Narit Sipatah

Narit Sipatah

Buah karya: Ustadz Syamsuddin Ahmad (SYAMSA)

A’udzubillah deungon bismillah

Haba sipatah bak lon nyang hina

Lon cok ngon pena seureuta keureutah

Lon tuleih bagah sie on on si banja

Haba nyang peunteing lon kumpoi bagah

Haba fatuwah dari ulama

Beuthat hai teungku buku hikayah

Asoe fatuwah neu analisa

Bek tuwoe tuwoe akan potAllah

Meunan amanah bandum ulama

Mula bak nabi nyang rasul Allah

Bak asai liah Adam ngon Hawa

Sampoe Muhammad nyang akhee leupah

Meunan syit peugah hana meutuka

Tabi’ tabi’in meunan syit ulah

Bandum amanah hana geu lupa

Haba nyoe lon cok lon kutep bagah

Dalam chutheubah pat na lon teuka

Bak teungku teungku lon tanyoeng bagah

Teuma bak sahbat nyang lee syit pinta

Aneuk mit cut cut nyang matee jinoe

Oh uroe dudoe asoe syiruga

Dibabah pintoe sinan meusahoe

Ji preih preih trouh woe ayah ngon bunda

Ka deungoen cirik di mat bak jaroe

Ka saboh sapou intan mutia

Dalam cirik nyan ie mon hayati

Mameh ban nira sijuek han sakri

Teuma geu marit malaikat Ridhwan

Tamoeng u dalam bek lee di lua

Han jeut meutamong kamoe uroe nyoe

Goh meumat jaroe ayah ngon bunda

Sira jimou ie mata jih roe

Kadang katroeh woe ayah ngon bunda

Nyang peubut jroh peu jioh tegah

Meu rumpok bagah deungon aneuk’da

Teuma nyang maksiet gobnyan keu Allah

Waktee troeh keunan geu ubah rupa

Rupa di gob nyan ngon qudrat Allah

Lagee bui itam nyang leupah raya

Ingat Keu Matee

Buah karya: Ustadz Syamsuddin Ahmad (SYAMSA)

Geutanyoe hudep ta preih preih matee

Ingat boh hatee dumna syedara

Yoh mantoeng hudep ingat boh hatee

Keu uroe pagee beukai teuh beuna

Kaya lam donya seunang bukeun lee

Hana meu sampei hana jeut taba

Han jeut ta puwoe keu uroe pagee

Badan meugulee dalam cheureunda

Kareuna atra laloe teuh sabee

Akan keu matee teu ingat hana

Hana teu ingat keu uroe pagee

Geutanyoe matee amai teuh hana

Oh troeh bak masa hana teuga lee

Nyawoeng geu peucree ngon badan gata

Darah ngon urat hana mumet lee

Hatee ngon jantong han lee meugeunta

Pakriban azeub sakreut ban matee

Bukoen peudeih lee nyawoeng geu hila

Oh troeh lam ureuk han pue peugah lee

Meunyoe boh hatee amai teuh hana.

(Koetaradja, 6-11-65)