Alam geukheun nama
Bagian 35
Poteuraja hireun mandang
Neu eue peurbuatan Syah Gumiran
Seureuta ngon Diwa Seukandan
Uleebalang ngon Panglima
Han jan siat ka teureuban
Kaya Tuhan Po Nyang Kuasa
Meunan pike dum seukalian
Gumiran sangat peurkasa
Teuma mariet Syah Gumiran
Beudoh rakan na ta bungka
Uroe nyoe troh ta beurjalan
Sampoe datang bak Kutaraja
Ban geudeungoe meunan kalam
Raja Ba’dan Seukandan Diwa
Raja neu ek ateuh kandran
Panglima Prang pasang guda
Deungoe lon peugah Syah Gumiran
Indra Diran ka troh teuka
Ka teudong le di hadapan
Neu ek rijang neu pohlawa
Nyang jak dilee Syah Gumiran
Di likot nyan Seukandan Diwa
Nyang di likot Said Ba’dan
Uleebalang ngon Panglima
Yoh nyan geujak jroh meureuntang
Syah Gumiran nyang peurtama
Nyang jeut meunan wahe abang
Proe hai datang lawan teuka
Meunyoe dilee Muda Seudang
Ek meusagang tantra raja
Guda saboh droe neuh sidroe
Lam jaroe panah pusaka
Deungon pantah hana bagoe
Ka sampoe bak Kutaraja
Laen rakyat dum sinaroe
Goh lom sampoe sajan Banta
Oh troh ka rab Kuta Nanggroe
Po Samlakoe tron euncong guda
Syah Gumiran tron u bumoe
Guda jiwoe ubak mula
Lheuh nyan teuma Po Samlakoe
Neu peujeut droe keu asan raya
Bak jih raya dheun jih rampak
Illahon Haq nyang karonya
Banta ka jeut keu bak asan
Di dalam Blang Mahajana
Bak peureudee that meusigak
Di yueb bak tanoh dum rata
Na sikeujab teuma dudoe
Troh sampoe Seukandan Diwa
Nyan di likot Said Ba’dan
Uleebalang ngon Panglima
Ban neukalon asan rampak
Kaneujak Seukandan Diwa
Deungon Raja Said Ba’dan
Piyoh yueb bak asan raya
Deungon rakyat meubalohan
Uleebalang ngon Panglima
Nyang jeut meunan neu peujeut droe
Beek dudoe payah geumita
Kareuna Banta awai sampoe
Di likot nyoe tinggai Raja
Habeh bandum keunan datang
Piyoh kandran gajah guda
Lheuh nyan teuma wahe abang
Gumiran laen neu puga
Gadoh teuma ngon bak asan
Kuta Reuntang ka meubanja
Dalam Kuta saboh meuligoe
Na tujoh droe ngon lasyeuka
Teumpat timoh uram asan
Kuta Dalam teumpat Raja
Rakyat bandum roh u dalam
Lingka Tuan pacang junga
Geunireng nyan Kuta Reuntang
Panglima Prang roh di sana
Bagian 36
Samat teungoh Kuta Dalam
Raja Ba’dan Seukandan Diwa
Laen teuma Uleebalang
Meuntroe Bujang ngon Bentara
Di rakyat laen pasukan
Cit ka meunan yoh neucipta
Maseng-maseng meuatoran
Hamparan keurusi keutua
Di leun meuligoe Balee Gambang
Kuta Reuntang ngon Panglima
Meuh peulanggi keurusi tilam
Di ateuh nyan Syah Gumiran
Lheuh nyan neutron Muda Seudang
Bak Sulthan neu peuteuka
Neumat Raja nibak jaroe
Neuba jinoe Balee Raksa
Seureuta nyan aduen droe
Neu ek keunoe Pomeukuta
Raja neu ek u Nalee Gambang
Bak hamparan keurusi keutua
Laen bak nyan dum sibarang
Meuntroe Bujang ngon Bentara
Bandum geu ek Uleebalang
Balee Gambang luah raya
Leung keurusi ngon hamparan
Meureuntang geuduek meubanja
Ladom geu ek u meuligoe
Ureung meusoe nyang biek Raja
Hate suka mata laloe
Nyuem karab toe Padang Shafaran
Poteuraja hireun laloe
Meunoe bagoe dalam dada
Bunoe lon duek di yueb asan
Dalam padang han sapeu na
Jinoe karoh lon u dalam
Gumiran banyak bicara
Na nyuem lagee neu meulumpoe
Raja Nanggroe meunan rasa
Teutap Raja tahe keudroe
Po Samlakoe ulon calitra
Cok keureutah mat bak jaroe
Kireman jinoe neu rika
Teuma neucok deungon kalam
Surat rijang Syah Gumiran
Neu meung peu-et nyan u dalam
Harun Makam nama Raja
Phon hijeurah kira uroe
Teuma dudoe neuboh angka
Cicem palacut jipoe u blang
Mita beulalang eumpeun aneuknda
Ta deungoe lon wahe abang
Nyoe keunarang baro leungka
Meunoe haba dalam surat
Soe deungoe mangat ro ie mata
Lheuh neuboh ngon Bismillah
Alhamdulillah pih seureuta
Poteuraja neuduek dahsyah
Gumiran Syah neu meurika
Habeh dumpeu ngon khuteubah
Deungoe lon peugah dua banja
Salam ‘alaikum Harun Makam
Said Ba’dan empunya sapa
Seumbah dan salam Diwa Seukandan
Keupada Tuan Harun Raja
Takzim teukirem Syah Gumiran
Adek Sulthan Seukandan Diwa
Lhee droe ureung dalam surat
Sujud khideumat bak Baginda
Neu eue beudeuh dalam surat
Duli hadharat neu peunyata
Said Ba’dan neu beurangkat
Peulheuh hajat bak Aulia
Deungon aneuk Putroe Intan
Padang Shafaran sideh neuhala
Oh sare troh Nanggroe Janjongan
Ka jitawan le lasyeuka
Bagian 37
Seumah sujud Said Ba’dan
Di bawahkan kawoh Meukuta
Wahe Tuanku neugaseh sayang
Kamoe meudagang Nanggroe Meukuta
Hajat ulon Po Janjongan
Beujeut keu rakan geutanyoe dua
Beuthat neusyen kamoe meudagang
Jinoe neupulang Putroe Muda
Laen nibak nyan ngon Dendayang
Judo Sulthan Raja raya
Jinoe Tuanku nyan neupulang
Gaseh sayang keu lon nyang hina
Lhee droe kamoe beuot tangan
Ubak Janjongan horeumat mulia
Sireutoh droe Putroe Seudang
Meugleung subang meuh peurmata
Han seb siblet lon boet tangan
Siribee seun ulon ganda
Nyang ka leupah nyan buet jaroe
Meu’ah bak kamoe dum sibarang
Jinoe Tuanku neupulang Putroe
Kamoe lhee droe mohon pinta
Meunyoe Tuanku neupulang Putroe
Bahle nanggroe hukom Meukuta
Nibak Daulat neutueng Putroe
Kamoe lhee droe neu peuhamba
Neuyue cok ie neuyue sampoh broh
Neuyue mee bungkoh neuyue hue guda
Beudoh neu eue Daulat Ampon
Kha ulon hamba nyang hina
Meunan nariet lam kireman
Tamat kalam wa intaha
Lheuh geusurat teuma geulipat
Geuhoi surat ngon ceundana
Banta neubeut saboh hikeumat
Neusrom leugat dalam hawa
Soe nyang peugah bala teumpat
Lon surat pih hana bida
Di laot geupawang pukat
Di darat geupawang rusa
Syah Gumiran teuduek siat
Deungon Daulat Seukandan Diwa
Tarek layeu boh taloe klat
Angen barat keunong paksa
Ulon peugah seun saboh bab
Ta pham sahbat haba Raja
Wahe Teungku beek neu upat
Ureung surat goh biasa
Nyoe keuh baro lon meurunoe
Wahe Adoe keumuen Apa
Cit nyoe keuh phon lon seumurat
Nyoe Hikayat Basyah Gomtala
Amma ba’du nyang keulapan
Harun Makam ulon calitra
Nyang bunoe kon seungab diam
Jinoe rakan ulon gisa
Sulthan Harun bak uroe nyan
Balee Gambang duek seunia
Deungon rakyat Uleebalang
Pahlawan limong ploh dua
Hana neuthee Raja datang
Meupiasan hana reuda
Lawet geu puwoe Indra Lailan
Meupiasan hantom reuda
Nyang jeut meunan wahe abang
Geupreeh datang lawan teuka
Mangat beek jiwoe Uleebalang
Peuduek piasan keu ayeun mata
Dalam Kuta dum sibarang
Uroe malam hantom reuda
Laloe rakyat bak piasan
Di padang ka teudong Kuta
Ateuh Balee duek Sulthan
Uleebalang ban siseun lingka
Raja neuduek ateuh tilam
Rhot meulayang surat bak tika
Bagian 38
Ban Raja eue surat meulayang
Harun Makam neucok sigra
Lheuh nyan teuma neuleung surat
Raja lihat peu na haba
Lheuh nyan teuma neuploh lipat
Phon neulihat nibak angka
Baro neuthee Harun Makam
Said Ba’dan ka troh teuka
Seureuta ngon Diwa Seukandan
Syah Gumiran adek Raja
Nyeng beut surat Harun Makam
Uleebalang deungoe dumna
Nariet mangat hana macam
Na tamse gan abet keureuma
Bak uroe nyoe baro datang
Di teungoh blang teudong tantra
Jinoe Putroe geulakee pulang
Uleebalang pike bak gata
Teuma seuot Uleebalang
Ban nyang reumbang bak sarpada
Gunong manyang laot meulintang
Habeh karam ban sineuma
Poteuraja meunan kalam
Seuot pahlawan limong ploh dua
Ta deungoe jinoe lon peugah nan
Dilee cit tan lon calitra
Lam limong ploh wahe adoe
Cit dua droe nyang peurkasa
Sidroe geuhoi Ahmad Faridan
Sidroe geupeunan Amin Mika
Lagi gagah deungon tungang
That pahlawan hana nyang sa
Nyang laen dum han ek peugah
Kuweut babah han sakon guna
Ulon peugah nyang dua droe
Nyang geutusoe dalam laksa
Meunan nariet Ahmad faridan
Dua sajan ngon Amin Mika
Meuka lon cok panee lon pulang
Meugoh lon meuprang hana ridha
Ban Raja deungoe meunan kalam
Harun Makam hate suka
Tantra nyang teuka neu eue lon tham
Jinoe lon lawan Seukandan Diwa
Padum na treb dalam kaluet
Hantom na buet Po Meukuta
Jinoe Tuanku neubalah surat
Haba beumangat jampu ngon tuba
Uleebalang sapeu pakat
Balah surah uleh Raja
Ahmad Faridan peugot surat
Nyang riwayat Amin Mika
Meunoe haba dalam surat
Ta pham beugot he syeedara
Teulheuh geuboh ngon Bismillah
Ngon khuteubah habeh leungka
Deungoe jinoe ulon peugah
Syahdan adalah nyang peurtama
Daulat Tuanku Said Ba’dan
Di likot nyan Seukandan Diwa
Seureuta ngon Syah Gumiran
Adek Janjongan muda bahlia
Nyang seuot saleum Harun Makam
Wa’alaikum salam Seukandan Diwa
Di likot nyan Uleebalang
Ngon pahlawan limong ploh dua
Nanggroe jeuoh keunoe neulandang
Beutroh u dalam bak teumpat hamba
Oh noe ka troh Po Janjongan
Meutot meuriam meuampeung gata
Gata meupeuduek ateuh hamparan
Meu peurjamuan kamoe peumulia
Putroe Tuanku neulakee pulang
Beutroh u dalam keunoe neuteuka
Nafsu Tuanku beujeut keu taulan
Bak lon pih meunan hajat meupinta
Bagian 39
Bgak lon Tuanku raya that sayang
Jinoe lon pulang aneuk gata
Neu eue beudeuh dalam kireman
Na lon tuan hamba nyang hina
Reudok di gle hantom reunggang
Sigeutue pih tan teuka ie raya
Meuka lon cok pane lon pulang
Meugoh lom meuprang sia-sia
Tanda lon gaseh ngon lon sayang
Bak boh meuriam Putroe digata
Tumbak ngon cokma dalam alasan
Lon keumeung pulang keu Syah Gumiran
Seumbah salam Ahmad Faridan
Dua sajan ngon Amin Mika
Dalam limong ploh na tatuban
Dua droe nyan si syeedara
Raya lon gaseh deungon lon sayang
Got ta riwang yoh goh binasa
Cicem subang mirah gigi
Meurak meunari dalam rimba
Tamat kalam wa barihalli
Amat Pari lipat sigra
Lheuh geusurat bungong padi
Amat Pari nyang keurija
Teuma geuhoi lheuh nibak nyan
Ngon keumeunyan gahru jeumpa
Amat jok le ubak Bujang
U padang ji intat lanja
Bujang ka troh u teungoh blang
U dalam ji tamong sigra
Hingga troh le bak Sulthan
Bak Ba’dan Seukandan Diwa
Nyang teuleubeeh Syah Gumiran
Rupa na ban bintang kala
Bujang di yueb peu ek seumbah
Surat pantah jok bak Raja
Teuma mariet Syah Gumiran
Panee rakan keunoe teuka
Teuma seuot Teungku Bujang
Lon tuan suroh Baginda
Nibak Raja Harun Makam
Lon utosan Po Meukuta
Neuyue intat surat kireman
Nibak laman keu Po Meukuta
Bujang jok le deungon surat
Sambot leugat Syah Gumiran
Oh lheuh neucok surat kireman
Bujang yoh nyan laju gisa
Gumiran ploh dalam lipat
Ka neulihat peu na haba
Syah Gumiran baca kireman
Raja Ba’dan deungoe suara
Seureuta ngon Diwa Seukandan
Neuduek sajan lhee seureuta
Habeh neu eue troh u dalam
Habeh neupham dum peurkara
Neu deungoe nariet maneh ngon masam
Syah Gumiran neu tupeu makna
Ban Banta eue nariet meunan
Beungeh han ban ji ek bisa
Gumiran kheun bak Sulthan
Han ji pulang Putroe Muda
Tuan Putroe han ji pulang
Ji pakat prang Harun Makam
Meunan nariet dalam surat
Hate mangat Syah Gumiran
Neu meriet le leugat-leugat
Bak Daulat Seukandan Diwa
Wahe Dalem Cut Dalem Payong
Neu eue buet lon nyang adoe gata
Han ji pulang Putroe Intan
Tasek Alam haru hara
Han lon turie Harun Makam
Ulon boh jrat saboh masa
Hantom na buet nyang dilee kon
Hana lon tuban Amin Mika
Bagian 40
Bak siseun nyoe neu eue piasan
Seudong ngon biram meuseunoh bisa
Hana lon teubiet keudeh u padang
Sinoe di dalam lon hanco donya
Lheuh neukheun nyan Syah Gumiran
Neuboh lam reugam panah pusaka
Teuma neubeudoh Muda Seudang
Neu ek rijang ateuh Diwa
Banta Muda neubeurjalan
Balee Gambang neutron lanja
Banta neumat ngon teureupong
Neu lhoeh ujong Kutaraja
Leumah Kuta dengon Gampong
Leumah tampong rumoh Raja
Ka leumah ngon Kuta Reuntang
Harun Makam nyang empunya
Ban got leumah deuh neupandang
Neurajam bak Kutaraja
Sinoe neusrom le Gumiran
Sideh karam jeut keu paya
Rakyat mate dum teureuban
Nyan buet tangan Syah Gumiran
Kon Meukuta panah seudoe
Sikhan nanggroe ka binasa
Rakyat mate meuploh katoe
Ngon nanggroe ka jeut keu paya
Ka hana le Kuta Reuntang
Panah riwang bak empunya
Ban ji eue le Ahmad Faridan
Kuta Reuntang ka binasa
Yoh nyan jithee harun Makam
Ureung datang that peurkasa
Bit pih dumnan ka teureuban
Goh lom hiram ngon ie muka
Lheuh nyan teuma lawet lawan
Ji meupadan Raja-raja
Neumariet bak Uleebalang
Harun Makam nama Raja
Raja neukheun bak pahlawan
Ahmad Faridan Amin Mika
Ta deungoe he dum pahlawan
Gata sibarang limong ploh dua
Seureuta ngon Uleebalang
Meuntroe Bujang ngon Bentara
Ulon jinoe heundak meukalam
Kheun beuseunang dumna gata
Ka hana le Kuta Reuntang
Nanggroe sikhan ka binasa
Jinoe aneuk pakrie padan
Ureung datang that angkara
Bah le ulon teubiet u blang
Lon lawan prang Seukandan Diwa
Nibak ‘ayeb malee keujie
Bah le mate nyawong pahna
Meunan neukheun uleh Daulat
Mupakat pahlawan dumna
Teuma seuot Ahmad Faridan
Beek Janjongan dukacita
Ampon Tuanku Syahi Alam
Meuseu dumnan lam biasa
Tuanku duek sinoe di dalam
U padang ulon jak ngaza
Nyang ka hantom ulon meuprang
Siseun nyoe tuan ulon cuba
Silawet lon dalam kaluet
Hantom na buet ulon rasa
Bak siseun nyoe bah neubrie buet
Tuanku duek dalam Kuta
Jinoe Tuanku neukrah rakyat
Beumeusapat dalam Kuta
Ulon jinoe lon beurangkat
Lon meuhajat meujak ngaza
Geuduek sinan geumupakat
Meuwoe riwayat keu Syah Gumiran
Lawet lawan teuma dudoe
Po Samlakoe ulon calitra
Bagian 41
Oh troh panah dalam jaroe
Banta woe bak Balee Raksa
Troh u Balee keunan Daulat
Peugot surat Syah Gumiran
Cok keureutah deungon kalam
Syah Gumiran ka neumeurika
Meunoe haba dalam surat
Nariet mangat jampu riba
Syahdan adalah phon riwayat
Deungoe sahbat haba Raja
Seumbah saleum Duli hadharat
Nibak Daulat Seukandan Diwa
Seureuta ngon Syah Gumiran
Keupada Tuan Harun Raja
Jinoe Tuanku Putroe neupulang
Sayang rakan dum peurkara
Beek Tuanku neu keumeung meuprang
Han ek lon lawan gata le tantra
Rakyat pih le alat pih timban
Ngon pahlawan limong ploh dua
Lam limong ploh Po Janjongan
Dua droe nyan that peurkasa
Sidroe geuhoi Ahmad Faridan
Sidroe geupeunan Amin Mika
Beek Tuanku neupeujeut prang
Jinoe neupulang Cut Ratna Indra
Beuthat pih meunan Harun Makam
Lon cuba lawan keu pura-pura
Deungoe nariet payu ngon ceukang
Amin Faridan ji ek bisa
Ahmad Pari le meukalam
Bak Sulthan Harun Raja
Bah Tuanku lon balag surat
Izin hadharat Meukuta donya
Di Tuanku neuduek teutap
Ulon meubrat mangat suka
Ulon teumee laot darat
Meunyoe na hayat udep nyawa
Jinoe Tuanku neujok kireman
Di dalam nyan neuboh haba
Nariet han meukrie tuto han reumbang
Nariet keunarang Syah Gumiran
Nariet han meukrie tuto han sopan
Nariet seukang that ureung teuka
Ahmad faridan cok keureutah
Neusurat pantah sigra-sigra
Meunoe haba dalam surat
Nariet mangat na dum tuba
Seumbah saleum Ahmad Faridan
Harun Makam nama Raja
Seureuta ngon Ahmad Faridan
Teulhee sajan Amin Mika
Tuhan sidroe brie sampaikan
Keu hadapan Seukandan Diwa
Seureuta ngon Said Ba’dan
Syah Gumiran nyang that peurkasa
Nanggroe neuh jeuoh keunoe datang
Beutroh u dalam neutamong lanja
Meunyoe ka troh keunoe neulangkah
Gaki neuh lon srah ngon ie sira
Putroe Tuanku hana lon pulang
Nyang got neuriwang mita guda
Ie krueng mirah ie laot hijo
Po Linto Baro ka apon asa
Adak goh ta prang mei ka talo
Kuta hanco nanggroe karam
Seukandan Diwa meugah that beuhe
Gob cok judo dikeu mata
Syah Gumiran hikeumat jih le
Ngon beuhe sangat peurkasa
Sinan bak ta duek nanggroe ta hanco
Han ta jeut lalo keunoe u lua
Cit meubabah nyang na tuto
N sang mante himbee rimba
Crang keu crang cring Linto Baro
Dara Baro Ratna Indra
Bagian 42
Bukon sayang Linto Baro
Han le judo ka leupah gob ba
Dalam Kuta teuduek tahe
Miseu Bante tron di rimba
Punggong mariet babah mante
Ta cuba lalo keunoe u lua
Cuba teubiet keunoe u padang
Ahmad Faridan keumeung eue rupa
Beek meubabah nyang na ‘ajam
Keunoe dalam blang ta meujuara
Kamoe Tuanku han ek meulawan
Syah Gumiran panah pusaka
Ta cuba teubiet keunoe u padang
Nyang meukalam lon meu eue rupa
Bit pih adek nanggroe karam
Bak lon tuan goh lom meurasa
Miseu dumnan peu takian
Beek he intan ta meuseunda
Gata ta duek sinan di dalam
Peuleumah ‘ajam tarek that do’a
Seumbah dan salam Ahmad faridan
Dua sajan ngon Amin Mika
Ta cuba teubiet keunoe u padang
Mangat lon hantam peudeung di muka
Di langet na bintang meukarang
Habeh leukang oh teuka geumpa
Putroe Tuanku jinoe lon pulang
Lon brie nyang seudang anjeng nyang dara
Keunoe ta teubiet u dalam padang
Sinoe lon pulang peu hajat gata
Beudeuh ta eue dalam kireman
Nariet pahlawan Amin Mika
Peu peungui na lon pulang
Nariet han reumbang ta meusabda
Beek ta mariet miseu musang
Lagee eungkong rupa gata
Meunyoe cit tarek gata saktian
Keunoe lam padang peuleumah teuga
Di kamoe adek hana saktian
Gata meulandang tarek that do’a
Hana lon turie Said Ba’dan
Hana lon tuban Seukandan Diwa
Hana lon turie Syah Gumiran
Meugoh lon hantam peudeung di muka
Bit pih meunan lon meukalam
Ampon Janjongan deungoe hamba
Meu’ah Ampon Syah Gumiran
Leupah kalam hana lam dada
Haba nyang saket nariet nyang reumbang
Neu pham Sulthan Said Raja
Bak deuh neu eue lam kireman
Ampon Tuan sibarang deesya
Tamat surat wallahu ‘alam
Ahmad Faridan lipat sigra
Teuma geujok ubak Bujang
Rakyat sajan teubiet u lua
Surat jimee uleh Bujang
U padang peu teubiet lanja
Ahmad faridan nibak uroe nyan
Keumeung jak prang tantra teuka
Di likot nyan Panglima Prang
Pahlawan dua ploh laksa
Dumnan tantra Harun Makam
Geuplah bagian jeut keudua
Ladom teubiet jak u padang
Ladom sajan Amin Mika
Goh lom teubiet nyang u padang
Ladom sajan Poteuraja
Nyoe lon peugah Ahmad Faridan
U padang ka troh jihala
Di likot nyan dum pahlawan
Rakyat sajan siploh laksa
Ateuh gajah nyang pahlawan
Panglima Prang ateuh guda
Nyang di rakyat meupasukan
Geu beurjalan ngon gaki saja
Bagian 43
Ji peeh tambo palu geudrang
Jipeu ek prang phon jipuga
Mgon ji surak that meugeudham
Tasek Alam nyuem ka geumpa
Di Panglima dum geudeubang
Pahlawan peudeung ngon cokma
Nyang di rakyat sikin panyang
Ladom sandang beude raya
Ladomgulam seunapan puteh
Ladom meuceh tumbak meujunga
Oh hase alat peupeurangan
Neu beurjalan Raja Muda
Nyang jak di keu Uleebalang
Di likot nan rakyat dumna
Beungoh jitron angen Seulatan
Seupot tuan Seulatan Daya
Teutap sinan rakyat di blang
Lem Bujang ulon calitra
Ban sare troh bak Gumiran
Surat kireman dijok le sigra
Gumiran cok leugat-leugat
Neuploh lipat neu beut lanja
Gumiran Syah baca kireman
Raja Ba’dan deungoe seureuta
Na cit sajan Diwa Seukandan
Habeh neupham mangat suka
Habeh neupham haba lam surat
Nariet nyang brat siploh gunca
Le nyang saket miet nyang mangat
Nariet jeungkat bak Amin Mika
Miet nyang mameh le nyang reuhang
Syah Gumiran ka ji ek bisa
Seureuta ngon Diwa Seukandan
Miseu biram uleu bisa
Teuma mariet Syah Gumiran
Bak Cut Abang neukheun sigra
Jak ta teubiet Dalem u padang
Amat Faridan nyang that peurkasa
Deungon rakyat dum sibarang
Di padang baro ban teuka
Lon sangka beek ji meuayang
Syah Gumiran sangat peurkasa
BAN Raja deungoe haba meunan
Diwa Seukandan ek euncong guda
Bah lon kisah keu Syah Gumiran
Indra Diran ka troh teuka
Gumiran kheun bak Raja Ba’dan
Janjongan tinggai lam Kuta
Lon siuroe kumasok prang
U padang meu’en pandikar
Insya Allah Muda Seudang
Bak lon tuan do’a seujahtra
Lheuh neukheun nyan uleh Gumiran
Neutron rijang ek euncong guda
Ban jikalon le pahlawan
Diwa Seukandan empunya tantra
Jibot jaroe dua blah tangan
Jimeu kalam bak Syah Gumiran
Ampon Tuanku Syahi Alam
Seumbah laman bak Meukuta
Meunyoe Tuanku teubiet u padang
Kamoe sajan meujak ngaza
Peu cit ta duek dum di dalam
Beusajan Daulat Po Meukuta
Teuma seuot Syah gumiran
Beek hai rakan tajak gata
Kareuna prang noe that sukaran
Ahmad Faridan gagah peurkasa
Sinoe ta duek gata di dalam
Bah lon tuan teubiet u lua
Do’a beu le gata hai rakan
Lon cuba lawan tantra Raja
Oh ka mate ulon tuan
He rakan ban hajat gata
Ban jideungoe meunan kalam
Dum pahlawan han le haba
Bagian 44
Teutap geuduek dum di dalam
Sah Gumiran neupasang guda
Ka neuteupuek di beulakang
Ji teureubang dalam tantra
Guda saboh droe neuh sidroe
Reugam lam jaroe panah pusaka
Di likot nyan Diwa Seukandan
Ateuh guda plang neupoh lawa
Neumat ngon kreh nibak tangan
Sa’dun jan geuhoi nama
Nang jak dilee Syah Gumiran
Dua sajan neu seureuta
Sira geujak geumeupadan
Meunoe kalam geubeurkata
Nyang meututo Syah Gumiran
He Cut Abang deungoe hamba
Digata Dalem ngon pahlawan
Dilon tuan bah sidroe saja
Deungon tantra tamong keumbali
Nyang nanggri ulon peu pahna
Pat nyang han ek uroe dudoe
Cit na kamoe soe theun sangga
Insa Allah he Po Samlakoe
Bak kamoe ateuh jeumala
Deungon tulong Tuhan Sidroe
Neubrie beusampoe troh ban pinta
Teungoh geujak geubeurjalan
Ahmad Faridan kalon rupa
Ban jikalon Ahmad Faridan
Sah Gumiran ka troh teuka
Hana tantra di beulakang
Dua sajan ngon syeedara
Mantong jeuoh wahe rakan
Siteuntang tangieng ngon mata
Teuma jikheun dum bak rakan
Pahlawan jipasang guda
Rot deh rot noe geubeurjalan
Meuhadapan dua tantra
Jipeulheuh nafah Ahmad Faridan
Angen datang sikutika
Teuma neutupeu le Syah Gumiran
Yoh masa nyan neutheun sangga
Neu beut do’a bak Beurahman
Teudong yoh nyan Jabal ‘aqla
Angen jipoet riboet kon wayang
Ka neutham ngon gunong raa
Han ek leupah le poet u blah noe
Ulak jinoe ateuh tantra
Jipoet keudeh ka roh keunoe
Ka meuwoe ateuh Panglima
Geuboh ateuh gob roh ateuh droe
Ka meupaloe rakyat binasa
Miseu batee ta rhom u pante
Meuhat akhe keunong muka
Meunan miseu wahe adoe
Tuhan Sidroe peutron bala
Soe khianat pulang keudroe
Angen tampoe rhot cong guda
Hantom dum nan angen tarek
Meubalek ngon gajah meunta
Ladom rakyat na ban geulayang
Keudeh manyang jipoe lam hawa
Sigoe dumpeu deungon kandran
Meulayang-layang angen timpa
Rhot u bumoe teuma lheuh nyan
Mate sinan nyawong pahna
Ladom ji bapoe dalam laot
Ladom ji bapoet dalam rimba
Ladom mate sinan layee
Meuabee di dalam tantra
Amat Faridan hana jithee
Dumnan padee rakyat pahna
Ban jikalon rakyat mate
Ji hirup le nafah sigra
Teudoh angen leumah nanggroe
Ka meuwoe ban miseu nyang ka
Bagian 45
Neuthee sinoe le Syah Gumiran
Han le tajam angen teuka
Gumiran Syah teupok tangan
Gunong ka lham miseu nyang ka
Gadoh gunong angen pih tan
Meupandang ban dua tantra
Sayah Gumiran panah bak jaroe
Neuseudoe bak Nanggroe Raja
Sinoe neurhom Po Samlakoe
Sideh nanggroe jeut keu paya
Lheuh nibak nyan teuma dudoe
Panah jiwoe lam tangannya
Neusroh keudeh teuma lom dudoe
Jeup-jeup nanggroe neu geulawa
Oh myam meumat Tasek Alam
Harun Makam nama raja
Sireutoh tujoh ploh Nanggroe Sulthan
Taklok keunan ubak raja
Habeh bandum ka teureuban
Nyan buet tangan Syah Gumiran
Ateuh guda neu meukandran
Sigala alam neu pohlawa
Pat nyang leumah deuh meubayang
Neu rajam ban sagai donya
Rakyat mate nanggroe karam
Panah simpan jeut keu paya
Miseu laot meugeulumbang
Meunan macam nanggroe raja
Nyan nyang na treuk wahe abang
Lingka dalam Poteuraja
Laen bandum ka teureuban
Keunong hantam habeh pahna
Panah pusaka dalam jaroe
Tutong bagoe dum nuraka
Sinoe neusrom dalam jaroe
Ji seudoe bak nanggroe raja
Lheuh jipajoh eumpeun keudroe
Leugat jiwoe ubak Banta
Meunan-meunan geunap uroe
Teutap oh noe Syah Gumiran
Angen barat jipoet malam
Beungeh datang angen teunggara
Ulon peuduek Syah Gumiran
Diwa Seukandan lon calitra
Seureuta ngon Ahmad Faridan
Harun Makam nyang poe tantra
Ban meuteumee meuhadapan
Ahmad Faridan Seukandan Diwa
Teuma mariet Ahmad Faridan
Seubuet tuan nama gata
Nyang ka hantom ulon pandang
Cuba kheun ban lon deungoe nyata
Teuma seuot Muda Seudang
Nyoe keuh laman Seukandan Diwa
Meulintee Raja Said Ba’dan
Aduen Gumiran muda bahlia
Bak uroe nyoe lon masok prang
Lon cok bintang lam istana
Ban sare troh u teungoh blang
Meurumpok lawan adek ngon gata
Dilon adek lon peugah nan
Digata intan soe beurnama
Nyang ka hantom ulon pandang
Uroe nyoe rakan ta meungieng mata
Teuma seuot muda pahlawan
Ahmad Faridan nan lon hamba
Panglima Raja Harun Makam
Aduen pahlawan Amin Mika
Bak uroe nyoe lon teubiet u blang
Meurumpok lawan Seukandan Diwa
Jikalau nyoe gata he Sulthan
Peu na haluan keunoe ta ba
Jikalau na ta ba haluan
Ta brie kaman lon cuba rasa
Ban neu deungoe haba meunan
Neu seuot yoh nyan Seukandan Diwa
Bagian 46
Na bak ulon wahe rakan
Na haluan ulon teuh bawa
Teutapi adek deungoe lon peugah
Cuba hah babah mangat ta rasa
Ahmad Faridan hah le babah
Kreuh le pantah ka neuhila
Ban neututoek dalam babah
Sinan le reubah ka teurhanta
Ka keuh mate Ahmad Faridan
Beungeh pahlawan dua ploh lima
Ka keuh mate sidroe pahlawan
Buet tangan Seukandan Diwa
Ban jakalon Ahmad Faridan
Sa’idunjan sangat bisa
Ka ji tajoe bandum keunan
Ateuh pahlawan Seukandan Diwa
Keunan ji ek dum meurumpan
Miseu kawan aneuk kadra
Hana jan troh keunan datang
Sa’idunjan lom jirasa
Oh ban teupat teupat deungon badan
Pahlawan habeh binasa
Habeh bandum ka teureuban
Dua ploh nam pahlawan raya
Dua ploh nam wahe taulan
Ahmad Faridan nyang peutua
Ban jikalon mate pahlawan
Panglima Prang beungeh raya
Lhee ribee lapan ploh Panglima Prang
Ji ek curam ateuh guda
Laen rakyat di likot nyan
Ji ek sajan ngon panglima
Rakyat ramee hana padan
Diwa Seukandan sidroe saja
Keunan ji ek dum meurumpan
Ji surak ban meutaga raya
Peudeung cokma ngon geudeubang
Panglima Prang pasang guda
Ji keumeung drop Diwa Seukandan
Dumna rakan ka jilingka
Neumat bak wie Sa’idunjan
Uneun Tuan peudeung raya
U likot pih neu peuriwang
Rakyat pansan meuploh laksa
Nyang rot kiri baro lapang
Di likot nyan ka meubanja
Han jeut keunong meu bubayang
Sa’idunjan sangat bisa
Bit pih dumnan ka teureuban
Hana rakan hate liya
Maken ji ek keunan curam
Han ji tujan beungoh sinja
Tujoh uroe tujoh malam
Sikeujab hana tom reuda
Susah bacut Diwa Seukandan
Seubab taulan rakyat that bha
Teutap sinan dalam kawan
Keu Syah Gumiran ta riwang teuma
Jeuoh nanggroe leupah jalan
Indra Diran neu pohlawa
Deungon panah dalam reugam
Sigala alam neu peuteuka
Oh nyang neumat Harun Makam
Seukalian habeh pahna
Pat nyang leumah deuh meubayang
Neu rajam ngon panah pusaka
Seukandan Diwa nyuem sukaran
Neu tupeu ban le Syah Gumiran
Ka neutarek taloe keukang
Keudeh neuriwang bak padang nyang ka
Troh le keunan Syah Gumiran
Indra Diran pantah raya
Neu eue aduen that sukaran
Neu rajam u dalam tantra
Rakyat mate dum teureuban
Diwa Seukandan lheuh u lua
Bagian 47
Siploh ribee sigoe karam
Panah riwang ubak Banta
Lom sigoe treuk Banta rajam
Habeh simpan bandum pahna
Nyang na tinggai dua ploh droe
Goh lom sampoe ajai teuka
Habeh jiplueng dum sinaroe
Leugat jiwoe dalam Kuta
Oh sare troh keudeh jiwoe
Jiboet jaroe ubak Raja
Ampon Tuanku Syahi Alam
Jinoe neupulang Ratna Indra
Beek Tuanku le neu meuprang
Ureung datang that peurkasa
Habeh mate dum pahlawan
Ahmad Faridan ka binasa
Laen teuma Panglima Prang
Pahlawan dua ploh lima
Teuma rakyat dum sibarang
Bak bilangan siploh laksa
Habeh bandum ka teureuban
Buet tangan Seukandan Diwa
Laen nibak nyan Tuanku droe
Dumna nanggroe habeh pahna
Habeh karam dum sinaroe
Nyan buet jaroe Syah Gumiran
Nyang na tinggai cit nanggroe nyoe
Laen ka dhoe jeut keu paya
Laen bandum ka teureuban
Keunong hantam jeut keu data
Sireutoh tujoh ploh nanggroe Sulthan
Habeh karam ban sineuna
Oh nyang neumat Tasek Alam
Habeh simpan Po Meukuta
Hana rakyat jiba sajan
Dua kandran jipohlawa
Sidroe geuhoi Syah Gumiran
Sidroe geupeunan Seukandan Diwa
Nyan keuh judo Tuan Putroe
Raja Nanggroe Padang Shafaran
Guda saboh droe neuh sidroe
Bak jaroe na kreh peunawa
Hana jan rab troh ta peutoe
Rhot di sinoe ateuh guda
Hana peudeung ngon jimeucang
Sa’idunjan sangat bisa
Ban ji tunyok bak pahlawan
Reubah sinan le teurhanta
Teuma meu ek dum sibarang
Tujoh malam meuglet lingka
Oh sare troh Syah Gumiran
Ji simpan ngon sikleeb mata
Guda saboh droe neuh sidroe
Lam jaroe panah pusaka
Han jipiyoh geunap uroe
Jeup-jeup nanggroe ji peuteuka
Guda pantah miseu kilat
Han jan siat ka troh jiteuka
U timue sigoe jipeurab
Keudeh u barat sigoe jigisa
Na nyuem nanggroe ka kiamat
Ta eu bakat meuleu lumba
Yoh goh keunoe lom jipeurab
Yoh goh kiamat mideun raja
Nyang got jinoe Ampon Daulat
Ta pulang leugat Cut Ratna Indra
Yoh goh lom troh Syah Gumiran
Ji simpan ngon kuta-kuta
Nyang got beek le neu meuwayang
Jak jok pulang Putroe Muda
Yoh goh keunoe lom jisiram
Beek ji simpan Po Meukuta
Ban Raja deungoe meunan kalam
Ji ek pitam ngon ie muka
Rakyat mate nanggroe karam
Harun Makam pucat muka
Bagian 48
Yoh nyan mariet Harun Makam
Neuhoi rijang Amin Mika
Laen teuma Uleebalang
Dum sibarang Raja-raja
Troh le keunan u hadapan
Harun Makam neu meusabda
Wahe aneuk Uleebalang
Panglima Prang Amin Mika
Ka hana le rakyat di blang
Panglima Prang habeh pahna
Dua ploh limong Uleebalang
Ahmad Faridan tinggai donya
Laen nibak nyan teuma dudoe
Dumna nanggroe habeh pahna
Jinoe ta pulang Tuan Putroe
Yoh goh sampoe keunoe teuka
Ban jideungoe meunan kalam
Beungeh pahlawan Amin Mika
Laen nibak nyan seukalian
Pahlawan dua ploh lima
Nyang na tinggai dum di dalam
Sajan pahlawan Amin Mika
Hate saket muka masam
Miseu biram jiek bisa
Ji deungoe aduen di jih ka tan
Ahmad Faridan ka binasa
Sigoe bandum ji meukalam
Nyang phon Tuan Amin Mika
Jiboet jaroe dua tangan
Bak Sulthan ji meuhaba
Ampon Tuanku Syahi Alam
Pahlawan heundak meuhaba
Putroe Tuanku hana lon pulang
Meugoh hilang nyawong hamba
Rakyat mate nanggroe karam
Digob Tuanku tan binasa
Patot jinoe nanggroe ta pulang
Nwayang neu meuhaba
Teuma seuot Harun Makam
Beek ta sagang he Panglima
Meunyoe aneuk lom ta meuprang
Akhe datang teulah teuka
Amin Mika lom jibantah
Ji marah keu Poteuraja
Tuto paleh beek ta peugah
Maken juwah Amin Mika
Bit Tuanku hana malee
Miseu asee ek di muka
Keupeu ta cok masa dilee
Cit ka ta thee raya bala
Jinoe pulang neukheun bak kee
Hana malee Poteuraja
Aduen kee mate dalam abee
Jinoe dikee toh keu bila
Nanggroe hancoe rakyat padee
Nyang dikee goh lom kurasa
Peu ta takot gata di juree
Lon theun ulee barang bahya
Sireutoh tujoh ploh nanggroe lon prang
Han soe lawan Amin Mika
Singoh kuteubiet sidroe u padang
Ahmad Faridan kujak tueng bila
Bak gob meugah Diwa Seukandan
Meugoh lon lawan han gadoh bisa
Oh meuteumee ku mat bak tangan
Keudeh u manyang ku rhom lam hawa
Bak soe meugah Syah Gumiran
Di dalam tangan panah pusaka
Oh meuteumee singoh dalam blang
Aneuk panah nyan kusrom bak muka
Ku cok meuligoe kutiek u laot
Kuta nyan kuboet kutiek lam rimba
Kamoe di blang sideh meukalot
Peu ta takot gata lam kuta
Na keuh pura gob peukeujot
Ka yoe atot di Po Meukuta
Bagian 49
Goh lom ta eu bak kee meulot
Neudong di likot neu meujuara
Amin Mika that meupot-pot
Na nyuem teumakot Raja raya
Seubab neu deungoe jimeucarot
Neu turot ban kheun Panglima
Han that neujeut bantah pahlwan
Harun Makam seungab haba
Kaen puteh keu seureuban
Ija Syam bajee plah dada
Beek ta khem-khem wahe abang
Lon keumarang tan biasa
Na ta deungoe wahe rakan
Lon peugah ban ubak gata
Seubab ulon wahe taulan
Lon keumarang lam saket pha
Seb keuh dum nan wahe adoe
Teutap ohnoe lon boh banja
Lon peuriwang ubak bunoe
Raja Nanggroe Amin Mika
Teutap sinan dum sibarang
Beusar seudang cut ngon raya
Geuduek sinan dum sinaroe
Teungoh meuproe jak tueng bila
Amma ba’du siploh sampoe
Po Samlakoe lon calitra
Ban dua ngon aduen adoe
Judo Putroe Ratna Indra
Habeh talo ureung nanggroe
Panah jiwoe lam tangannya
Lheuh nibak nyan teuma dudoe
Gumiran woe dalam kuta
Oh sare troh u leun meuligoe
Tron Samlakoe ateuh guda
Gumiran ek bak teumpat droe
Guda jiwoe dalam rimba
Troh u balee Po Samlakoe
Ban dua droe ngon syeedara
Duek bak keuta nyang meusujoe
Mumat jaroe ngon deungon Raja
Troh le keunan dum sinaroe
Kdhi Meuntroe Raja-raja
Jak meurumpok ngon Samlakoe
Jak mat jaroe Syah Gumiran
Neu cok sutra deungon sujoe
Neu pasoe dalam jeureugha
Cok keureutah mat bak jaroe
Surat jinoe Syah Gumiran
Meunoe haba dalam surat
Ta deungoe sahbat dua banja
Seumbah saleum Syah Gumiran
Keupada Tuan Harun Raja
Di likot nyan dum sibarang
Panglima Prang Amin Mika
Beuna neuthee he Janjongan
Nyoe kireman habeh haba
Baroe lon teubiet keudeh u padang
Lon eu piasan jak kalon Banda
Lon jak eu ceue Tasek Alam
Oh na makam Nanggroe Raja
Bak lon jak-jak Po Janjongan
Srot lam reugam panah pusaka
Ban sare rhot ateuh bumoe
Hanco nanggroe sikhan donya
Keu jeut lon teubiet keudeh u padang
Ahmad Faridan lakee eue rupa
Lon sangka tarek Ahmad Faridan
Yoh goh na lawan sabe padra
Ban sare troh u teungoh padang
Miseu beulalang cempala seuba
Rakyat ka mate nanggroe ka karam
Saleh sidum nan gadoh lam hawa
Jikalau seb Putroe ta pulang
Meuhan lon rajam lom lam kuta
Nariet lon nyoe bukon meuwayang
Dalam kireman ta eue nyata
Bagian 50
Kuta lon hanco gata lon rajam
Meuligoe Tuan lon srom lam hawa
Nyang got Tuanku Putroe ta pulang
Seubab that sayang lon kalon gata
Insya Allah ngon tulong Tuhan
Singoh lon rajam keunan lamkuta
Dalam surat nyoe habeh khabaran
Hana le pantang gaseh seutia
Ta eue singoh buet Syah Gumiran
Miseu boh mamplam geulawa mita
Keu jeut han le lon teubiet u blang
Baroe lon jalan teulah lon raya
Seubab lon deungoe Ahmad Faridan
Deungon lon tuan saleh ek padra
Meusie dumnan han peu kheun droe
Meu bak jaroe hana meurasa
Ka troek bak khad kiamat nanggroe
Han jeut bak kamoe wayang seunda
Saleh ka grak bak Tuhan Sidroe
Neu gulong nanggroe kiamat donya
Tamat surat Po Samlakoe
Lipat jinoe neu rhom lam hawa
Surat jipoe ban geulayang
Rhot lam tangan Raja raya
Ka neucok le Harun Makam
Neuploh rijang neubeut sigra
Ban neukalon haba lam surat
Yoh nyan pucat muka Raja
Neudeungoe nariet bandum brat that
Hana meusikrak nyang peunawa
Teuma mariet Ampon Daulat
Neukheun teupat bak Amin Mika
Wahe aneuk Uleebalang
Nyoe kireman habeh haba
Tuan Putroe jinoe ta pulang
Meuhan karam ngon istana
Geutanyoe mate nanggroe karam
Le saktian Syah Gumiran
Nyan dum tarek Ahmad Faridan
Hana meujan ji geulawa
Hana jeut le ta meuwayang
Ka seb dumnan ube nyang ka
Nibak ulon meunan reumbang
Beek le sagang he Panglima
Amin Mika seuot rijang
Meu gurantang ngon suara
Ngon amarah hana bagoe
Jidhoet jinoe Poteuraja
Beek neupeugah nibak kamoe
Ban hajat droe gata Raja
Meungka uroe hanjeut malam
Meungka agam hanjeut dara
Meugka musoh hanjeut rakan
Beurang kajan pih ku ngaza
Ulon teuh nyoe tan le kalam
Kon miseu ban haba gata
Ban Raja deungoe haba meunan
Seungab yoh nyan tan le haba
Hingga malam le ngon uroe
Dum sinaroe geumeujaga
Uleebalang dum sinaroe
Keuchiek Sagoe ngon Bentara
Geu meupakat dum sinaroe
Singoh uroe geujak ngaza
Keumah pakat ka seuleusoe
Beungoh uroe teubiet faja
Ka meusue le deungon geundrang
Panglima Prang pasang guda
Hingga mureh datang siang
Ka troh u blang rakyat dum na
Amin Mika di baresan deupan
Di likot nyan rakyat dum na
Laen Meuntroe Uleebalang
Tan di Bujang ngon Peutua
Habeh bandum teubiet u blang
Jak peungon prang Amin Mika
Bagian 51
Teungoh geu ek dum meurumpan
Geu surak ban taga raya
Ta cok teupong ngon manisan
Ta ligan jampue ngon sira
Han ek habeh lon atoran
Syah Gumiran ulon calitra
Ban neu deungoe meusue geundrang
Beudoh rijang Banta Muda
Hate suka hana macam
Bak abang neu mariet sigra
Wahe Dalem lon Cut Abang
Lagee piasan uroe nyoe ka na
Beek ta teubiet le u padang
Sinoe di dalam ta meujuara
Beek le kiroh beek le kiyam
Bah le curam ji ek lanja
Sapeu pakat saboh padan
Syah Gumiran Seukandan Diwa
Laen Meuntroe Uleebalang
Dum sibarang neubrie aja
Teutap bandum hana kalam
Ureung datang hate liya
Keumang-keumang bungong mancang
Lam keunarang angen timpa
Nyoe lon peugah ureung datang
Rakyat di blang lon calitra
Amin Mika ka troh u blang
Jipasang di ateuh guda
Laen teuma dum sibarang
Pahlawan dua ploh lima
Laen Meuntroe Uleebalang
Dum sibarang Raja-raja
Habeh teubiet dum u padang
Meusidroe tan le lam kuta
Bak uroe nyoe prang sudahan
Seudong ngon biram meuseunoh bisa
Rakyat ji ek dum boh singgam
Meuploh kuyan meung Panglima
Han lon tudum boh had langam
Bak bilangan troh meulaksa
Rakyat jidong sang pupalang
Meureuntang na dum bak nangla
Le that rakyat dong meurumpan
Ngon pasukan meujeumba-jeumba
Jipeeh tambo palu geundrang
Gong ngon canang hareudam mama
Jiyoeb suleng ngon nafiri
Kudangdi deungon biola
Deungon alam ji peunari
Pupanji meuploh wareuna
Sangkaikala ngon meubunyoe
Bak sagoe Tuan Panglima
Rakyat ji ek jroh meutabu
Nyang seu-ue Geuchiek Panglima
Ji eue lawan tan meurumpak
Ji peujak u gaki kuta
Pahlawan nyang that seureuloe
Dua ploh droe that peurkasa
Keunan ji ek dum meupeudoe
Ban peut sagoe ka jilingka
Ji eue lawan tan meusidroe
Ji peutoe bak pinto kuta
Teuma mariet dum pahlawan
Ji meukalam Amin Mika
Hoe saleh ka Said Ba’dan
Nanggroe Shafaran keunoe teuka
Ta cie teubiet keunoe u padang
Harun Makam keumeung eue rupa
Hoe saleh ka Diwa Seukandan
Judo intan Ratna Indra
Ta cuba teubiet keunoe dalam blang
Muda pahlawan meukalon rupa
Hoe saleh ka Syah Gumiran
Rupa na ban meuh suasa
Meunyoe na nafsu keu bungong karang
Sinoe lon pulang bak ujong cokma
Bagian 52
Meugah tarek adek Sulthan
Di dalam reugam panah pusaka
Ta cuba teubiet keunoe u padang
Sinoe lon pulang Teumuda gata
Beusoe seureuloe peudeung tungang
Ujong geudeubang gantoe Teumuda
Keunoe ta teubiet siat beurijang
Peudeung geudeubang eumpeun jih hana
Po Samlakoe Muda Bangsawan
Beek di dalam ta meujuara
Beek meung babah nyang na tajam
Gata di dalam kamoe di lua
Baroe ta poh Ahmad Faridan
Uroe nyoe rakan lon tuengbila
Ka teubiet keunoe he nyak beurijang
Yoh goh lon pasang gajah lam kuta
Pat droe tarek gata meulandang
Yoh goh na lawan nyang sabe padra
Ta cuba teubiet keunoe u padang
Mangat lon hantam peudeung di muka
Amin Mika mariet lagee nyan
Syah Gumiran neuseot sigra
Neu deungoe nariet saket dum guncang
Neu groeb rijang bak Balee Raksa
Ateuh Diwa neu ek rijang
Syah Gumiran ka ji ek bisa
Seureuta ngon Diwa Seukandan
Ateuh pupalang meu’en panika
Syah Gumiran panah lam jaroe
Neukheun meunoe sikrak haba
Soe saleh nyang meuhoi kamoe
Peurab keunoe meukalon rupa
Lon deungoe nariet nyuem lham nanggroe
Seungkoe-seungkoe bisa-bisa
Hantom lon deungoe nyang ka puroe
Bak siseun nyoe ji ek bisa
Wahe Dalem rancak han soe
Bak sangka droe that peurkasa
Mata buta geuliyueng tuloe
Barang gasoe han lon taba
Teungoh teungeut lon ta peugoe
Theun boh gandoe Syah Gumiran
Bit neukalon kamoe meulandang
Hate tan girang badan tan liya
Na padum na Dalem ba rakan
Syah Gumiran keumeung bileung sa
Lon sangka beek neu meuwayang
Nyang got ta riwang yoh goh binasa
Jak le tawoe keudeh u dalam
Indra Lailan keunoe ta ba
Amin Mika seuot rijang
Beek that ‘ajam ta peugah haba
Ta teubiet keunoe u geulanggang
Indra Lailan bak ujong cokma
Teuma seuot Syah Gumiran
Hai rakan beek that kreuh jungka
Lon takot soh Tasek Alam
Harun Makam gadoh nama
Meunan nariet Muda Seudang
Neu rajam ateuh Panglima
Sinoe neu srom le Gumiran
Sideh keunong Tantra Raja
Na lhee ribee sigoe karam
Nyang pansan na siploh laksa
Rakyat mate dum teureuban
Panah riwang ubak Banta
Nyang bunoe kon seungab diam
Seubab sayang neu eue tantra
Nyang bunoe kon cit lam neu eh
Nyoe phon peudeh camplie China
Neurhom keunoe neurhom keudeh
Teubai lipeh hana bida
Rakyat mate dum teu eh eh
Dum beureuteh aneuk langla
Syah Gumiran hate peudeh
Neu bareh bak Tantra Raja
Bagian 53
Ateuh Diwa neu meutangkeh
Neuhoi keudeh Amin Mika
He Dalem Cut nyang that ‘areh
Cuba pileh boh keureuma
Lon di dalam sinoe ku eh
Gata pileh lon geulawa
Ta peugah seb dum nyang habeh
Ta pileh beu peunoh raga
Meunyoe ka seb beudoh jak woe
Meung goh lom troe beek ta gisa
Bak peunyuem lon hana lom troe
Boh kayee nyoe cit mangat rasa
Dilon Dalem lon seuleuah
Hana payah lon keulua
Ulon sidroe lon meupayah
Muntah darah cit na gata
Meunyoe goh seb beek ta minah
Aneuk panah leumak raya
Bak peunyuem lon hana lom troe
Pakon Adoe ta weeh hana
Nyang got jinoe ta woe pantah
Yoh goh payah langoe guda
Meunyoe le that got ta tamah
Meuhat mirah ie kuala
Beek bunoe kon ta meuharah
Cit meubabah nyang na raya
Yoh goh lom jaga sidom mirah
Nyang juwah sidom seurangga
Tuboh liya hate gundah
Oh ji ampah sampoe lam mata
Bunoe beungeh uleu juah
Yoh goh meugah seudong bisa
Oh ji pandang gadoh juah
Oh ji rudah buta mata
Meunan nariet Gumiran Syah
Neurhom pantah Amin Mika
Keunong ureung nyawong sudah
Nyang meugah lhee ribee pahna
Lhee ribee lapan ploh Panglima Prang
Dum sibarang tinggai donya
Bandum mate ka teureuban
Nyan buet tangan Syah Gumiran
Laen rakyat di likot nyan
Lam bilangan siploh laksa
Nyang na tinggai wahe rakan
Pahlawan dua ploh lima
Amin Mika ulee kawan
Enam ngon nyan nyang peurkasa
Laen rakyat di likot nyan
Bak bilangan nam ploh laksa
Kadhi Meuntroe tan Dibujang
Deungoe Abang lon calitra
Angen barat jipoet siang
Oh malam datang keunong sa
Habeh mate Panglima Prang
Pahlawan beungeh lagoina
Yoh nyan beungeh dua ploh nam
Ji proh meukham pinto kuta
Rakyat ji ek dum meurumpan
Sudang pacang jiloet sigra
Ji peubeude ngon seunapan
Meuriam deungon ramtaga
Rakyat ji ek sang bupalang
Troh u dalam tamong lanja
Ngon jisurak suara meugham
Tasek Alam nyuem meugeumpa
Ban peut sagoe ji ek curam
Ureung di dalam hana haba
Panglima deungon Raja Ba’dan
Seungab diam duek lam kuta
Nyang na rancak Syah Gumiran
Neu linggang di ateuh guda
] Di likot nyan Diwa Seukandan
Bak tangan meuriam lila
Sigoe neutot jeura hitam
Rakyat pansan siploh laksa
Bagian 54
Sinoe meuthum sideh meutham
Neu linggang di ateuh kuta
Beude raya lam seunatang
Aneuk curam dum u lua
Siblah jaroe neumat tunam
Siblah tangan beude raya
Hana putoh sue meuriam
Diwa Seukandan utoh meujra
Meunan sabe wahe Abang
Gumiran ulon calitra
Ban neukalon dum pahlawan
Ka curam bak pinto kuta
Peulheuh panah dalam reugam
Rakyat lapang lingka kuta
Maken ji ek dum meurumpan
Dum nan simpan han jikira
Nyang bunoe kon neu meuwayang
Bak kira sang jitem gisa
Ban neukalon that sukaran
Ka ji hantam pinto kuta
Peulheuh panah dalam reugam
Pahlawan ka tinggai donya
Amin Mika tan neurajam
Laen simpan dum binasa
Nyang na tinggai cit limong blah droe
Mariet jinoe Syah Gumiran
He Dalem Cut tanglong nanggroe
Nyan buet jaroe ureung teuka
Nyang got Dalem gisa ta jakwoe
Beek tinggai Binoe mate gata
Hana lon poh Gata sidroe
Samlakoe lon kalon rupa
Meunyoe bit-bit han tatem woe
Theun jinoe kurhom di muka
He Dalem Cut ulon peugah
Gata nyang sah si syeedara
Beek meunafsu buloh beukah
Tan paidah bak lon kira
Na dum Gata miseu birah
Nyang meugah hana kutaba
Pileh beuhabeh dum boh tufah
Lon seuleuah cit keu Gata
Beek ta kheun tan ulon peugah
Dudoe teulah tan digata
Syah Gumiran that bit gagah
Meunyuem gundah Lem Panglima
Amin Mika teuka pike
Jinoe han le ulon gisa
Nanggroe karam rakyat mate
Han meusampe hajat pinta
Dang-dang meunan teuka pike
Ka neurhom le Syah Gumiran
Aneuk panah sue meudeungong
Rab bingong Teuku Panglima
Neusaja han neupeukeunong
Neurhom manyang le Gumiran
Amin Mika ka teukeujot
Laju jisuroet bak pinto kuta
Ban neukalon ka jisuroet
Miseu riboet neugeulawa
Ban rakyat eue Amin suroet
Plueng dilikoet meuleulumba
Oh sare troeh u teungoh padang
Ji pasang le ateuh guda
Peulheuh panah Syah Gumiran
Jarang-jarang neugeulawa
Panglima plueng ji teureubang
Tinggai guda plang han jikira
Seubab teumakot gadoh malee
Meuhei hei jiplueng ban guda
Rakyat jiplueng meuhah-meuhah
Ban asee grah lam uroe kha
Dalam padang apoeh-apah
Langoe darah sang kuala
Jareung-jareung peulheuh panah
Gumuran Syah meusuara
Bagian 55
Ho ka Gata dum pahlawan
Beudoh rakan ta meudo’a
Ban jideungoe dum pahlawan
Ji dapan di ateuh Diwa
Ji eue musoh jiplueng curam
Ji surak ban taga raya
Maken jiplueng leubeeh curam
Pahlawan han le jigisa
Ka keuh taloe Harun Makam
Ureung landang that peurkasa
Amin Mika troeh u dalam
Harun Makam meusuara
Turon sabda bak Sulthan
Bak pahlawan Amin Mika
Wahe aneuk Uleebalang
Gumiran ka ta peupahna?
Lon eue Gata ka tariwang
Diwa Seukandan ka binasa
Gata dilee troeh u dalam
Rakyat di blang goh jigisa
Lon eue Gata muka masam
Raja Ba’dan Gata nyang singkla
Bak meunyuem lon ka meunang prang
Ureung datang ka jiguda
Pakrie Gata troeh u dalam
Rakyat di blang goh jigisa
Peu ta puwoe Uleebalang
Rampasan bak ureung teuka
Jikalau na he pahlawan
Toh pakrie ban lon eue rupa
Poteuraja meunan kalam
Seuot rijang Amin Mika
Seureuta ngon jiboet jaroe
Ampon kamoe Po Meukuta
Ampon Tuanku Syahi Alam
Nyawong badan milek Gata
Beuthat taboh lon cong pacang
Boh neureupang takue hamba
Jinoe Tuanku Putroe neupulang
Ureung landang that peurkasa
Kamoe di lua Gobnyan di dalam
Miseu boh mamplam keunong geulawa
Habeh mate dum pahlawan
Sikhan kawan nyang ka pahna
Laen rakyat Panglima Prang
Meusidroe tan le meugisa
Adak kon pantah dilon tuan
Karab simpan nyawong keulua
Daulat Ampon lon jeunulang
Neujoek pulang Ratna Indra
Bak uroe nyoe le beurijang
Meuhan datang keunoe teuka
Teuma seuot Syahi Alam
Jroh that reumbang haba Gata
Hana peu le ta meukalam
Kalon tuban buet digata
Poteuraja beungeh han ban
Ka neupulang timplak haba
Masa dilee ka ulon tham
Ta kheun abang hana bila
Ta dhoet ulon meugeurantang
Ta kheun intan ta tuengbila
Digob bandum ka geu meungprang
Gata intan goh ta rasa
Ulon teu iem han lon sagang
Lon kira sang that peurkasa
Lon sangka biet aneuk agam
Han lon tuban aneuk dara
Lon kira na ban ta peugah
Gumiran Syah ta peupahna
Hana lon thee gata birah
Cit meubabah nyang that raya
Yoh di jeuoh ta meuharah
Ta plueng pantah oh meusua
Meunan nariet Harun Makam
Seuot rijang Amin Mika
Bagian 56
Ampon Tuanku meuploh ribee
Meu’ah lon lakee bak sarpada
Beuthat neukheun asee-asee
Han malee lon Po Meukuta
Seubab teukeujoet gadoh malee
Ha Panghulee ka troeh masa
Ka troeh bak had taloe kamoe
Bak siseun nyoe gadoh nama
Nyang dilee kon hana meunoe
Bak siuroe nyoe han ek padra
Ampon Tuanku Duli Hadharat
Jaroe lon angkat ateuh jeumala
Jinoe Tuanku neubalah surat
Nariet beumangat dum asoe kaya
Ube nyang ka Duli Hadharat
Sujud khideumat Syah Gumiran
Amin Mika meunan kalam
Harun Makam hana dawa
Sapeu pakat dua Gobnyan
Kireman geusurat sigra
Amin Mika peugot surat
Deungoe sahbat lon calitra
Meunoe haba dalam surat
That bit mangat ban asoe kaya
Ampon Tuanku Syahi Alam
Said Ba’dan nama raja
Di likot nyan Diwa Seukandan
Syah Gumiran nyang peurkasa
Meu’ah Ampon dum sibarang
Harun Makam le that deesya
Jinoe Tuanku Putroe lon pulang
Neu preeh di blang Po Meukuta
Bak nyang meucok keunan meuintat
Duli Hadharat Meukuta Donya
Nafsu ulon beujeut keu sahbat
Ampon Daulat beujeut syeedara
Adak hanjeut neu meusahbat
Neutueng hai Daulat keu hamba sahya
Beudoh neu eue dalam surat
Jaroe lon angkat ateuh jeumala
Beugot Tuanku neu peukhideumat
Jinoe lon intat Cut Ratna Indra
Jinoe Tuanku neulheuh hajat
Kamoe nyang intat sajan Meukuta
Meunan haba dalam surat
Lheuh geulipat geuyue bawa
Lheuh nyan geujoek ubak Bujang
U padang ji baplueng lanja
Leupah bujang jak mee surat
Geumupakat dalam Kuta
Amin Mika mariet leugat
Ampon Daulat Po Meukuta
Jinoe Tuanku Putroe lon intat
Deungon rakyat bala tantra
Harun Makam seuot pantah
Han peu hai Panglima
Lheuh nyan geuhoi Bujang Meuntroe
Ban sinaroe tuha muda
Geu peutron le Tuan Putroe
Peu ek jinoe ateuh rungka
Ban sare troh u leun meuligoe
Ban sinaroe Raja-raja
Siploh gajah meubalohan
Indra Lailan Ratna Indra
Geu peuteubiet le di dalam
Rakyat sajan meuploh laksa
Seureuta ngon Harun Makam
Ka sajan ngon Amin Mika
Nyang jak dilee Harun Makam
Di likot nyan Amin Mika
Samat teungoh Tuan Putroe
Rakyat sinaroe ireng lingka
Ateuh kandran dum sinaroe
Ureung meusoe Raja-raja
Geutot beude ngon meuriam
Tasek Alam nyuem meugeumpa
Bagian 57
Geupeeh tamboe palu geundrang
Arak Tuan Putroe Muda
Han ek peugah wahe abang
Piasan peumeu’en mata
Teungoh geujak geubeurjalan
Lam Bujang ulon calitra
Bujang ka troeh u teungoh blang
Tamong rijang dalam Kuta
Ban sare troeh bak Gumiran
Kireman dijok le sigra
Gumiran Syah neucok le leugat
Neuploh lipat lajue neubaca
Habeh maklum haba lam surat
Neulipat peuduek bak meja
Gumiran Syah mariet leugat
Neu peugah bak Seukandan Diwa
Seureuta ngon Said Ba’dan
Neu peugah pham haba Raja
Gumiran neuhoi pahlawan
Dum sibarang tuha muda
Jak ta teubiet dum u padang
Ampeung Tuan ureung teuka
Amin Mika keunoe datang
Harun Makam pih seureuta
Tuan Putroe jinoe pulang
Harun Makam meunan haba
Ban geudeugoe meunan kalam
Uleebalang hate suka
Ji beudoh le dum pahlawan
Panglima Prang ngon Bentara
Jicok beude ngon seunapan
Keudeh u padang teubiet lanja
Deungon rakyat dum sibarang
Gong ngon geundrang ji meusuara
Habeh bandum ka u padang
Cit Gumiran tinggai lam Kuta
Seureuta ngon Said Ba’dan
Lhee droe sajan Seukandan Diwa
Raja-raja Uleebalang
Duek di dalam sajan Banta
Teutap sinan lawet lawan
Harun Makam lon calitra
Hingga troeh le u teungoh blang
Rakyat sajan meuploh laksa
U meulason teubee meu on
Geumee keunan ke Syah Gumiran
Rot deh rot noe geubeurjalan
Meuhadapan dua tantra
Ban meurumpok ngon pahlawan
Syah Gumiran nyang poe tantra
Jitot beude ngon meuriam
Ampeung Tuan ureung teuka
Jipeeh ngon gong palu geundrang
Meusue canang hareudam mama
Rot deh rot noe meupiasan
Meusue canang habeh gubra
Rakyat ji jak jroeh meurumpon
Giduek kandran gajah guda
Hate suka dum pahlawan
U dalam neutamong sigra
Oh troh teuka bak Po Samlakoe
Geupiyoh droe sikleep mata
Dileun Balee dong meureuntang
Harun Makam Amin Mika
Teuma mariet Harun Makam
Bak Gumiran neumeuhaba
Neudong diyueb peu ek seumbah
Jaroe dua blah ateuh jeumala
Ampon Tuanku meuribee ampon
Salah that lon le bak gata
Teuma seuot Syah Gumiran
Pakon Sulthan hana mata
Pakon bak lon ta boet jaroe
Kon ngon kamoe ta meudeesya
Kareuna ulon kon Sulthan
Diwa Seukandan ulon hamba
Bagian 58
Ban geudeungoe meunan kalam
Harun Makam hate liya
Seubab akai neuh ka kureung
Han neutuban padubawa
Kareuna gobnyan rayek pangkat
Timue barat cit geuhala
Nyang dilee kon gobnyan daulat
Nyoe ka meuhat roh lam hina
Neuboet jaroe pantah leugat
Neumariet bak Seukandan Diwa
Ampon Tuan Duli Hadharat
Sujud khideumat bak sarpada
Diwa Seukandan mariet leugat
Pakon sisat he kakanda
Pakon bak lon ta boet tangan
Kon ngon lama ta meudeesya
Ayah ulon Said Ba’dan
Sinan Tuan meuhat pinta
Meunyoe na mantong mata uroe
Buleun adoe padam cahya
Beek bak ulon ta boet jaroe
Keudeh ta peutoe nibak Ayahnda
Harun Makam sangat malee
Dum geuseubee lam keureunda
Bit pih meunan hana neuthee
Seubab ratee hate liya
Lheuh nyan teuma seuon tangan
Bak Ba’dan Raja nyang raya
Ampon Tuanku Syahi Alam
Nyang meugeunggam alam donya
Kamoe meudong di hadapan
Nyawong badan hukom Meukuta
Ube nyang ka buet salahan
Ampon laman sibarang deesya
Ban Harun deungoe haba meunan
Com di tangan ngon Raja raya
Lheuh nyan teuma Uleebalang
Ngon pahlawan Amin Mika
Neuweeh sinan Harun Makam
Bak Sulthan Seukandan Diwa
Mumat jaroe ngon Sulthan
Syah Gumiran pih seureuta
Ah lheuh ampon bak Gumiran
Dum sibarang sukacita
Lheuh nibak nyan teuma dudoe
Geu peujaroe Ratna Indra
Habeh bandum sireutoh droe
Tuan Putroe troen cong guda
Troen cong gajah Indra lailan
Bak Raja Ba’dan meu’ah deesya
Di likoet nyan Putroe Intan
Aneuk Ba’dan Ratna Indra
Teulheuh nyan bak ayah nanggroe
Bak judo droe Seukandan Diwa
Teuma beudoh Syah Gumiran
Com bak tangan Ratna Indra
Teuma neucom le Indra Lailan
Syah Gumiran Seukandan Diwa
Judo Raja Uleebalang
Com bak tangan Syah Gumiran
Hingga habeh dum sinaroe
Peu ek Putroe u Balee Raksa
Lheuh nyan mariet Harun Makam
Ampon lama Po Meukuta
Tuanku pulheuh hajat Intan
Ulon sajan Poteuraja
Teuma seuot Gumiran Syah
Han peu salah wahe Raja
Lheuh nyan geujoek bungong jaroe
Peu nyang adoe sajan geuba
Hate suka mata laloe
Neu eue meuligoe deungon Kuta
Harun Makam tahe keudroe
Po Samlakoe ulon calitra
Lam peuprangan siploh uroe
Hingga adoe troh ban pinta
Bagian 59
Amma ba’du that samlakoe
Siblah sampoe bak calitra
Puteh-puteh maneek intan
Mirah padam ie suasa
Neu mariet le Syah Gumiran
Nibak Ba’dan Seukandan Diwa
Jinoe Tuanku ta beurjalan
Beek cong kandran miseu nyang ka
Ban geudeungoe haba meunan
Po Janjongan beudoh sigra
Tron cong Balee bandum sibarang
Uleebalang ek euncong guda
Seureuta ngon Harun Makam
Rakyat sajan meuploh laksa
Habeh bandum ateuh kandran
Ban atoran pangkat raja
Deungoe lon kisah Syah Gumiran
Jen Islam ka troh teuka
Gumiran tron le gambang
Neu ek rijang ateuh guda
Neucok inciem sok bak tangan
Gadoh sinan le ngon Kuta
Ngon meuligoe sigoe hilang
Balee Gambang han meuhoe ka
Rakyat teudong dalam padang
Harun Makam Amin Mika
Raja tahe mata mandang
Syah Gumiran banyak bicara
Habeh bandum rakyat tahe
Ji syuko keu nekmat teuka
Deungoe lon kisah keu bungong kundoe
Neulaloe lam awan miga
Hireun Raja Uleebalang
Muda Seudang han meuhoe ka
Rakyat jijak jroh meureuntang
Ngon piasan hana reuda
Limong uroe geubeurjalan
Troh Tuan bak Syiah Tapa
Nibak teumpat habeh nanggroe
Saboh sungoe nyang that raya
Pucok krueng nyan jila jiran
Ie jih tajam ban boh lila
Jinoe lon peugah beugot ta pham
Ie di dalam dua bangsa
Siblah puteh siblah hitam
Poku Tuhan Nyang Kuasa
Ie nyang puteh miseu dadeh
Deungoe habeh lon calitra
Ie nyang hitam jeureungeh gleh
Tuhan ‘areh sangat kaya
Han that jarak wahe sahbat
Bak bineh rab babah guha
Nyang Aulia lam guha nyan
Hajat Putroe peulheuh nazar
Deungoe jinoe lon hareutoe
Troeh sampoe angkatan Raja
Raja ka troe bineeh sagoe
Piyoeh jinoe dum na tantra
Peudong keemah ngon seuladang
Syah Gumiran ka troeh neu teuka
Neu mariet le Syah Gumiran
Ubak rakan rakyat Raja
Beek tabloeh-bloeh dalam sungoe
Lon peurunoe dum na gata
Jikalau najih deungon manoe
Deungoe kamoe peu calitra
Rot blah deh beek manoe
Si blah noe jeut bee hawa
Bak ie hitam beek peurab droe
Bak ie ceukoe han peu mara
Soe han pateh lon peurunoe
Uroe dudoe teulah teuka
Ban rakyat deungoe kheun Samlakoe
Kabui dudoe nyang neusabda
Hana ji bloeh dalam sungoe
Meusidroe tan nyang peuteuka
Bagian 60
Hana sidroe keujeut jak keunan
Dalam krueng nyan he syeedara
Puleh payah dumna rakan
Sie keurubeun kibah unta
Ladom taguen ladom panggang
Ladom reundang ladom rasa
Sare hase dum sibarang
Geuyue khatam lakee do’a
Geutoet gahru ngon keumunyan
Indra Lailan loeb lam guha
Cit ka hase kruet ngon beudak
Kheuleumbak gahru jeumpa
Tuan Putroe geuboh beudak
Ka sampoe hak troeh ban pinta
Habeh bandum geurhah ulee
Geumeulakee bak Aulia
Sare hase seuleungkapan
Cut Intan teubiet u lua
Geuleung Amin angkat tangan
Lheuh nibak nyan rahoeb muka
Geuyue boeh le ngon khanduri
Teungku Faki makeun rata
Lheuh khanduri seupoet uroe
Ban sinaroe eh seunia
Hingga jaga beungoh uroe
Miseu baroe lom keurija
Han ek peugah wahe adoe
Tujoh uroe treb di sana
Lawet lawan teuma dudoe
Laen bagoe lon calitra
Ya Allah Tuahanku Sidroe
Lon pujoe silama-lama
Uroe malam ulon surat
Nyoe hikayat beu ek leungka
Ya Allah ulon meulakee
Gata nyang mee peutroh pinta
Beek meudaleeh ulon sidroe
Uroe dudoe beek roh deesya
Ratna Indra bak siuroe
Kroet kreut asoe hana tara
Teuma mariet bak judo droe
Tuan Putroe buka haba
Daulat Ampon Tanglong Nanggroe
Saket asoe lon hana tara
Keudeh Teungku ta jak manoe
Dalam sungoe siseun dua
Ban Raja deungoe nariet Putroe
Beudoh jinoe hana dawa
Neu peurab le bineeh sungoe
Tuan Putroe kheun bak Raja
Daulat Ampon lon judo droe
Pat ta manoe nyang seunia
Seuot Raja Putroe tanyong
Si u tunong pante raya
Nibak ulon sinan keunong
Cut bungong bak ta meu-upa
Ban Putroe deungoe nariet keunong
Sigra neutamong lam sungoe raya
Oh troeh lam krueng Putroe Intan
Manoe siram le ban dua
Ie jih sijuek miseu zamzam
Sang macam ie Krueng Kalkautsar
Teungoh manoe Putroe Intan
Deuh neupandang laen rupa
Troeh bak pante Diwa Seukandan
Laen ragam lon calitra
Blah deh ie that jeureungeeh
Si blah bineeh sungoe raya
Si blah noe nyan ie ceukoe
Cut Putroe teungoh meu-upa
Raja meuhoi Tuan Putroe
Ta jak keunoe Putroe Muda
Teuma neujak Tuan Putroe
Neu tanyong proe peu na haba
Sinoe jroh that bak ta manoe
Ie nyoe Putroe baek rupa
Bagian 61
Bak ie ceukoe beek ta manoe
Kulet asoe ceuma leuta
Hana lon eue masa lon jak
Di sideh hak Tuan Putroe
Teuma seuot Tuan Putroe
Deungoe kamoe he Kakanda
Han jeut judo neujak keunan
Syah Gumiran ka neubrie aja
Teuma seuot Diwa Seukandan
Peu salahan jeut keu ceudra
Beek ta pateh Syah Gumiran
Ji meuwayang deungon gata
Ka teukeudi nibak Tuhan
Putroe Intan hana dawa
Ie jeureungeeh han jeut manoe
Han lon pakoe sang peurbula
Lam ie hitam neubloeh jinoe
Lakoe Binoe Putroe ngon Raja
Ban sare troeh lam ie hitam
Teukeudi Tuhan Po Nyang Esa
Goh lom sampoe troeh u dalam
Cut Intan meulaen rupa
Ban dua ngon Diwa Seukandan
Jeut tuan miseu Raja Kra
Timoh iku deungon bulee
Kon ban dilee ka jeut peut pha
Ureung dua laen lagee
Euncong kayee jiplueng lanja
Geumegroeg-groeb keudeh keunoe
Ulah bagoe lutoeng rimba
Teutap sinan euncong bak kayee
Meu eue eue gutee bak keupala
Cukeeh Po Jeh cukeeh Po Nyoe
Galak han soe agam dara
Watee geukhem nyang leubeeh jroh
Meu’oh ‘oh ban saboh rimba
Hana soe thee pih meusidroe
Cut Putroe jroh ka jeut keu Kra
Neu situboh deungon Putroe
Miseu bagoe buet Raja Kra
Ngon teukeudi nibak Tuhan
Srot manikam ubak nisa
Hana sidroe nyang na tuba
Syah Gumiran nyang tupeu bahsa
Neukalon treb hana neuwoe
Ka meupaloe bak neukira
Teuma beudoh Po Samlakoe
Bineeh sungoe neujak mita
Ban sare troeh bineeh sungoe
Hana sinoe ureung dua
Neungieng keudeh neungieng keunoe
Neu eue lagee ureung dua
Gaki jih peut panyang bulee
Iku lagee peudeung raya
Gumiran Syah le eleumee
Yoh nyan neuthee nyoe Teumuda
Hate saket bungong kumbee
Euncong kayee neu ek le lanja
Banta ka troeh euncong kayee
Neudrob himbee agam dara
Ban neupeurab neu keumeung mat
Ji groeb leugat le ban dua
Neu ek keudeh jigroeb keunoe
Payah han soe Syah Gumiran
Gumiran Syah beungeeh han soe
Ingat keu droe bue ceulaka
Leumah pike Po Samlakoe
Meunyoe meunoe payah raya
Lheuh nyan neutroen le u bumoe
Neucok le nyoe panah pusaka
Ka neushrom le euncong kayee
Keunong himbee le ban dua
Himbee ka rhot ka meugule
Ka neucok le Syah Gumiran
Teuma neucok le Samlakoe
Rajah jinoe pantah sigra
Bagian 62
Ban dua droe geupeusapat
Neuba leugat bak krueng nyang ka
Ban sare troeh bineeh sungoe
Neu seumanoe pantah sigra
Neu seumanoe bak ie puteh
Badan puleh miseu nyang ka
Gumiran Syah akai areh
Ek puleh ureung jeut keu Kra
Hana le bulee hana le iku
Ban neu eue indah that rupa
Gumiran Syah teuduek tahe
Neusyuko keu Tuhan Esa
Allah hai Po Rabbol ‘ibad
Kuasa that sidroe gata
Langet bumoe dum lat batat
Laot darat Neu karonya
Eleumee lon neubrie beutajam
Beujeut lon pham jeub kutika
Ya Tuhanku lon meulakee
Gata nyang mee peutroh pinta
Puleh tahe Syah Gumiran
Meututo ngon Seukandan Diwa
Wahe Dalem Cut Abang droe
Keudeh tawoe ubak tantra
Meubeek le treb tanyoe sinoe
Ban dua droe ngon Teumuda
Neujak lajue kaman jinoe
Deungon kamoe lhee seureuta
Teuma seuot Diwa Seukandan
Jak hai intan dilee gata
Hana patot he Cut Abang
Lon beurjalan dikeue gata
Nyang jak dilee buleun peunoh
Samat teungoh Seukandan Diwa
Di likoet nyan Syah Gumiran
Ban lhee sajan sisyeedara
Leupah sinan neubeurjalan
Troeh le rijang ubak tantra
Teuma mariet Syah Gumiran
Bak Raja Ba’dan neucalitra
Ampon Daulat Tanglong Nanggroe
Beek treb sinoe Po Meukuta
Nyang phon beudoh ureung binoe
Sireutoh droe ek euncong guda
Teuma beudoh Raja Ba’dan
Di likot nyan dum lasyeuka
Beudoh teuma Diwa Seukandan
Pahlawan nyang teuga-teuga
Teuma beudoh Harun Makam
Dum pahlawan ngon lasyeuka
Nyoe lon kisa Syah Gumiran
Indra Diran ka troeh teuka
Ka teudong le di hadapan
Syah Gumiran neupoh lawa
Neu tarek le taloe keukang
Ji teureubang u padang Shafa
Jipoe lajue rot lam awan
Meurhang-rhang lam awan miga
Ta deungoe diyueb su ban canang
Oh manyang ban gaseng Jawa
Seukandan Diwa seutot jalan
Syah Gumiran rot lam hawa
Ban sare troeh bineeh nanggroe
Meututo jinoe Harun Raja
Neu beuot le dua jaroe
Ampon kamoe Po Meukuta
Ampon Tuanku Meukuta Nanggroe
Tamong bak kamoe sikleeb mata
Beu neutamong Daulat Ampon
Bak ulon ureung nyang hina
Ban raja deungoe meunan kalam
Tamong rijang dalam Kuta
Deungon rakyat dum sibarang
Diwa Seukandan pih seureuta
Seureuta ngon Syah Gumiran
Sampoe datang dalam Kuta
Bagian 63
Geutot beude ngon meuriam
Ampeung Tuan ureung teuka
Hate suka hana macam
Harun Makam nama Raja
Tron cong guda ek u manyang
Balee Gambang duek meucakra
Geubrie teumpat indah han ban
Syah Gumiran that mulia
Geusie keubeu meuploh ribee
Geupeujamee ureung teuka
Indra Lailan ureung binoe
Sajan Putroe peurumoh Raja
Dum geupeu ek u meuligoe
Tuan Putroe Ratna Indra
Horeumat le han ek kheun droe
Neulakee woe Syah Gumiran
Teutap sinan tujoh uroe
Jroh that budhoe Harun Raja
Ban Harun deungoe neulakee woe
Raja Nanggroe salen Banta
Habeh neusalen dum sinaroe
Keuchiek Meuntroe sajan Banta
Rakyat jitron dum sinaroe
Bungong jaroe bandum geuba
Jak meurumpok ngon Samlakoe
Meuh sikatoe bak ureung kaya
Geubrie ngon meuh nam ploh peutoe
Peuleumah budhoe Harun Raja
Hingga habeh dum seuleusoe
Leugat neuwoe Poteuraja
Ateuh Balee mumat jaroe
Neutron dudoe ek euncong guda
Ulon kisah Syah Gumiran
Di hadapan teudong guda
Neu ek laju Muda Seudang
Neupasang lam padang raya
Deungon rakyat Uleebalang
Piasan hana tom reuda
Hingga leupah Tasek Alam
Piyoeh kandran bak krueng raya
Saboh pante ureung binoe
Sireutoh droe muda-muda
Tron dalam krueng dum sinaroe
Cut Putroe manoe meu-upa
Laen teuma ureung agam
Manoe di dalam sungoe basa
Qadha hajat Putroe Intan
Srot manikam Ratna Indra
Ban neukalon miseu intan
Cok le rijang kalon rupa
Cut Putroe boeh lam oen kayee
Neuseubee yueb batee raya
Manikam srot di cong kayee
Bungong kumbee yoh miseu Kra
Tuhan utoh nyan peuteuntee
Meunan lagee neu karonya
Cit ka kada masa dilee
Lam eleumee Tuhan Esa
Han jeut ingat he panghulee
Neulakee peu peu nyang hawa
Hana meusidroe nyang na ureung thee
Bungeng kumbee teuka masa
Puleh payah miseu dilee
Beudoh meureeree dum geubungka
Umue sithon geujak geuwoe
Troeh sampoe u padang Shafa
Maseng-maseng woe u nanggroe
Bujang Meuntroe Raja-raja
Sikureung ploh ureung binoe
Bandum geuwoe bak judonya
Ratna Indra Lailan Putroe
Leugat neuwoe sajan Raja
Seukandan Diwa Syah Gumiran
Raja Ba’dan woe u tangga
Hingga habeh dum u dalam
Seungab diam lam istana
Bagian 64
Hate suka hana macam
Indra Lailan Putroe Muda
Puteh puteh bungong peukan
Nyang got ragam bungong meulue
Lon balek ayat wahe abang
Laen macam lon peulaku
Kureung pakhok gadoh ragam
Hana macam lon he teungku
Beek neu upat keu ulon tuan
Tulesan kureung sigeutue
Soe nyang baca wahe abang
Keu ulon tuan neulakee bantu
Pihak galak wahe rakan
Uroe malam lon peulaku
Seb keuh dum nan wahe rakan
Ulon tuan hate tunu
Nyang jeut tunu wahe rakan
Saket badan lon he teungku
Bah keuh dum nan nyan khabaran
Jinoe tuan laen lagu
Amma ba’du nyoe dua blah
That biet indah wahe teungku
Nyoe lon kisah Syah Gumiran
Bak simalam hate rindu
Neuingat Nanggroe Syam palimbang
Seureuta sajan deungon ibu
Umue nam thon lon beurjalan
Tan lon riwang ubak ibu
Hate susah Muda Seudang
Hingga malam uroe laju
Hingga mugreb datang siang
Syah Gumiran neutron le laju
Troeh u Balee neuseumbahyang
Ka troeh datang Daulat Tuanku
Seukandan Diwa deungon Ba’dan
Lhee sajan ngon bungong meulue
Beuot jaroe Syah Gumiran
Bak Raja Ba’dan le meungadu
Ampon Ayah lon meukalam
Deungon abang seureuta itu
Neupeugah bak Syahi Alam
Lon kuriwang ubak Ibu
Tinggai sinoe Lem Cut Abang
Lon tuan beurangkat laju
Raja deungoe meunan kalam
Raja Ba’dan moe me’u-‘u
That neugaseh Muda Seudang
Aneuk badan nyuem sang laku
Poteuraja seuot rijang
Wahe Bintang Cut Bungong Meulue
Hana dapat lon kheundak tham
Cut Intan jak saweu Ibu
Adak tawoe Syah Gumiran
Teuntee ta riwang teuma hai Teungku
Jak beuseulamat beek na rintangan
Izin laman tawoe laju
Teuma mariet Diwa Seukandan
Lon pih Tuan jak saweu Ibu
Meunyoe leupah Syah Gumiran
Beusajan Daulat Tuanku
Uroe dudoe ulon riwang
Lon ba sajan Adek Teungku
Ban Raja deungoe meunan kalam
Susah han ban Daulat Tuanku
Meunyoe tawoe aneuk badan
Putroe Intan ba he Teungku
Beek ta keubah bak lon tuan
Akhe datang sampoe umue
Meunan nariet Said Ba’dan
Indra Lailan pangge laju
Troeh le keunan u hadapan
Du sajan ngon Cut Meulue
Ban sare troeh keunan datang
Meukalam Daulat Tuanku
Wahe aneuk Putroe Bintang
Dua sajan deungon Ibu
Bagian 65
Gumiran Syah keumeung riwang
Tajak sajan Bungong Meulue
Seutot judo gata Intan
Beek bantahan aneuk Teungku
Meunyoe na umue gunaseh Tuhan
Teuntee ta riwang lheuh saweu Ibu
Putroe seuot pantah-pantah
Han peu salah he Tuanku
Meungka na izin gata Ayah
Lon meulangkah sajan Teungku
Habeh nariet keumah padan
Cut Intan neu ek u leupu
Buka peutoe ngui pakaian
Ikai subang peu nyang nafsu
Nyoe lon peugah Said Ba’dan
Bak Gumiran neukheun laju
Wahe aneuk Meuntroe Intan
Rakyat sajan intat Teungku
Ta ba rakyat ngon pahlawan
Syah Gumiran jak saweu Ibu
Seuot Banta Syah Gumiran
Han peu rakan Ayah Teungku
Neulakee tulong ubak Tuhan
Syam Palimbang beu lon teumee eue
Do’a beu le bak Janjongan
Keu lama hamba meunglalu
Raja seuot Insya Allah
Han peu salah Bintang Timue
Poteuraja neuduek tufah
Gumiran Syah lon kheun laku
Neucok daweut ngon keureutah
Deungoe lon peugah meu sigeutue
Neusurat le pantah-pantah
Ngon Bismillah phon dahulu
Teulheuh neuboeh ngon khuteubah
Haba indah bayek laku
Keumeung kirem Syam Palimbang
‘Abdurrahman nama Teungku
Seumbah salam Diwa Seukandan
Padang Shafaran banda nyang makmue
Seureuta ngon Syah Gumiran
Adek Janjongan Daulat Tuanku
Dilee geuhoi Banta Syah Midan
Diwa Seukandan dudoe meusyeuhu
Tuhan sidroe brie sampaikan
Keupada tuan ulon nyang guru
Ampon Allah deesya sibarang
‘Abdurrahman nama meusyeuhu
Teungku deungoe lon brie maklumkan
Diwa Seukandan neuyue peulaku
Deungon Putroe neuba sajan
Judo Intan Bungong Meulue
Jikalau sampoe surat lon karang
Banta yoh nyan neuyue peulaku
Neukrah rakyat dum sibarang
Gong ngon canang neuyue palu
Neuyue teubiet bandum u blang
Ampeung Bintang Bungong Meulue
Meunyoe na gaseh deungon sayang
Dum sibarang neupeulaku
Tamat surat haba simpan
Syah Gumiran neulipat laju
Lheuh nyan neurhom dalam awan
Syam Palimbang troh bak Teungku
Teuma dudoe lawet lawan
‘Abdurrahman lon kheun laku
Leuhoe uroe lheuh seumbahyang
Srot di manyang surat laju
Ka neucok le pantah rijang
Panee datang meunoe laku
Ka neubeut le pantah rijang
Syah Gumiran ureung peulaku
Habeh maklum lua dalam
Habeh neupham haba itu
Teungku neuhoi le ngon Bujang
Gong ngon geundrang neuyue palu
Bagian 66
Neukheun ka woe Syah Gumiran
Putroe sajan dum bintang hue
Neukrah rakyat dum sibarang
U padang jiteubiet laju
Neubrie nariet bak budiman
Syah Gumiran woe bak Ibu
Ka troeh surat bak ulon tuan
Putroe sajan Bungong Meulue
Ban Putroe deungoe woe Gumiran
Cut Intan hate neuh seu-u
Hingga hase dum sibarang
Rakyat curam tron bak Teungku
Keumang-keumang bungong peukan
Lam keunarang bungong meulue
Putoh sutra seungab ilang
Teuduek lingkang han le meusue
Teuduek Teungku Abdurrahman
Keu Syah Gumiran lon kisah laju
Keumah hase dum sibarang
Muda Seudang ek u leupu
Bandua deungon Cut Abang
Raja Ba’dan lon kheun laku
Ratna Indra neuhoi rijang
Troeh datang Cut Bungong Meulue
Hana meusidroe laen ureung
Raj Ba’dan neumariet laju
Wahe aneuk cahya intan
Lon peusan haba sigeutue
Gata ta jak judo sajan
Deungoe intan lon kheun laku
Peu nyang geuyue beek bantahan
Cut Intan beudoh le laju
Adak salah buet han reumbang
Cut Intan beujroh peulaku
Beu ta thee droe ta meudagang
Hana mawang soe peulaku
Bu ngon eungkot masak rijang
Ureung agam hate seu-u
Ngon judo droe beek meubantah
Beuthat salah buet sigeutue
Peue nyang geukheun beek ta bantah
Beek raya babah aneuk Teungku
Dinab tuan beutamalee
Beek meulakee peue nyang nafsu
Beu ta pateh beek meutuka
Ayahnda nyang peugah laju
Adak saket gata Aneuknda
Beu le saba Cut Bungong Meulue
Ta sifeut droe ureung hina
Beek meuhawa Bintang Timue
Kadang geupujoe bak na keuh hai
Aneuk Raja beek sang Badu
Meunan nariet Raja raya
Ratna Indra seuot laju
Insya Allah wahe Ayahnda
Han lon tuka meusigeutue
Habeh wasiet Poteuraja
Putroe Muda ek u leupu
Keumah hase dum sibarang
Gumiran jak seumah Ibu
Com di teuot seumah bak tangan
Raja Ba’dan geumoe meu’u’u
Beumeutuah he Buleun Trang
Beek na rintang harabiru
Lheuh pamitan bak Sulthan
Ban lhee sajan neutron laju
Guda teudong di hadapan
Neu ek rijang Bintang Timue
Nyang duek dikeue Syah Gumiran
Diwa Seukandan nyang rot ikue
Samat teungoh Putroe Intan
Jroh kon wayang ta eue laku
Keunong pakat reumbang padan
Dara agam hate rindu
Meurak cut Cempala seudang
Yueb bak Asan jikuku-kuku
Bagian 67
Beuthat tan meuh ngon peukaian
Jroh ruman le soe meunafsu
Ruman hana hareuta pih tan
Le ‘amalan galak Tuhanku
Cempala cut tujoh seukawan
Cicem Subang meujudo-judo
Ratna Indra seutot Cut Bang
Tinggai mawang dalam leupu
Ayam puteh teureubang malam
Ayam hitam jikupu-kupu
Pihak gaseh dalam badan
Siri bulan neu peulaku
Seb keuh dumnan haba wayang
Syah Gumiran ulon peulaku
Neutarek le taloe keukang
Jiteureubang pantah laju
Guda jipoe sue meugrang-grang
Keudeh u manyang lam awan hijo
Siklab-sikleb jiteureubang
Syam Palimbang sampoe Teungku
Ka geudong le di teungoh blang
Tron rijang Cut Bungong Meulue
Ban lhee neutron di cong kandran
Guda riwang le bak dahulu
Piyoeh sinan Bungong Kumbang
Troeeh datang rakyat meu’u’u
Cit dilee kon ka neubrie pham
Uleebalang hate seu-u
U meulason teubee meu-on
Mee keunan keu Bungong Meulue
Jak meurumpok ngon Cut Intan
Putroe Seudang baek laku
Ateuh gajah meubalohan
Ban lhee sajan leugat laju
Geutot beude ngon meuriam
Lua dalam han jeut ta eue
Jipeeh tamboe palu geundrang
Keudeh u dalam peutamong laju
Meurumpok le ‘Abdurrahman
Ngon Budiman nama Ibu
Com bak jaroe seumah tangan
Han ek rakan lon kheun laku
Ka neupeu ek u meuligoe
Cut Putroe neuseumah Ibu
Teutap sinan lam meuligoe
Malam uroe hate rindu
Mangat hate Cut Budiman
Oh woe Intan Bintang Timue
Deungon judo pih na sajan
Cut Intan hate neuseu-u
Pulang nanggroe Abdurrahman
Seukalian nibak Teungku
Diwa Seukandan mat neuraca
Tan meuriba meusigeutue
Hukom seunang hana tara
Miseu nyang ka yoh dahulu
Uleebalang Kadhi Meuntroe
Dum sinaroe hate seu-u
Gumiran Syah neuduek keudroe
Hana sapeu neupeulaku
Teutap sinan lam meuligoe
Aduen adoe Bungong Meulue
Deungon Putroe Ratna Indra
Baro geuba Bintang Timue
Hana sapeu nyang na dawa
Gobnyan ban dua baek that laku
Horeumat jroh ngon tuantha
Hantom neujak meusigeutue
Ban nyang wasiet bak Ayahnda
Putroe Muda neupeulaku
Meusigeutue han neupeutuka
Rok-rok masa lam mangat su
Teutap saja ngon tuantha
Sajan Raja judo Teungku
Seureuta ngon Syah Gumiran
Muda Seudang that meusyeuhu
Bagian 68
Lawet lawan teuma dudoe
That seureuloe wahe Teungku
Soe nyang deungoe meuduek adoe
Mata laloe hate rindu
Padum na treb woe u nanggroe
Hamel Putroe Pocut Meulue
Padum na treb hamel Putroe
Nyata jinoe aneuk Teungku
Aneuk pih agam that samlakoe
Miseu bagoe Bintang Timue
Oh lheuh madeung Tuan Putroe
Deungoe beurangsoe lon kheun laku
Geupeutron u leun istana
Geurasi nama aneuk Teungku
Peulita Umar Sikan Rami
Aneuk Duli nan meusyeuhu
Rayek laju Bungong Pade
Sajan Abi deungon Ibu
Neu pubeut le Teungku Kadhi
Hekeumat sakti neubrie laju
Uroe malam hana khali
Laen rawi wahe Teungku
Rupa na ban Lheuk Bangguna
Lam cintra jikutru-kutrue
Ladom galak meukat sira
Ladom hawa meukat eungkot
Ladom galak ija sutra
Jitem bungka dalam laot
Ladom galak keu peukaian
Jipoh badan beungoh seupoet
Ladom galak boh seumeuta
Ladom hawa keu boh ramboet
Ladom galak gleung suasa
Adak teumaga payah baloet
Adak gasien tan hareuta
Beuthat deesya jimeureuboet
Meunyoe han seb keu beulanja
Han jikira beungoh seupoet
Meungtan taboh gleung suasa
Geunap sinja lam meupot-pot
Han jeut ta eue nibak rupa
Seuntok masa cit dalam kroet
Adak tahoi meuta pura
Ngon suara lam meudhoet-dhoet
Meungna ta bloe gleung suasa
Cahya muka dum bintang rhoet
Adak tahoi Ma Sidara
Ngon suara leumah leumboet
Peue nyang tayue hana dawa
Jijak lanja jipeuturoet
Bah keuh dumnan wahe Teungku
Laen laju lon tuan turoet
Amma ba’du nyoe nyang peut blah
Got that ceudah adoe tuloet
Gumiran Syah lon meupeugah
Nyang meugah aneuk Raja Cut
Lam istana Bintang Timue
Hate rindu beungoh seupoet
Bak simalam eh beuradu
Lam keuleumbu neuseulimboet
Pham beuhabeh wahe Teungku
Beek rugoe bu habeh eungkoet
Mata layoeh soe deungoe su
Teungeut laju dalam seupoet
Deungoe beudeuh kheun beulagu
Beek rindu keu ureung karoet
Neu meulumpoe Bintang Timue
Bungong Meulue deuh meubapoet
Dalam kulam hireun ta eue
He Teungku meuikoet-ikoet
Samat teungoh ma’anikam
Lingka bandum meuh meusaloeb
Laen lingka jroh meutabu
Hana got hue cahya seupoet
Mata lazat hate rindu
Mita kayu neukeumeung choet
Bagian 69
Meuteumeung le kayee gahru
Nyuem jimeusue leumah leumboet
Bineeh kulam neupeurab laju
Cut Meulue neu cukuet-cukuet
Paneuk jaroe na sigeutue
Meulalu lam kulam rat rhot
Ban neukalon rab meulalu
Bintang Timue ka teukeujoet
Neubeudoh le sigra laju
Hate rindu putiek ramboet
Takbi lumpoe ka neuatoe
Meuhat Teungku Cut Putroe got
Han neutupat barat ngon timue
Bungong Meulue lam nanggroe gob
Kareuna gobnyan goh na judo
Nyang jeut rindu keu Putroe got
Dalam hate neuh that seu-u
Beudoh laju neujak seutot
Cok peukaian Bungong Meulue
Peue nyang nafsu pileh nyang got
Teungoh malam tron di leupu
Bak Ibu hana neu peurhob
Nyang jeut meunan wahe Teungku
Beek ganje roeh bak geudrob
Bak abang hana neubrie su
Cut Meulue takoet neuseutot
Hana meusidroe na ureung eue
Tron di leupu panyot ceulot
Guda jen ka troeh jilalu
Neu ek laju troeh babah rot
Neutarek le taloe keukang
Jiteureubang beungoh seupoet
Jipoe meuyueb su ban canang
Oh manyang ban gambang nyang got
Keudeh keunoe jiteureubang
Troeh bak padang pih nyang that got
Teupike le Syah Gumiran
Jeuoh jalan lam nanggroe gob
Guda laen adak neupasang
Lhee thoen abang neudom bak rot
Meunyoe ulon giduek kandran
Tulong Tuhan han meurumpok
Han lon tupat nanggroe makam
Meunyoe tajam ulon seutot
Bah le jinoe lon beurjalan
Jeub seurukan lon eue beugot
Meunan pike Syah Gumiran
Guda tajam srot le meuphat
Syah Gumiran troen u bumoe
Guda jiwoe bak teumpat sot
Lheuh nyan neujak keudeh keunoe
Cut Putroe hajat neuseutot
Neu ek gle jeh neutron gle nyoe
Geunap uroe jeut simpang rot
Ek gunong jeh troen gunong nyoe
Lamlam duroe lamlam urot
Padum lawet neu beurjalan
Syah Gumiran aneuk tuloet
Umue sithon neucre kandran
Troeh bak padang rimba seupoet
Troeh bak buket nyang that manyang
Di blahdeh nyan leumah laot
Leumah laot dalam padang
Geulumbang meubapoet-bapoet
Laot luah hana macam
Kapai tajam lhee thon han troek
Samat teungoh meugeulumbang
Lingka padang uteun seupoet
Mantong jeuoh wahe abang
Hana got trang deuh meusagoeb
Teu pike le Muda Seudang
Lam padang neukalon laot
Dalam rimba luah han ban
Geulumbang bakat ngon riboet
Neu syukoe le Syah Gumiran
Peurintahan Tuhan Ma’bud
Bagian 70
Teungoh neujak neubeurjalan
Meurumpok mamplam bak babah rhot
Nibak cabeung dum buahan
Dua macam Banta lihat
Ladom mirah ladom hijoe
Banyak laku han troeh dapat
Boh jih le that hana macam
Siploh lubang kapai sarat
Bak jih raya ramphak cabang
Troeh u manyang pucoek bulat
Bak peureudee uram mamplam
Saboh kulam nyang raya that
Deungoe lon peugah wahe abang
Ie di dalam nyang hitam that
Saboh naga dalam kulam
Jaga mamplam beek ureung pot
Badan raya lagi panyang
Dalam kulam jikuwat-kuwat
Han lon tukrie peugah macam
Pham Cut Abang haba nyang got
Neu peurab le Syah Gumiran
Boh mamplam neu keumeung jak pot
Naga kalon deuh meubayang
Beudoh rijang jimeuhirup
Leumah neu eue naga silam
Gumiran neu keumeung seupot
Oh ban neu eue badan raya
Meung dumnan hana lon takoet
Peukreuh hate Muda Seudang
Nyang dumnan peu ka peukeujoet
Neucok panah boh lam reugam
Neumeung rajam jikeurawat
Naga hoi le Syah Gumiran
Sujud rijang ubak teuot
Ampon Tuanku Syahi Alam
Geulinyueng klam mata seupoet
Neu peuampon deesya laman
Nyang salahan ka u likoet
Bak lon sangka panee urang
Boh mamplam neumeujak leugoet
Han lon tupeu Po Janjongan
Hoe beurjalan peu makeusud
Gumiran Syah seuot rijang
Ampon bak Tuhan he Adek Cut
Nibak ulon han le deesya
Ube nyang ka lheuh u likoet
Meunan nariet Syah Gumiran
Raja Naga teuma seuot
Hoe keumeung langkah Po Meukuta
Bak hamba neupeugah bacut
Peue na hajat deungon pinta
Siri Banda Nanggroe Pocut
Nyang ka hantom lon eue rupa
Sang Gata aneuk Raja Cut
That samlakoe lon eue rupa
Dalam rimba sidroe peu buet
Peu nama nanggroe geurasi nan
Cut Intan soe nan geuseubuet
Teuma seuot Syah Gumiran
He rakan ta deungoe lon seubut
Nama Nanggroe Syam Palimbang
Syah Gumiran lon geuseubut
Di ulon ka lon kheun nama
Digata soe nan Adek Cut
Raja Naga seuot rijang
Deungoe abang lon kheun bacut
Nama ulon Nagasilan
Geu urohkan nan geuseubut
Lom neutanyong uleh Banta
Nyang gata cit sinoe teumpat
Cuba peugah lon deungoe nyata
Peue keurija nyang ta pubuet
Jiseuot le Raja Naga
Jaga-jaga lon duek bak rot
Lon kon naga deungon kulam
Ngon bak mamplam nyang bineeh rot
Bagian 71
Lom geutanyong Muda Seudang
Kon bak mamplam bak bineeh rot
Cuba peugah jinoe beutrang
Lon deungoran takheun beugot
Ji seuot le Nagasilan
Janjongan neudeugoe beugot
Hekeumat Raja ‘Usyor Zamzam
Farama Hiram Banda nyang got
Amiren Cahya Putroe Intan
Aneuk Sulthan miseu culot
Bit neukalon rimba padang
Gumiran bandum geupeugot
Nyoe keuh nanggroe Farama Hiram
Teumpat Tuan Cut Putroe got
Ban neudeungoe meunan kalam
Gumiran neu tanyong teumpat
Hantom lon deungoe meunan macam
Soe nyang lihat ‘ajeb that-that
Seubab neudeungoe Putroe Seudang
Nyang jeut tuan that neukarat
Nyang jinoe pat ‘Ursyom Zamzam
Lon keumeung pham peugah leugat
Amiren Cahya Putroe Intan
Na sajan ngon Raja Daulat
Naga peugah pantah rijang
Bak uram ka jiriwayat
Neudeungoe lon Syahi Alam
Beugot neupham haba ‘ajab
Nama nanggroe ‘Ursyon Zamzam
Farama Hiram Raja Daulat
Nama isteuri Cut Kandy Syam
Rupa na ban dum malakat
Raja meuaneuk pih na sidroe
Sambinoe na miseu kilat
Tujoh raja taklok keunan
Bak tuan nyan geujak daulat
Ngon pahlawan na tujoh droe
Kawai Putroe Pocut Ubat
Badan raya that seureuloe
Hana bagoe rupa hibat
Nama jinoe lon hareutoe
Ban tujoh droe lon riwayat
Peurtama phon Pari Bardan
Muhammad Saman dua meuhat
Lagi gagah deungon tungang
Ban dua nyan Ampon Daulat
Syariat Marban lhee lon seubut
Marnyang keu peut Nyak Koeb meuhat
Nyang keulimong Ibnu Kahar
Namploh gunca ek jimee brat
Nam lon seubut Marju Ratna
Hekeumat donya bak jih le that
Nyang keutujoh Adnan Fared
Nyang meusaket ek jikarat
Ban tujoh droe duek di Dalam
Siri intang Kuta Daulat
Nyuem mangat that lon deungoe kalam
Hana macam barang kapat
Naga leugat ji hareutoe
Po Samlakoe hireun dahsyat
Gumiran Syah hireun laloe
Naga pindoe peugah leugat
Padum na treb lam meuligoe
Tuan Putroe aneuk Daulat
Sikureung thon umue sampoe
Gohna lakoe Cut Nyak Leukat
Han dijeut ek pih meusidroe
Beurang gasoe aneuk daulat
Tan kuasa beurang gasoe
Goh sampoe nyang sabe pangkat
Raja kalon aneuk ceudah
Bak Allah neulakee leugat
Mohon tulong ubak Allah
Neuminah tan le bak teumpat
Ngon neutapa geunap uroe
Raja Nanggroe sakti le that
Bagian 72
Jeut keu laot teuma dudoe
Leumah jinoe cit meubakat
Siblah nanggroe jeut keu rimba
Tujoh raja sinan teumpat
Deungon rakyat meuploh laksa
Han ek kira lon peugah had
Neu pangge jen neu meusabda
Troh lanja bak Ampon Daulat
Deungon rakyat bala tantra
Habeh teuka dum meusapat
Teutap sinoe dalam rimba
Sidroe hana deuh soe lihat
Oh ta kalon cit meurimba
Rakyat raja hana meupat
Naga laju le calitra
Hate suka bungong riwat
Siblah nanggroe laot raya
Sinan Kuta Ampon Daulat
Nibak pusat laot raya
Poteuraja sinan teumpat
Naga peugah ubak Banta
Nyang lam Kuta sajan Daulat
Peurtama phon Poteuraja
Judo raja dua meuhat
Tuan Putroe geunap tiga
Aneuk dara nyang baek that
Ngon Dendayang na tujoh droe
Siploh sampoe bak riwayat
Pahlawan nyang kawai Putroe
Na tujoh droe bak lon hisab
Hana tom cre malam uroe
Yueb meuligoe sinan teutap
Beurang gasoe han ek ngaza
Meungkon raja nyang areh that
Meungkon tarek that peurkasa
Hana daya ek geurapat
Beek nyang ta prang ngon tangaza
Meung Kuta hana soe tupat
Oh ta kalon cit meurimba
Laot raya cit meubakat
Pakrie nyang ek rot tangaza
Leumah hana deuh soe lihat
Raja laen keunoe teuka
Hana daya ek geutupat
Teutap sinan troeh an jinoe
Lam laot nyoe sinan teumpat
Naga habeh ji hareutoe
Po Samlakoe ceureudek that
Habeh bandum ji hareutoe
Habeh sampoe pasai ngon bab
Dalam hate Po Samlakoe
Meunoe bagoe wahe sahbat
Nyoe nyang nyoe takbi lumpoe
Yoh di nanggroe lon bak teumpat
Nyang lon lumpoe saboh kulam
Bungong lapan deuh lon lihat
Nyang bungong di dalam kulam
Meukarang bandum meuikat
Samat teungoh ma’anikam
Jroh meureulang cahya hue that
Laen bandum cahya padam
Ma’anikam nyang leubeeh that
Nyoe keuh laot makna kulam
Bungong karang Putroe meuhat
Samat teungoh ma’anikam
Putroe Intan aneuk Daulat
Laen bandum meuh sibarang
Dendayang peunyuem lon meuhat
Tan meutuka bak ulon pham
Nagasilan nyang riwayat
Na sipeu treuk goh lom teuntee
Nyang kayee goh lom troeh dapat
Nyang lon lumpoe kayee gahru
Lon syot Teungku bungong riwat
Ban ulon mat nyuem jimeusu
Goh lom Teungku ulon dapat
Bagian 73
Uroe dudoe meunyoe na umue
Kayee gahru pih lon tupat
Syah Gumiran hate rindu
Sigeutue laen lon peujoek
Beek takhem-khem wahe Teungku
Lon peulaku hate that broek
Ta peugah he Nagasilan
Boh mamplam ta peugah beuntoek
Peu manfaat wahe rakan
Bak uram gata duek seuntoek
Ji seuot le Nagasilan
Suroh Raja bak lon neujoek
Meusoe nyang pot boh kayee nyan
Bak lon tuan neuyue antoek
Neu seuot le Syah Gumiran
Bak lon tuan peugah beuntoek
Ta deungoe he Po Janjongan
Boh kayee nyan alamat toek
Soe nyang pajoeh boh kayee nyan
Putroe Intan keunan neujoek
Beuthat dilee cit geumeuprang
Dudoe tuan roeh bak geujoek
Soe nyang nafsu Putroe Intan
Boh kayee nyan dilee geuthoek
Beuthat teuga geumeulawan
Dudoe abang roh geumasoek
Meunan neukheun le Sulthan
Hantroek wahan ngon tajuloek
Meu ek meuteumeung pajoeh mamplam
Putroe Intan meuteumeung cok
Boh kayee nyan lhee ban macam
Deungoe lon kheun ban meusipucoek
Saboh hijoe laen hitam
Mirah padam miseu loklok
Bit pih meunan lon peugah ban
Mirah hitam han jeut neucok
Han jeut pajoeh mirah hitam
Seukalian hekeumat gob
Neuseuot le Syah Gumiran
Nagasilan peugah beuntoek
Nyang mirah deungon nyang hitam
Han jeut makan peu seubab broek
Ji peugah le Nagasilan
Nyang hitam peunyaket budoek
Soe nyang pajoeh wahe rakan
Luka badan dum habeh broek
Nyang mirah hue racoen sajan
Soe nyang makan sinan dudoek
Han jan taweeh wahe rakan
Bak uram sinan meutumpoek
Boh nyang hijoe mameeh han ban
Soe nyang makan nekmat seuntoek
Meusigeutue ta teumeung makan
Lazat tuan nyuem sang maboek
Neuseuot le Syah Gumiran
Boh kayee nyan bah lon juthoek
Jiseuot le Nagasilan
Payah tuan reunong han toek
Ngon manyang that dalam awan
Leumah pih tan dalam pucoek
Han jeut ta ek Po Janjongan
Deungoe laman peugah beuntoek
Meunyoe ta ek euncoeng kayee nyan
Kala peusan dum di pucoek
Nyang bisa-bisa dum sibarang
Bandum sinan nibak pucoek
Adak ta rhom wahe abang
Nyang hijoe tan leumah tampoek
Nyang hijoe cit saboh wet-wet
Si u barat cabeung pucoek
Han ek leumah oh ta lihat
Hana meupat dalam sagoeb
Barang gasoe han troeh pinta
Payah teuka keunoe nyang toek
Ulon di yueb jaga-jaga
Soe nyang teuka cit lon antoek
Bagian 74
Meunan nariet Silannaga
Syah Gumiran atoe pakhoek
Pakrie cit han ta meudawa
Ulon teuka nyoe ho ka troek
Pakrie ta kheun jaga-jaga
Ulon teuka ta duek dawoek
Meunan nariet Syah Gumiran
Neu meuhaba siuroe suntoek
Teuman seuot Silannaga
Bak gata ka ulon masoek
That lon takoet keu Meukuta
Ngon gata han sabe pakhoek
Beuthat neupoh uleh Raja
Peu nyang hawa ulon peutroek
Cuba laen keunoe teuka
Lon seuba hana jan meutroek
Gata sidroe nyang syeedara
Di donyan an leumah seuntoek
Teuma seuot Syah Gumiran
Bit nyoe gata lon tamasoek
Peu nyang lon yue singoh lusa
Peu nyang pinta lon ta peutroek
Teuma seuot Silannaga
Peu nyang hawa bak lon neujoek
Neu peugah pat Po Meukuta
Peu ta mita keunoe nyang toek
Insya Allah lon useuha
Tuhan Esa meuhat nyang peutroek
Meusoe laen hana daya
Tan kuasa meu ube oek
Meunan nariet Silannaga
Gumiran neupeugah oh troek
Nyang troeh keunoe lon peuteuka
Ubak gata nyoe hoe ka troek
Ulon jak cok Amiren Cahya
Aneuk Raja dalam laot
Padum na treb lon cre nanggroe
Bak Putroe goh lom lon masoek
Meunyoe aduen teuh keu kamoe
Ta cok Putroe dalam laot
Nama Putroe Amiren Cahya
Keunoe ta ba bak lon beutroek
Ban jideungoe meunan haba
Hitam muka ji ek reudoek
Allah Allah Po Meukuta
Ulon hamba ajai rab toek
Meunyoe keunan neu seuraya
Hai Raja Cut bungong tajoek
Han meusampe meusyeedara
Hajat pinta na nyuem han troek
Kareuna ulon hekeumat raja
Bit naga ulon duek dawoek
Oh meuthee bak Raja raya
Ulon hamba cit geuantoek
Meung nyang laen peu Meukuta
Siri Raja han keunoe toek
Ngon nyan han ek lon keurija
Kareuna hamba na mit nyang broek
Bak lon jak joek Putroe Muda
Meung gata leupah ta masoek
Oh meuthee bak Raja Nanggroe
Lon geuseudoe ngon geuantoek
Han jeut sidroe ureung teuka
Allah gata ka lon masoek
Lagi ka jeut keu syeedara
Lon ngon gata gaseh meuroek
Bit pih meunan he Meukuta
Hate hamba sangat that broek
Meug geuthee ka leupah gata
Ulon hamba ajai ka troek
Lon pakrie ban hai syeedara
Leubeeh gata ngon ulon broek
Meunan nariet Naga pindoe
Sira jimoe meusoek-meusoek
Teuma seuot Syah Gumiran
Nagasilan pakon dawoek
Bagian 75
Ji seuot le Silannaga
That sayang gata keunoe toek
Han meusampe neu meurakan
Hajat tuan han ek peutroek
Kareuna Raja ‘Arsyon Zamzam
That ‘ajam sakti neuh lhoek
Adak laen neuboeh padan
Lon tuan sajan ku masoek
Allah Allah wahe Tuhan
Nafsu rakan neubrie beutroek
Meunan nariet Nagasilan
Ie mata ban ujeun reudoek
Neuseuot le Syah Gumiran
Lam laot nyoe bah lon masoek
Insya Allah ngon tulong Tuhan
Ulon tuan keunan bak neujoek
Ta duek gata wahe rakan
Beek susahan sinan seuntoek
Insya Allah Syahi Alam
Do’a sajan ulon teuh joek
Meunyoe na hajat Putroe Intan
Boh mamplam dilee neu juthoek
Meunyoe meuteumee pajoeh mamplam
Putroe Intan meuteumee cok
Sinan dali ta eue macam
Lon peugah pham bak ta juloek
Teuma seuot Syah Gumiran
Pot le gata keu lon tajoek
Teuma seuot Raja Naga
Han jeut Raja lon meuceunggoet
Bak jih panyang leusoeh raya
Awan miga ka rab tampoek
Leumah neu eue uleh raja
Dalam Kuta watee lon cok
Neukheun ulon le bicara
Manusia keunoe na troek
Han neubrie pot ubak hamba
Wasiet Raja masa neujoek
Nyang miyueb han deuh lam Kuta
Hana rot na ho ta baroek
Meung na hajat neu meurasa
Neu geulawa meunyoe ek troek
Meunyoe na bagi ngon bahgia
Sroet lanja keunoe meutumpoek
Meunan nariet Silannaga
Beudoh Banta bungong tajok
Neucok panah boh lam reugam
Bak Beurahman mohon beutroek
Beureukat guree lon Beurahman
Boh kayee nyan neubrie dudoek
Meunyoe judo lon Putroe nyan
Nyang hijoe nyan neubrie beutoek
Neu kucop le panah rijang
Neurhom mamplam sira dudoek
Neucok pantah pajoeh rijang
Lazat han ban mata lok-lok
Hireun tahe Nagasilan
Ji eue buet tan bungong tajoek
Lheuh neupajoeh mangat rasa
Bak Naga neu atoe pakhoek
Geutanyoe jinoe meu’ah deesya
Lon ku bungka hoe rot nyang troek
Meunyoe na umue akhe masa
Lon ngon gata lom meurumpok
Insya Allah Po Meukuta
Jan na sabda ulon ba troek
Neu peumeu’ah deesya kamoe
Uroe dudoe beu lom meurumpok
Jinoe laju neu peureugi
Seutot pasi rot rijang troek
Com bak teuot seumah di gaki
Neu peureugi bungong tajok
Leugat neujak seutot pasi
Beurheunti seuin-seun sipucoek
Geunap uroe hana khali
Laen lagi ulon antoek
Bagian 76
Banta bungka teuduek siat
Laen ayat ulon pakhoek
Deungoe beugot Macut Barat
Leubeeh lazat keunong antoek
Amma ba’du limong blah sampoe
Lon peugoe haba nyang lawi
Ma’anikm nyang saboh roe
Rhoet bak Putroe Tuan Siti
Putroe keubah bineeh sagoe
Nyang jinoe ka jeut peut gaki
Ngon kuasa Tuhan sidroe
Meunan bagoe neu peudali
Lheuh neukeubah uleh Putroe
Tujoh uroe sinan beurheunti
Lheuh nyan teuma wahe adoe
Tuhan sidroe nyang peujadi
Gaki jih peut deungon jaroe
Iku han soe panyang lagi
Ban jiteungoh dalam sungoe
Jijak jinoe rimba sunyi
Jijak keudeh jijak keunoe
Troeh sampoe bak guha pari
Keunan diloeb leugat sidroe
Jileung jaroe ubak Rabbi
Uroe malam hana laloe
Dawoek dukhoe lam ji puji
Ji lakee bak Tuhan sidroe
Ji mohon droe ubak Rabbi
Hana meusidroe soe peurunoe
Syiah adoe hana sini
Troen ileuham lam hate droe
Po ku sidroe meuhat nyang bri
Teutap sinan tujoeh uroe
Guha ka dhoe arat isi
Badan raya hana bagoe
Teubiet sinoe ji peureugi
Gunong hitam teungoh laju
Sinan Teungku guha lagi
Guha luah deungoe lon kheun proe
Siblah nanggroe nyuem rab sabe
Keunan jiloeb leugat jinoe
Malam uroe tan beurheunti
Teutap sinan tujoeh uroe
Peut be baroe raya isi
Arat guha raya badan
Sidroe Tuhan nyang peujadi
Tujoeh guha ka jitamong
Badan keumong rab ube gle
Ube na guha dalam gunong
Han lot tamong ujong gaki
Hana sapat nyang na gunong
Meunaong lam rimba sunyi
Diyueb kayee sinan piyoeh
Hana putoeh amai sakti
Badan raya rupa hibat
Buet kudrat Tuhanku Rabbi
Janggot panyang misee hibat
Iku bulat rab ube gle
Deungon panyang han troeh dapat
Sigoe jiwat troeh dalam gle
Ji hapit troeh laot darat
Ji panjat lam awan ijoe
Sinan jiduek di yueb kayee
Hana lalee amai sakti
Deungoe jinoe lon kheun laku
Lon peuteuntu mangat ta tukrie
Padum na treb lam jitapa
Deungoe Cutda ulon rawi
Umue sithon dalam rimba
Troeh ban pinta Tuhan neubrie
Habeh meuphom dum peurkara
Jameun masa nyang ka lawi
Jithee ayah deungon bunda
Manusia dilee jadi
Jitupeu biek deungon bangsa
Aneuk Raja ayah kami
Bagian 77
Habeh ngon nan bandum nyata
Phoen bak Kuha troeh bak Nini
Habeh bandum sukee Raja
Bandum rot Ma ngon rot Abi
Ji tupeu buet dilee punca
Nyang jeut hamba meunoe jadi
Hana meusidroe soe brie aja
Dalam tapa deuh teurjali
Ngon karonya Tuhan Esa
Ibu bapa ka jiturie
Meupat nanggroe meupeu banda
Asai mula ka ji tukrie
Ngon Apa Cut ka jitusoe
Deungon nan droe cit geurasi
Syah Gumiran Apa Cut kamoe
Meugah han soe hana sakrie
Adek ayah ulon sidroe
Siuroe siseun teurjali
Nyang jeut tan le nyang di nanggroe
Seutot lumpoe u dalam gle
Amiren Cahya nama Putroe
Apa Cut kamoe nyang meuhate
Farma Hiram nama nanggroe
Keunan jinoe neu peureugi
Dalam laot Putroe Intan
‘Arsyon Zamzam nama Raja
Bah lon seutot jinoe kaman
Ulon tuan mangat geuturie
Beek treuk kadang roh geumeuprang
Putroe Intan han geutem brie
Kadang han ek neulawan prang
‘Arsyon Zamzam kreuh sakti
Bah lon jak cok Putroe Intan
Lon lawan prang Raja ini
Meunan pike dalam badan
Beudoh rijang ji peureugi
Ban ji beudoh bak tidoran
Geumpa alam nyuem reuloh gle
Ngon iku meukuwang-kuwang
Na tamse ban go bupanji
Badan raya hana macam
Janggot panyang ka troeh u gle
Misee panyang that meudreeh-dreeh
Eumpang kreeh na ube guci
Deungon muka han peue daleeh
Kureung leubeeh na ube gle
Leugat laju ji beurjalan
Troeh yueb mamplam ji peureugi
Ji beudoh le dalam kulam
Nagasilan keumeung taki
Raja kra kheun beek le laku
Kuboet iku kah kutadi
Ban naga eue han ek lawan
Raya badan na ube gle
Ji tanyong le pantah rijang
Panee rakan ta peureugi
Krea seuot le pantah sigra
Seutot Apa lon dalam gle
Naga tanyong bak Raja Kra
Soe nan Apa cuba kheun le
Kra seuot le tanyong Naga
Syah Gumiran nan geurasi
Cuba peugah e hai Naga
Na rot gata neu peureugi
Naga seuot pantah sigra
Barona siseun lanti
Baro leupah gobnyan bungka
Keunan lanja seutot pasi
Raja Kra deungoe haba meunan
Leugat yoh nyan ji peureugi
Seutot pasi ji beurjalan
Syah Gumiran meuteumeung le
Goh meurumpok meuhadapan
Deuh ji pandang geupeureugi
Saleh yoh nyan Syah Gumiran
Apa Cut laman nyang seundiri
Bagian 78
Bak peunyuem lon sabet yoh nyan
Nagasilan nyang peugah krie
Dandang-dandang pike meunan
Syah Gumiran deuh neu eue le
Ban neupaleng u beulakang
Tahe mandang bungong pade
Dalam hate Syah Gumiran
Peue binantang na ube gle
Bunoe hana deuh lon pandang
Pajan datang ji peureugi
Saleh gunong saleh binatang
Saleh urang nanggroe ini
Saleh musoh saleh rakan
Saleh Tuan nyan Jen Pari
Gumiran Syah piyoeh siat
Neu lihat neukalon dali
Ban Bue kalon ka neu piyoeh
Jih pih teudoeh siat lanti
Jimeung mariet jitakot kon
Teujak teudong bineeh pasi
Oh thoe reuoh puleh payah
Gumiran Syah neu peureugi
Ban Kra kalon neu meulangkah
Beudoh pantah seutot lagi
Banta neujak sira ngieng u likoet
Deuh meumeet-meet ji peureugi
Yoh nyan neuthee Syah Gumiran
Nyoe binanatng sabet kon gle
Pakrie jih raya that badan
Kaya Tuhan Rabbol Kade
Han tom lon eue meunan macam
Umue laman padum lawi
Binatang nyan saleh khianat
Hana meupat ji meudeungki
Lom neu piyoeh bak ujong nyan
Neu eue macam saleh pakrie
Ban Kra kalon lom neu piyoeh
Dong di jeuoh ji beurdiri
Dalam hate Syah Gumiran
Pakon meunan binatang ini
Siat ji jak siat lintang
Hana curam ji peureugi
Watee lon jak jih beurjalan
Lon duek tuan jih beurdiri
Bak peunyuem lon han got ragam
Binatang nyan hana got krie
Teujak teudong Muda Seudang
Neu meuriwang neukalon jih
Lheuh nyan neu eh Syah Gumiran
Muda Seudang droe neubuni
Ban Bue kalon tan meubayang
Pantah han ban ji peureugi
Troeh le keunan meuhadapan
Ayat tuan laen rawi
Kureung pakhok antok kalam
Han got ragam lon meurika
Nyoe lon peugah wahe taulan
Deungoe abang lon calitra
Banta kalon ka troeh datang
Beudoh rijang neu peunyata
Di Bue pike ka leupah jalan
Ji meuriwang han got rupa
Teuma mariet Syah Gumiran
He binatang deungoe hamba
Soe nama kah ka kheun rijang
Lon eue badan kah that raya
Gata musoh atawa rakan
Lon deungoran peugah sigra
Peu kah jen atawa ensan
Atawa Milan hantu rimba
Bue seuot le pantah rijang
Lon kon lawan deungon gata
Ulon kon jen atawa ensan
Kon binatang beuthat peut pha
Bit neukalon raya badan
Ulon tuan miseu gata
Bagian 79
Bit neukalon sang binatang
Gata ngon lon saboh bangsa
Gata wareh ngon lon tuan
Han ta tuban asai mula
Keupeu neu tanyong nama ulon
Teungku Ampon soe beurnama
Gata sinan peugah dilee
Lon deungoe lagee ta peucalitra
Ban neudeungoe haba meunan
Beungeh han ban Syah Gumiran
Kutanyong kah ka tanyong kee
Le that lagee Bue ceulaka
Neucok panah dalam bajee
Neu meungkisee bak keupala
Bue seuot le meunoe lagee
Piyoeh dilee sikleep mata
Pakon meugriet neu meupoh kee
Neukheun lagee peue kareuna
Meunyoe tan seubab pike dilee
Neu meungpoh kee neu enanya
Ban neudeungoe meunan lagee
Dalam bajee neuboeh sigra
Lom neutanyong miseu dilee
Ka kheun lagee lon deungoe gata
Hoe meulangkah ka beurjalan
He binatang peugah sigra
Lon deungoe utoeh ka meukulam
Hana macam miseu gata
Bue seuot le pantah rijang
Lon tuan jak seutot Apa
Seutot Apa Cut lon beurjalan
Adek tuan lon ayahnda
Banta seuot rijang-rijang
Soe geuhoi nan Apa Cut gata
Bue peugah le teuma rijang
Syah Gumiran geuhoi nama
Ayah ulon Diwa Seukandan
Ibu laman Ratna Indra
Nama nanggroe Syam Palimbang
Ayah laman mat neuraca
Kusyik ulon Usman Juhan
Ampon laman deungoe hamba
Ayah Ibu Said Ba’dan
Indra Lailan isteurinya
Neumat Keurajeun Nanggroe Shafaran
Ta cuba pham uleh gata
Apa Cut lon Syah Gumiran
Lam reugam panah pusaka
Zameun ka treb neubeurjalan
Farama Hiram keunoe bungka
Amren Cahya nama Putroe
Apa Cut kamoe nyang meuhawa
Nama ibu Cut Kandy Syam
‘Ursyam Zamzam nama bapa
Neumat Keurajeun Farama Hiram
Laot saktian sinan Kuta
Ban Banta deungoe haba meunan
Yoh masa nyan neu pareksa
Bit-bit gata aneuk Sulthan
Diwa Seukandan geurasi nama
Lon eue gata sang binatang
Toh pakrie ban asai mula
Bue seuot le pantah rijang
Jameun tuan saboh masa
Nibak gaki buket Jilan
Ibu laman peulheuh nazar
Meuteumeung krueng saboh sinan
Ie di dalam dua bangsa
Siblah puteh siblah hitam
Po ku Tuhan nyang keureuja
Ayah manoe lam ie hitam
Ibu sajan siseun dua
Ka teukeudi nibak Tuhan
Jeut gobnyan miseu Raja Kra
Neu meusituboh yoh masa nyan
Jadi laman Tuhan karonya
Bagian 80
Nyan keuh seubab meunoe macam
Ulon tuan na miseu Kra
Apa Cut lon tiek lam ie puteh
Ayah puleh miseu nyang ka
Na saboh krueng teuma dudoe
Bak rot ta woe bak Aulia
Geu meupiyoeh dum sibarang
Beusar seudang tuha muda
Di sinan rhot ma’anikam
Ibu laman Ratna Indra
Teuma neuboeh lam on kayee
Uyueb batee neukeubah sigra
Teutap sinan tujoh uroe
Jadi kamoe akhe masa
Ulon teungoh teuma dudoe
Leugat jinoe lon jak tapa
Hana guree lon meurunoe
Tuhan sidroe brie rasia
Padum na treb teuma dudoe
Habeh lon tusoe dum syeedara
Lon thee Apa Cut leupah keunoe
Beudoh dudoe lon jak mita
Na keuh baro dua uroe
Nyoe hoe sampoe troeh bak gata
Na taturie na tatusoe
Apa Cut kamoe Syah Gumiran
Ban neu deungoe meunan bunyoe
Seuot jinoe Banta Muda
Wahe aneuk deungoe kamoe
Lon peugah nyoe ubak gata
Wahe keumuen na tatusoe
Nyoe keuh kamoe Apa Cut gata
Syah Gumiran nama kamoe
Samlakoe soe geuhoi nama
Bue seuot le leugat jinoe
He Apa droe deungoe hamba
Beu ta turie beu ta tusoe
Nyoe keuh kamoe Basyah Gomtala
Padum na treb lon deungoe bunyoe
Bak siuroe nyoe lon eue rupa
Lheuh nyan teuma mumat jaroe
Ban dua droe hate suka
Ngon kuasa Tuhan sidroe
Neubrie sampoe troeh ban pinta
Geu piyoeh le rot deh rot noe
Bandua droe keumuen Apa
Sutra puteh cob kupiyah
Sutra mirah lhab keu seumba
Dilee matan ulon peugah
Jinoe surah lon boeh makna
Nama Hikayat Gomtala Syah
Meunan peuneugah guree hamba
Dilee Teungku goh troeh wajah
Baro leumah pura-pura
Seureuta ngon ulon kisah
Gomtala Syah lon calitra
Teuma mariet Gomtala Syah
Wahe ayah deungoe hamba
Seureuta ngon jiboet jaroe
Ampon kamoe Ayah Muda
He Ayah Cut Mata Uroe
Aneuk teuh nyoe raya hawa
Beu Allah brie hajat sampoe
Keumuen teuh nyoe mohon pinta
Gumiran Syah tanyong meunoe
Po Samlakoe peu ta pinta
Peugah leugat he Samlakoe
Tuhan sidroe peutroeh pinta
Gumiran Syah kheun hareutoe
Seuot dudoe Basyah Gomtala
Nyang troeh langkah lon jak keunoe
Hajat kamoe gantoe gata
Ayah Cut duek bak teumpat nyoe
Bah le kamoe jak meumita
Amren Cahya nama Putroe
Lam laot nyoe he ayahnda
Bagian 81
Neu peuidzin lon Ayah Cut droe
Lon cok Putroe aneuk raja
Oh lheuh lon cok leugat lon woe
Lon peujaroe ubak gata
Meuhan jibrie ‘Arsyon Zamzam
Lon lawan prang Raja raya
Cit ka lon thee ek neumeuprang
Ek neusagang tantra raja
Beuthat ek droe nyang neumeuprang
Siseun tuan bah lon ngaza
Rimba lon cah laot lon dhoe
Lon cok Putroe Amiren Cahya
Di Ayah Cut neuduek keudroe
Na gantoe Basyah Gomtala
Insya Allah ngon tulong Tuhan
Neu eue buet tan Keumuen Apa
Mangat neukalon buet binatang
Mangat neutuban buet Raja Kra
Bit neukalon panyang iku
Ek lon eumpu Pinto Kuta
Teuma seuot Gumiran Syah
Han peu salah he aneuknda
Oh lheuh idzin nibak ayah
Beudoh pantah jimeung bungka
Le Gumiran neukheun lagee
Piyoeh dilee sikleep mata
Beek meugriet that ngon meudhab-dhab
Malaikat han neuridha
Meunyoe pantah buet seurikab
Piyoeh siat Basyah Gomtala
Jinoe aneuk lon peugot surat
Joek keu Daulat Raja Raya
Meuhan geubrie deungon mangat
Dudoe meuhat gata ngaza
Meunan nariet Syah Gumiran
Piyoeh yoeh nyan Basyah Gomtala
Syah Gumiran peugot surat
That bit ‘ajab haba Raja
Lheuh meututo beuot jaroe
Beudoh dudoe ka jibungka
Leugat laju ji peureugi
Bineeh pasie nyan kuala
Gomtala Syah beut hekeumat
Badan that kuat kon ban nyang ka
Ji peujeut droe keu eungkot tri
Jilangue le lam laot raya
Sikleeb siklab plueng beurlari
Sampoe lagi Kuta Raja
Basyah ka troeh u pusat laot
Kon ban eungkot laen rupa
Jeut keu bayeun Gomtala Syah
Jipoe pantah lam istana
Deungon surat nibak babah
Troeh leupah tingkap istana
Jiba surat kab ngon babah
Jitiek pantah lam leumueng Raja
Amma ba’du poma badan
‘Arsyon Zamzam lon calitra
Raja neu eh di meuligoe
Sajan Putroe isteurinya
Teulheuh nibak nyan teuma dudoe
Troeh sampoe Bayeun ji teuka
Deungon surat nibak babah
Jitiek that paih lam leumuengnya
Raja cok le leugat-leugat
Neuploh lipat ka neubuka
Habeh maklum dum sibarang
Hireun mandang Raja Raya
Ka teupike Ampon Daulat
Ek ji tupat lam laot raya
Meukon ureung rayek pangkat
Han ji tupat teumpat hamba
Meunan pike Raja Daulat
Neupangge rakyat Imum Bentara
Troeh le keunan han jan siat
Ampon Daulat neu meusabda
Bagian 82
Poteuraja neubaca surat
Dinab rakyat dum peutua
Tuan Putroe gob meuhajat
Aneuk Daulat Syah Gumiran
Nama Nanggroe Palimbang Syam
Raja Sulthan Juhan Usman
Nyan keuh jinoe pakrie padan
Uleebalang seuon sabda
Ampon Daulat lon jeunulang
Ban nyang reumbang bak sarpada
Ban nyang patoet sabe lawan
Meung reumbang han le meudawa
Neupeugah bak dum pahlawan
Troeh rijang keunan teuka
Oh troeh keunan dum meusapat
Raja Daulat peugah sigra
Raja peugah leugat-leugat
Na troeh surat saboh teuka
Gumiran Syah lam surat nyan
Juhan Usman nama ayahnda
Syah Gumiran lakee meukawen
Ngon Putroe Canden Amren Cahya
Pakrie ta tueng atawa han
Kareuna gobnyan aneuk raja
Meuhan ta tueng akhe alang
Nanggroe ji prang uleh Banta
Bak peunyuem lon le saktian
Adak ta lawan nyuem ek padra
Jikalau ta tueng ta balah surat
Meuhan bah that keunoe teuka
Habeh neupeugah pasai ngon bab
Yoe meukhab-khab pahlawan dum na
Teuma seuot Amud Hajidan
Di dalam nam nyang that tuha
Ampon Tuanku meuribee katoe
Tuan Putroe beek neu ridha
Jikalau troeh keunoe dudoe
Kamoe tujoh droe lawan ngaza
Keupeu cit na kamoe tujoh droe
Meung siuroe tan keureuja
Bak siseun nyoe bah ta pakoe
Toh buet jaroe balah guna
Daulat Ampon tanglong nanggroe
Bak siseun nyoe ta keureuja
Keupeu raya pruet raja tujoh droe
Rakyat sikatoe dalam rimba
Hana lon brie Tuan Putroe
Bah le bak dhoe laot peunawa
Pakrie ta tueng han meusoe-soe
Kareuna Putroe indah rupa
Han seupadan deungon Putroe
Ngon geutanyoe han sabe bangsa
Meunan nariet Amud Hajidan
Putroe Intan han ji ridha
Keumah pakat sapeu padan
Pahlawan ngon Raja Raya
Teuduek siat lem pahlawan
Bayeun tuan lon calitra
Bayeun jidong di hadapan
Ureung lapan peugah haba
Ji deungoe nariet bak Sulthan
Habeh jipham mangat suka
Lheuh nyan Bayeun ji meukalam
Ngon Sulthan Raja Raya
Ampon Tuanku meuribee katoe
Ta deungoe kamoe Pomeukuta
Tuanku tueng keu meulintee
Asoe juree Syah Gumiran
Beek Tuanku keumeung meuprang
Syah Gumiran that peurkasa
Adak tujoh droe na pahlawan
Nyang that geunggam Syah Gumiran
Nyang sidroe nyan teuga han ban
Han soe ek lawan barangrie Raja
Ulon teuh nyoe peuringatan
Seubab sayang keu sarpada
Bagian 83
Beek roeh dudoe teuka alang
Gata Sulthan sabe Raja
Ban Raja deungoe haba meunan
Seuot yoh nyan pantah sigra
Hana kutueng Syah Gumiran
Muka masam rok-rok masa
Lagi pih han sabe lawan
Deungon laman han sabe bangsa
Meuka han ek lon lawan prang
Lon thee agam ureung teuka
Bayeun deungoe haba meunan
Jikheun yoh nyan sikrak haba
Panee ta turie Syah Gumiran
Hana ta tuban Syah Gomtala
Meugoh lom troeh keunoe datang
Raja jalang kusalib jungka
Ban Raja deungoe haba meunan
Beungeeh han ban ji ek bisa
Neu beudoh le pantah rijang
Bayeun jalang le that haba
Antara kah nyang teureubang
Eumpeun musang le that haba
Sinan keuh phon meukab agam
Akhe datang jeut prang raya
Neusuet peudeung pantah rijang
Neu keumeung cang Bayeun teuka
Ban jikalon ka meulayang
Jipo rijang euncong jeumpa
Sira jipo meunoe lagee
Raja asee ceubeuh raya
Cuba ka troen keunoe dilee
Troeh peureudee uram jeumpa
Raj neugroeb le di juree
Meug han ku thee sabe padra
Bayeun jitroen le u bumoe
Ji kupruek droe leun istana
Ban ji kupruek ji hayak droe
Ka meuwoe badan ban nyang ka
Badan raya hana bagoe
Karab dhoe saboh istana
(Hikayat Gomtala Syah ini belum tamat, baru bagian permulaan saja!)
Hijeurah Nabi
Oleh: T.A. Sakti
Bismillahirrahmanirrahim
Ya Rasulullah ya Nabiyullah
Sayed Madinah ya Allah qalbin nurani
Nabi Muhammad ya Allah geunaseh Allah
Imum Madinah ya Alllah nyang that trang hate
Umu 53 thon ya Allah Nabi di Makkah
Han ek neuteugah ya Allah nyang larang Rabbi
Ureueng lam Makkah ya Allah nyang kukoh-kukoh
Bandum pi musoh ya Allah keumeung poh Nabi
Sabab neuminah ya Allah Nabi di Makkah
Nanggroe Madinah ya Allah beurangkat Nabi
Saidina Hamzah ya Allah beurangkat sajan
Saidina Usman ya Allah Abubakari
Saidina ‘Umar ya Allah Ibnu Khatab
Ban peuet droe sahbat ya Allah Saidina ‘Ali
Laen nibak nyan ya Allah nyang asoe rumoh
Nyang ikot suroh ya Allah jak sajan Nabi
Tujoh reutoh droe ya Allah ureueng jak sajan
Sahbat jimeunan ya Allah nyang muhajiri
Antara Makkah ya Allah deungon Madinah
Hana that jeuoh ya Allah duwa blaih hari
‘Oh sampoe Nabi ya Allah nanggroe Madinah
Sinan neupiyoh ya Allah diluwa wadi
Makanan pi tan ya Allah minoman pi han
Ureueng nanggroe nyan ya Allah han sidroe meuri
Na tujoh uroe ya Allah Nabi troih keunan
Ka geudeungoran ya Allah ka datang Nabi
Ureueng Madinah ya Allah teubiet meuree-ree
Geujak peuteuntee ya Allah geujak tueng Nabi
Ureung nyang tuha ya Allah tanyong khabaran
Dimana tuwan ya Allah ya Allah datang keumari
Lon kalon ilok ya Allah khuluk peungaroe
Keumala nanggroe ya Allah peue sabab lari
Nabi neu jaweueb ya Allah lon Rasulullah
Dinanggroe Makkah ya Allah keunoe peureugi
Kawom diulon ya Allah dum ureueng Makkah
Han ek lon teugah ya Allah biek munafiqi
‘Ohban geudeungo ya Allah Nabi kheun meunan
Geucom ditangan ya Allah geupuwoe Nabi
Ureueng Madinah ya Allah sangat meu-untong
Geupuwoe tangglong ya Allah keumala nanggri
‘Oh tamong Nabi ya Allah nanggroe Madinah
Dumpeue pi mudah ya Allah karonya Rabbi
Ureueng Madinah ya Allah bandum ji ikot
Nyng hantem turot ya Allah kawom kafiri
Ureueng Madinah ya Allah leupah guransang
Geujak peungon prang ya Allah jak sajan Nabi
Lam umu sithon ya Allah Nabi disinan
Neujak guncang prang ya Allah nanggroe Qubeuti
Na umu sithon ya Allah Nabi dalam prang
Agama teudong ya Allah ka wafeuet Nabi
T.A. Sakti
#Peminat budaya dan sastra Aceh
Catatan : – Ca-e Hijeurah Nabi di atas dikutip dari “lampiran” hikayat Akhbarul Karim
karya Teungku Seumatang. Lampiran itu mungkin bukan bagian asli naskah itu,tetapi mungkin tambahan yang disisipkan para penyalin-ulang. Tahun 1993 kitab ini telah saya salin ke huruf Latin dan sudah dua kali dicetak/diterbitkan. Beberapa sekolah dan pustaka di kampus Darussalam dan Banda Aceh pernah saya hadiahkan naskah ini.
- kukoh-kukoh = kuat, perkasa
- khuluk = serupa, bagaikan, mirip
- pengaroe = pangeran
- tanglong = lampu, pelita
- keumala nanggroe = pemimpin negeri
sumber: http://tambeh.wordpress.com
.JPG)
thanks teungku, mungken lebe get, bila ada senandung jih..
BalasHapus